Read abua Azaya 37 Bible Online

Azaya 37 - abua bible

Azaya 37

¹Ịduon phọ ạHezekaya ọdaam mọ ạnaghan bọ ịpe bịdi ọghaaph bọ, bịn ọdi ạphanyi ibura phọ ọdi, ạsighe ịlo ọto kụ ạghi aḍigh sịphe Otu Ọmoogh-we phọ.

²Ọdi arom ni Ẹliakim ọnyo oḍighi phọ rapogh ghan bọ ogiga ọdaam mọ, Sebna ọgeeghia phọ, rꞌikumoor ariil ạrikia phọ ọghi ọteeny Azaya oyil phọ ọony phọ Amoz. Bịdi omunughian aani rukpe-ọto.

³Ḍịen kụ adom dị ọdi arom bọ bịdi ọḅeni Azaya: “Arodon aḍio ịminimiin; rụlhiom iyira kụ odi dọl aroofola. Yira ọkigh ạnir dị oghunughun rakun, kụ aloor medugh.

⁴Ogbogh ọdaam Asiria phọ marom uwo ẹmhu ọnyo oḍighi ọdi mọ ạgilaam Ẹnaan phọ edi ghan bọ ni. Eḍighi ni ịdi Ọmoogh-we Ẹnaan phọ ạna kạnaghan rịgilaam mọ ịphen kụ ạliom bụphe ọghaaph bọ ịphen phọ. Loor ịphen phọ, ḅẹeḅereghi ạngo bụphe osugha bọ sịphe aḍita awe phọ ayira.”

⁵Mem dị Azaya ạnaghan bọ dom ạHezekaya ọdaam mọ,

⁶ọdi aḅulemi ọphagharanaan mọ, “Ọmoogh-we phọ ạḅem mọ aruugu nyịna kúsiph ịlo ọghaaph phọ nạ ạnaghan bọ, ịpe abutelhedom ọdaam mọ Asiria moofolomiom bọ nyịno.

⁷Mọ ọno Ọmoogh-we phọ kaḍighi ni ịdi ogbogh ọdaam mọ kạnaghan ọphenekpe dị kaḍighi ịdi ọdi kaḅula akeel eelhe ọdi, kụ mọ ọno Ọmoogh-we phọ aḍighi ịdi kokiigh nyọdi ẹpe phọ.”

⁸Ọnyo oḍighi Asiria phọ ạnaghan ni mọ ogbogh ọdaam mọ mạḍua ẹpe Lakis ạki azuom ẹgham ẹmha aLibna rabe; kụ ọdi ạghi aani ẹpe phọ ịlo aruupuruan.

⁹Kụ aweye Asiria ọnaghan ọphenekpe mọ aTirhaka ọdaam mọ ạSudan uwo ẹmhu awe ẹgham mọ Ijipt ratu ozuom ạbidi. Mem dị ogbogh ọdaam mọ ạnaghan ịphen phọ, ọdi ạge ḍịnya ạghiom Hẹzekaya ọdaam mọ aJuda

¹⁰kụ ọḅeni mọ, “Kámeera ẹmugh phọ ẹpe nạ aḍuom bọ ologhi eekeleghi nyịna ẹḅem ghan mọ kọ́ḅogh Jeruselem ọlogh ḍịghaagh ọdaam mọ Asiria.

¹¹Tọ nạ mạnaghan ni ịpe ogbogh ọdaam mọ Asiria raagulemi ghan bọ tọrobo eelhe lọ oḍi rạwa ophiemi, kụ nạ ragbi mọ nạ kakpetenaan ni?

¹²Ạburude oko ạmi uphiemi ni rạmha aGozan rꞌạHaran rꞌaRezef kụ ọze weye ạBet Iden bụphe orugh bọ Tẹlasar, kụ rꞌeniin ẹmugh ạbidi ítue ịpel bịdi.

¹³Odi ẹghen ạbudaam mọ ạHamat rꞌApad rꞌaSefaavaim rꞌaHena rꞌIva?”

¹⁴Kụ ạHezekaya ọdaam mọ ạar ḍịnya phọ ḍịghaagh abutelhedom mọ kụ ạal. Kụ ạHezekaya ạghi aḍigh sịphe Otu Ọmoogh-we phọ aseere ḍịnya phọ sịphe egbodo Ọmoogh-we phọ.

¹⁵Kụ ạaḅereghi mọ,

¹⁶“Ọkar Ogbogh Ọmoogh-we Ẹnaan phọ Ịzirel, ọpo ọrolomi bọ okupheriom ogbo ạruukpaany aghuḍuul phọ. Nạ bịn kụ Ẹnaan dị ạda oomo areelhe ịsien aḅirini phọ. Nạ kụ ụlhem bọ kẹ phọ rꞌade phọ.

¹⁷Seseeny ni, Ọmoogh-we. Ụnaghanan iyoor kụ aphogh ịpe rimitenaan bọ iyoor. Ler rụru phọ ạna ạnaghan oomo ịpe ạSenakerib rạkaaph bọ ọgilaam ạna Ẹnaan phọ edi ghan bọ ni.

¹⁸Oomo ayoor olegheri ni, Ọmoogh-we, mọ abugbogh ạbudaam mọ Asiria mophiemi ni ịbadi areelhe, otene rere ạbidi ọkpagha.

¹⁹Mọsighe rụmugh phọ ạbidi ọkpooniom nịan — ịdi íḍighi rụmugh rꞌẹnum, ịkaaneen ạraraar ireeny rꞌasighiigh bịn dị awe kụ oḍighinom rạghaagh.

²⁰Kụ nyịidipho, Ọmoogh-we Ẹnaan phọ ayoor, seseeny ụtagharan iyoor rạghaagh awe Asiria, ọbo oomo areelhe ịsien aḅirini phọ olegheri mọ nạ, Ọmoogh-we, bịn kụ Ẹnaan.”

²¹Kụ Azaya arom ạghiom Hẹzekaya ọdaam mọ kụ ạḅeni mọ, Ọmoogh-we phọ ạḅem ịduon mọ ịpe nạ ạtu bọ Sẹnakerib kụ ạaḅereghi bọ, mị mạnaghan ni.

²²Ọmoogh-we phọ ạḅem mọ, “Ẹmha phọ aJeruselem rẹmilogh ni nyịna ạSenakerib, ẹḅile ẹḅitonaan nyịna.

²³Ạnhian kụ ọdi nạ ạatughian bọ mọ nạ rạgilaam ghan kạphue phọ? Ẹnaan Oye Aghuḍuul phọ Ịzirel kụ ọdi nạ azuom. Nạ ịmi eghuan ụ́lhogh.

²⁴Nạ urom ni butelhedom mọ ạna mọ oobaga risigh ạmi mọ nạ ụsighe ni ḍita arughuugh ẹgham mọ ạna apiemiom oomo igbogh aruugum mọ ạLebanon. Nạ aabaga mọ sịphe phọ nạ ulher ịkar iiphopha ạrasaga phọ rꞌigeny ireeny ạḍiipioph asiemi ude. Nạ aabaga mọ nạ usi ọkar ogbo ologhi ạruukpua phọ.

²⁵Nạ aabaga mọ nạ uguph sighuḍia kụ ạphughol mụum iiruen arere kụ ạrada awe ẹgham mọ ạna ẹezeghi Ọphiiny aNail dị emooph ẹgharagharami.

²⁶“Nạ kọ̋naghan mọ mị ugbiighi oomo ịphen kꞌamem dị mebia ni? Kụ nyịidipho mị maḍighi amitiom. Mị ụngo ni nyịna ịikpo oḍighi ịdi ạramha phọ ịpe ọlhoghoḍi bọ riisi ẹkpar emeleghu ẹgbenem.

²⁷Bụphe orugh bọ ẹpe phọ ịikpo ụ́moogh. Bịdi ụmoogh eepuph kụ omaghagha yogh. Bịdi ọkigh ịdipho ạroogho ozo mꞌạmudi asi ạnyu otu kụ ọghologhol oghim ạḍua ẹpe emitenom erumuḍio phọ aphiemi.

²⁸“Kụ mị alegheri ni oomo ạraraar ịlo ạna, ịlo nạ aḍighi rꞌekpisi lọ nạ ạghi. Mị mạnaghan ni oboom ophin ologhi dị nạ ụmooghom ịmi.

²⁹Mụḅeni ni ịmi ịlo oboom ophin ologhi rꞌiituma phọ ạna. Ịphen kụ iḍighi mị kạsighe ḍịḅaph ạmi ạlogh izon ạna, kụ agborori opoḍi ạmama ọnhu ạna kụ arelhiom nyịna aḅulemi eten phọ nyẹpe nạ arelhe bọ kụ aru.”

³⁰Pọ kụ amem dị Azaya ạḅeni Hẹzekaya ọdaam mọ mọ, “Ịphen phọ eḍighi eḍeenaan esi ạna ịdi kemite. Lhạ phọ arolhool rꞌạḍinon nạ kale ghan ịbiakpa eḍum dị oye kụ ụ́zuph; lhạ rꞌạḍiphe retu bọ nạ katue ni ạzuph ịbiakpa ạna kụ ạku, ạzuph iizin avain kụ ale rughuuny iimuma phọ.

³¹Iikoma ạbuphe okpetenaan bọ sịphe ọto kꞌaJuda koomanam, aruwol ạbidi ẹkpaph ude omiigh ọmaraghian ọkiom ghisigh.

³²Iikoma awe kosugha ni sịphe Jeruselem rꞌẹpe Eegum ạZayon ịdi eḍighi bọ Ẹnaan Oomo Ịikpo Ọmoogh-we phọ ạnya ni mọ ịphen phọ kemite ni.

³³“Ịphen kụ ịdi Ọmoogh-we phọ mạghaaph ịlo ogbogh ọdaam mọ Asiria: ‘Ọdi káḍigh ẹphen ẹmha phọ ḅịle kạ́taph rꞌeniin ekpo apoghomiom. Rꞌoniin ọnyo ẹgham dị ạpham ọsuaram kátuman ẹmha phọ kụ kóḅologh ruḅum okoom ẹmha phọ.

³⁴Eten phọ ẹpe ọdi ạḍua bọ kụ ratu, ẹpe phọ kẹn kụ ẹdi ọdi akiton kụ aḅula. Ọdi ráḍigh ẹmha phọ ẹphen. Mị Ọmoogh-we phọ kụ mạḅem.

³⁵Mị kagbororian ni sịen ẹmha phọ ạpel ạsighe, loor ẹmhu arughuenian phọ ạmi ḅịle rꞌesi ịpe mị aguanaan bọ Devid otelhedom mọ ạmi.’”

³⁶Ọokpaany kꞌỌmoogh-we phọ ạghi ni ẹpe arugbogo Asiria phọ ạze oniin okuron ọphaanyadi rꞌoogh ọonir awe. Esoph ạḍiroor, bịn ọmiin dị bịdi momuughu oḍighi iḍim.

³⁷Kụ ạSenakerib ogbogh ọdaam mọ Asiria aḅula agheel kꞌọdi ẹpe Nineve.

³⁸Eniin aḍio ọdi odi rạaḅereghi ghan sịphe otu ẹmugh ọdi dị oghol mọ aNisrok, bịn ịyal ạnmuny ọdi dị oghol mọ Ạdramelek rꞌaSarezer ọsighe rolhool ẹgham obenoghom nyọdi oghiigh, bịn osumughu ogheel ẹpe ade phọ Ạrarat. Kụ Esar Hadon ọnon ọony ọdi ạsighe esi phọ ọdi ạda.