Read abua Azaya 41 Bible Online

Azaya 41 - abua bible

Azaya 41

¹Ẹnaan rẹḅem ghan mọ, “Iḅoorian kụ ẹnaghan, nyina arere ạreekela arikpisi! Iikolobian ọgba ạsiagba anyina erugh ịiruen; nyina kẹmoogh ni eepoogh ọghaaph. Itu ookpomoghan ọmiin ọlo erugh egheel.

²“Ạnhian kụ ạpham bọ oghelegbe ẹgham mọ ẹpe emitenom erumuḍio phọ arumom kụ raḍighi ghan bọ ịdi ọdi kạkpar apu tọrobo ekpisi lọ odi ạghi ẹgham? Ạnhian kụ rạngo ghan bọ nyọdi ọkpar opu ạbudaam rꞌareelhe phọ? Elhool ẹgham ọdi regim ghan bịdi kelher ude mụdi ophugh. Ịkpina ọdi rẹwalawalami ghan bịdi mụdi ịpherepher mem ookuugh.

³Ọdi raporogh ghan kạdaph bịn ịyaar iḍighi, kụ raagborion ghan iboom dị ude ụ́ḅogh!

⁴Ạnhian kụ aḍighi bọ ịyaar phọ ịphen phọ emite bọ? Ạnhian kụ rạtooghi ghan ịlo igbaany ḍi emite? Mị Ọmoogh-we phọ ụrol li sịphe kꞌemiighom, kụ mị Ọmoogh-we phọ kạtol li sịphe kꞌekureriom.

⁵“Awe ạreekela arere mọmiin ni ịdi mị maḍighi; Bịdi rokiilaan ni kophiigha rꞌoḅio dị rakaph. Kụ bịdi ookpomoghan kụ oru.

⁶Awe ẹmaar ọlogh ḍịghaagh kụ ọkparamian iloghi ạbidi.

⁷Ọkaam-ạmaka ạḅeni oye ọlhem agol mọ ‘Maḍighi.’ Oye dị rakul ẹkaaneen ẹmugh phọ mọ ẹḅonan ạkparami ologhi ọpo rạkan ghan bọ iḍugh phọ. Bịdi rọḅem ghan mọ, ‘Ọozaghami ạmama phọ otulughi ạnighe ni’ — kụ bịdi ọkanagh iḍugh ẹkaaneen ẹmugh phọ ọmeremi.

⁸“Nyina kụ otelhedom mọ ạmi, nyina kụ awe phọ Ịzirel mị mạsaḅar bọ, ạnmuny ạnmuny phọ Ebraham, ọyaghiri phọ ạmi.

⁹Mị ịsighe ni inyina kꞌẹpe aruukuna aḅirini phọ kụ aru; mị ịmagh inyina kꞌạreekela ạrughulukul kụ ịḅeni inyina mọ, ‘Nyina abutelhedom ạmi.’ Mị inyina íghel, kụ ịsaḅar inyina.

¹⁰Kẹ́moogh oghiilaan — mị odi ni rꞌanyina! Mị kụ Ẹnaan anyina — rꞌịyaar inyina kị́degh! Mị kaḍighi ịdi nyina kẹmoogh ịikpo kụ ịngo inyina ẹloghonaan! Mị kiiko ni inyina kụ ịphel inyina.

¹¹“Bụphe rịghagham bọ inyina ophin ologhi phọ kolegheri roofola oye lọ ameel ẹgham. Bụphe eenan bọ rꞌanyina komuughu ni

¹²kụ oḍigh ighu.

¹³Mị kụ Ọmoogh-we Ẹnaan phọ anyina; Mị ịkparami inyina kụ ạḅem mọ, ‘Kẹ́moogh oghiilaan; mị kạlogh ni ḍịghaagh.’”

¹⁴Ọmoogh-we phọ rạḅem ghan mọ, “Nyina awe Ịzirel dị oghom kụ ịnyaam ụ́moogh, kẹ́moogh oghiilaan; mị kịlhoghonaan ni inyina ḍịghaagh. Mị Ẹnaan Iigbia phọ Ịzirel, mị kụ rịphel ghan bọ inyina.

¹⁵Nyina kẹkigh ni ịdipho okpooghi ọponyonom ịbiakpa rꞌimoom ịsiosio iḍugh dị ọkanagh. Nyina kẹponyon ruugum epiemi; kụ ạraaḅaraph phọ eetughuḍian eten ophugh.

¹⁶Nyina ketebeeny ghan bịdi ẹkiom ạnyu, kụ ookuugh phọ ạpam bịdi ạḍuanam, kụ oghim mọ ạwalawalami bịdi. Kụ ologhi anyina ạḅaal loor esi dị mị kụ Ẹnaan phọ anyina; nyina kịseph ni ịmi, Ẹnaan Iigbia phọ Ịzirel.

¹⁷“Mem dị awe phọ ạmi ọrol dọl ẹkparam kụ rọwa mụum, mem dị ạroḍogh ạbidi ẹgharaghar loor ẹphuom ạmuum, pọ kụ amem dị mị Ọmoogh-we phọ kạnaghanan ịiḅereghi ạbidi; Mị Ẹnaan phọ Ịzirel kạ́ḅitonaan bịdi.

¹⁸Mị kamiteghom ni rịphiiny ạmuum akilogh sịphe ikpokolo ạraaḅaraph phọ kụ ạruunu adir ekilogh sịphe ariḍiiny phọ. Mị kakiton de ịisaar atene raphaaph ạmuum kụ ạḍigharaghar ade eten rụunu adir dị rekil.

¹⁹Mị kaḍighi ịdi ạrasaga kesi de ịisaar phọ, ḅịle rꞌireeny-ạmayagh rꞌaramamaam kꞌạke rꞌọliv. Ạruukpua kemite ni de ọkpagha, rụukpua ireeny ạpain, rꞌajunipa rꞌasaipres.

²⁰Awe kọmiin ịphen phọ kụ olegheri mọ mị Ọmoogh-we phọ kụ maḍighi. Bịdi kolegheri ni mọ Ẹnaan Iigbia phọ Ịzirel kụ meḍighi emitiom.”

²¹Ọmoogh-we phọ, ọdaam mọ Ịzirel, kụ rạḅem ghan ịduon: “Nyina aruru areelhe phọ, ịgba ḍighiton phọ anyina. Ịgba emitiom ịkar igey ipakian lọ nyina ẹmoogh!

²²Itu sịen ẹghaaph ịlo kemite, ẹrol dị yoor olegheri mem dị emite. Ịkaaph egananami ẹḅeni bụo ịiruen rạraar ịpe emite bọ mem dị eten, kụ ịḅeni iyoor ẹmhu phọ.

²³Ịḅeni iyoor ịlo retu ghisigh — kụ yoor olegheri mọ nyina ạrumugh ni! Iḍighi egey ịyaar mụghumo imananaany, ọbo ịngo iyoor oghiilaan rꞌaḍiigu!

²⁴Nyina rꞌoomo ịlo nyina eḍighi oopho ni bịn; ooseeny ghan anyina eḍighi ni ḅạphanya.

²⁵“Mị mạsaḅar ri oye dị arugh ẹpe emitenom erumuḍio phọ; mị kạpam ni nyọdi atumom kụ ạḍua ẹpe ephunom mọ azuom ẹgham. Ọdi rạazeghi ghan bupoghom mụdi ọogha, ịdipho ọlhemom aroko rạazeghi ghan bọ ẹḍaany.

²⁶Ạnhian ọnyo anyina kụ arue alegheri mọ ịphen kemite, Ọbo ọḅem mọ nyina ịghaaph ni? Rꞌoniin ọnyo anyina ọ́ḅa ẹḍogh dị ẹghighimaam; oye ọ́naghan ḍụghum ọnhu anyina.

²⁷Mị Ọmoogh-we phọ kụ ọḅel dị ạḅeni Zạyon iphirigba phọ; mị urom ni otelhedom mọ ạghi Jeruselem ạḅeni mọ, ‘Awe anyina rotu ni! Bịdi rotigheel ẹmha!’

²⁸Mem dị mị aphogh oomo aruru phọ, rꞌoniin ọnyo ạbidi ọ́moogh ịyaar ọghaaph; rꞌoniin órue ọphagharanaan asipuru phọ ạmi.

²⁹Oomo ạrumugh phọ ịphen oopho ni bịn; bịdi kótue oḍighi ịyaar rꞌẹnum, ịkaaghineen ạrumugh phọ ịphen edugh kụ ịikpo ị́moogh.”