Read abua Azaya 38 Bible Online

Azaya 38 - abua bible

Azaya 38

¹Riiḍio phọ ịpe phọ, ạHezekaya ọdaam mọ ạarurughian dị ạwa ni omugh. Kụ oyil Azaya, ọony phọ Amoz, ạghi ạteeny nyọdi kụ ạḅeni mọ, “Ọmoogh-we phọ ạḅeni nyịna mọ mạar asereghi rạraar ạna, ịdi eḍighi bọ nạ káḍum. Kookolobian ḍuugh.”

²Kụ ạHezekaya akiton risigh ọdi asomori iikpe kụ ạaḅereghi:

³“Ọmoogh-we, seseeny, tụutughian nyịidipho mọ mị makumuan ni nyịna rꞌoomo ologhi ạmi kụ ạkparagha oḍighi ghan ịdi eseleman risigh ạna.” Kụ ọdi amiigh omoghi yogh.

⁴Kụ Ọmoogh-we phọ ạto ạḅeni Azaya

⁵mọ aḅula ạghi ạteeny Hẹzekaya ạḅeni nyọdi mọ, “Mị Ọmoogh-we Ẹnaan phọ aDevid ọde ọde phọ ạna mạnaghan ni ịiḅereghi phọ ạna ạḅile ạmiin izin phọ ạna; mị kạdoonye siḍughul-otu phọ ạna ạḅaram ḍioph rꞌoogh ạsia.

⁶Mị kạatoghion ni nyịna rꞌẹmha phọ aJeruselem mọ ẹphen ạsighe ḍịghaagh ogbogh ọdaam mọ Asiria, kụ mị ạmaar ghan aako ẹmha phọ.”

⁷Azaya ạphagharanaan mọ, “Ọmoogh-we phọ kamitiom ni eḍeenaan mọ ọno kaḍighi ni ịpe ọno aguanaan bọ.

⁸Sịphe eedanien phọ Ehaz ọdaam mọ ạlhogh bọ, Ọmoogh-we phọ kaḍighi ni ịdi oogho kaḅula ọman ḍioph ạrada.” Kụ oogho phọ aḅula ni ọman ḍioph ạrada.

⁹Mem dị ạHezekaya amoon bọ esi ẹzegh phọ, ọdi ạge ḍụor ọsephom mọ ạḍien:

¹⁰Mị ugbi mọ mị mạkpo eloogh kụ rakeel ọmar iḍim, mọ aghuḍum ịmi úlho mun.

¹¹Mị ugbi mọ sịen eye phọ mị kạ́miin mun Ọmoogh-we phọ ḅịle mꞌoye dị odi eye.

¹²Usoph ghuḍum ạmi ọsighe bịn okureri, dị ẹrol mụdi ogbogo dị ogborion, mụdi ukpe dị osoph sịphe rolho bọ. Mị ugbi mọ Ẹnaan rekureri ghuḍum ạmi.

¹³Oomo aḍughul mị umoghiom eephina, mụdi ạnam-dịka kụ rabunughi ịḅarara ạmi. Mị ugbi mọ Ẹnaan rekureri ghuḍum ạmi.

¹⁴Ẹḍogh ạmi mepiiphian kụ edugh, kụ mị ạkuph ịdipho ọkurughozo. Ariḍien ạmi edugh ophogh ghan ạnyu ạke. Ọmoogh-we, ụtagharan ịmi esi oomo ịminimiin phọ ịphen.

¹⁵Mị kạkaaph eeghe? Ọmoogh-we phọ kụ aḍighi ịphen phọ. Ologhi ạmi rakiḍim, kụ mị kátue ạnaani.

¹⁶Ọmoogh-we, mị kạrolonaan nyịna, nyịna bịn; Uukonom ịmi mị ụtol.

¹⁷Eghiḍim ologhi ạmi meten ẹepho. Nạ ụphel ghuḍum ạmi ạsighe esi oḍighima ịyaar; nạ ạsar oomo ịkaraph ạmi ạwile.

¹⁸Oye ólho dị kạtol ọmar iḍim kụ aaseeny nyịna; oye lọ mamugh kạ́kpasi mun emooph ọdi dọl aghuḍuul phọ ạna.

¹⁹Bụphe odi bọ kụ rooseeny nyịna ịduon mị raaseeny bọ nyịna. Ạburude rọḅeni ghan nmụny ạbidi ịdi nạ aḍighi oye aghuḍuul.

²⁰Ọmoogh-we, nạ muukonom ịmi. Yoor kopegh ọne kụ ọmoor sụor ooseeny, ọmoor oboom sịphe Otu Ịiḅereghi phọ ạna sịen yoor odi bọ.

²¹Azaya ạḅeni ọdaam mọ mọ agbul elho ịizughum ạfig loor ofuku phọ ọdi bịn ọdi kamoon ni.

²²Kụ ạHezekaya ọdaam mọ apuru mọ, “Eeghe kụ keḍighi eḍeenaan mọ mị katue ni ạki aḍigh sịphe Otu Ịiḅereghi phọ?”