Read abua Azaya 39 Bible Online

Azaya 39 - abua bible

Azaya 39

¹Riiḍio phọ ịpe phọ, aMerodak Bạladan ọony phọ ạBaladan ọdaam eelhe phọ ạBabilon ạnaghan ni mọ ạHezekaya ọdaam mọ ómoon kụ ọdi ạge ḍịnya ạḅaram ịyaar ọloghonaan ạḍighaagh ạghiom nyọdi.

²ẠHezekaya ạmagh ni rụukpaany phọ ạlogh otu kụ aḍeenaan bịdi ẹelha phọ ọdi: silva rꞌagol ọdi, rolho ịma eḍu ịlo ogbula rꞌạraraar ọdughemiom ịisa, rꞌoomo ịinya ẹgham. Ịyaar ị́tol iisoph eekoom mọ, mꞌẹnon esi oomo eelhe phọ ẹpe ọdi ạda bọ dị ọdi bịdi úḍeenaan.

³Kụ Azaya oyil phọ ạghi ạteeny Hẹzekaya ọdaam mọ kụ apuru nyọdi mọ, “Awe phọ ạbuen phọ ụḍua ẹghen kụ oru bọ kụ ụḅeni nyịna eeghe?” Kụ ạHezekaya ạphagharanaan mọ, “Bịdi ụḍua ni kꞌẹpe eelhe phọ ạBabilon, ekpisi dị ẹkel iboom kụ oru bọ.”

⁴Kụ oyil phọ apuru mọ, “Bịdi ụmiin eeghia sịen otu phọ ạna?” Kụ ạHezekaya ạphagharanaan mọ, “Bịdi ụmiin ni oomo ạraraar phọ edi bọ sịen otu phọ ạmi. Ịyaar ílho iisoph ookoom ạraraar phọ ạmi dị mị bịdi uḍeenaan.”

⁵Kụ Azaya ạḅeni Hẹzekaya mọ, “Nạghan ịdi Ọmoogh-we oomo ịikpo phọ ạḅem.

⁶Aḍio retu ni dị oomo ạraraar phọ edi bọ sịen ogiga phọ ạna rꞌoomo aruphua phọ ịpe ạburude ạburude phọ ạna mookpomoghi bọ oseere kꞌarodon, kotool li ọsighiogh okeelom Bạbilonia. Rꞌịyaar kósugheeny.

⁷Buniin alephiri ạnmuny phọ nạ kạmar bọ kosiphi ni ọḍuanam kụ opooghi kụ ọtol ghan okumu sịphe ogiga ogbogh ọdaam mọ ạBabilon.”

⁸Ẹnaghanam ạHezekaya ọdaam mọ, mọ ẹepho rꞌedughom kẹtol li mem aghuḍum ọno, kụ ạphagharanaan mọ, “Adom kꞌỌmoogh-we phọ nạ uruomaan bọ ịmi ẹnighe ni.”