Read abua Azaya 44 Bible Online

Azaya 44 - abua bible

Azaya 44

¹Ọmoogh-we phọ rạḅem ghan mọ, “Iler rụru ẹnaghan nyịidipho, Ịzirel abutelhedom mọ ạmi, we ạmi dị ọsaḅar, ạnmuny ạnmuny ạJekob.

²Mị kụ Ọmoogh-we phọ ịlhem bọ inyina; kꞌamem mọ ịmar bọ inyina mị mịlhoghonaan inyina ḍịghaagh. Kẹ́moogh oghiilaan, nyina abutelhedom ạmi, we ạmi dị ọsaḅar dị mị ạphomoghian.

³“Mị kạngo ni mụum de lọ ạmuum úlho kụ mị aḍighi ịdi ạmuum kakilogh sikol ạḍigharaghar ade Mị kaakuom uwaloor ạmi nmụny anyina rꞌạḍiseph ạmi nmụny ạnmuny anyina.

⁴Bịdi koḍum mụdi ạroogho dị rooḍuom ghan mụum, mụdi ịsamom ọgbal arokol dị ạmuum rakiil.

⁵“Oniin atum nyoniin, awe kọḅem ni mọ ‘Mị ọlo Ọmoogh-we phọ.’ Bịdi kotu ọḅophan rꞌawe phọ Ịzirel, Tọrobo oye kạge ḍien Ọmoogh-we phọ ẹgba ạḍighaagh ọdi kụ akola mọ ọno oniin oye Ẹnaan.”

⁶Ọmoogh-we phọ ọpo ạda bọ kụ raako bọ Ịzirel, Ọmoogh-we oomo ịikpo phọ kụ rạḅem ghan ịduon: “Mị kụ ọḅel, okureriom mọ kụ egina Ẹnaan; ẹnon ẹmugh ílho ipel ịmi.

⁷Ọnon oye mutue ni aḍighi ịpe mị maḍighi bọ ḍụghum? Ạnhian kụ mutue ạmiin uḍien oomo ịphen mimite bọ kꞌẹkaraghi emiighom kụ esi ekureriom amem mọ?

⁸Kẹ́moogh oghiilaan, we ạmi! Nyina elegheri mọ kꞌageedi kụ ẹteeny nyịidipho mị mạmiin ni uḍien oomo ịpe kemite bọ kụ nyina ạbugbaanaan ạmi. Ẹnon ẹmugh edi ni ḍụghum? Ẹnon ẹmugh dị ẹmoogh ịnyaam dị mị kọ̋naghan edi ni ḍụghum?”

⁹Oomo ạbulo rọkaaghi rụmugh pọ ighiil awe ni bịn, kụ aruru phọ bịdi ọmanami bọ mạar phọ oopho ni bịn. Bụphe rooseeny ghan bọ ịkaaneen ạrumugh phọ ịphen eten rọ́miin ghan kụ mạar úlegheri — kụ koofolomi ni bịdi.

¹⁰Ị́nighe ọlhem ạmama kụ ooseeny mọ ẹmugh!

¹¹Tọrobo oye lọ raaseeny ghan ịpe phọ koofolomi ni. Awe ni bịn kụ rọkaaghi ghan bọ ạrumugh phọ, kạ́kiro. Ẹnighe dị bịdi kosoor erugh ịiruen — koseere bịdi dọl oḅio-kakaph kụ ọmoogh roofola.

¹²Ọlhemom ạmama ạsighe opoḍi ạmama kụ ạazaghamiom nịan aḍighinom oḍighi ọdi. Aḍikakara ạḍighaagh phọ ọdi ephoophe ọkanam mọ kụ ẹgurogh ạmama phọ eelemi. Ịdipho ọdi raḍighi bọ, ọkoony rasiph, ạmuum rạpu kụ aloor medugh.

¹³Ọkaam-ạmaka kạtooghi oreeny phọ. Ọdi ạsighe eekpoogh ameleph ạge amitiom ịyaar ooseeny phọ, apogh ạka ạkighemi oye, ịma oye dị koseere otu kꞌọdi.

¹⁴Iini sịen ọdi aler ọsaga kụ ạkaam, ḅịle iini oreeny ạḍiogh, rꞌạpain ẹekpua kụ ạkaam. Ḅịle iini ọdi ạzuph ọnon ọdo oreeny kụ akori mọ ọlophia aḍume.

¹⁵Oye rạsighe ghan ekulha oreeny kạkpooniom nịan, kụ ạsighe ẹnon ekulha kạkaam ịyaar ooseeny. Ạsighe ẹnon ekulha kẹn ọdi ạkpooniom nịan ọonma rꞌoḍighinom ạbred; kụ ḍịeri phọ ạkaam ẹmugh kụ aaseeny ghan.

¹⁶Iniin ipoḍi oreeny phọ ọdi ạkpooniom nịan; ọdi ạpophoghi ritigh ẹnam, ạba ilo ẹgbaanyan nyodị. Ọdi rạanma nịan kụ ạḅem mọ, “Pọ eeghe ịdi rꞌẹdugh ọonma! Pọ eeghe ịma ạnian!”

¹⁷Riisi oreeny phọ lọ esugha ọdi ạkaam ẹmugh kụ azumerinaan ẹmhu ạngo kụ aaseeny. Ọdi ạaḅereghi ạngo kụ ạḅem ghan mọ, “Nạ kụ ẹmugh ạmi — ụphel ịmi!”

¹⁸Ọdo awe phọ ạbuphe ọmoogh elologhi dị úlegheri ịpe bịdi roḍighi bọ. Bịdi opua riḍien ọsighe iloghi ạbidi esi igey phọ.

¹⁹Ọpo rạka ghan bọ ẹmugh phọ ọ́moogh epul rꞌọony ologhi ọḅem mọ, “Iniin ikulha ireeny phọ mị uguom nịan aḍighinom ạbred iiḅu ạnian kụ mị ạphophoghiom ritigh ẹnam kụ ạa. Kụ ịpheri arukulha phọ mị ạkaam ẹmugh ooseeny. Sịen phọ mị azumeri ẹmhu rạngo ẹbogolo ekulha oreeny!”

²⁰Eḍeenaan ologhi ịdi kọtomaam oye lọ rạlaay ghan ọoru. Ịitughian élegheri-ịyaar phọ ọdi mebi nyọdi ịdi ịlo ọphel ílho. Ọdi kátue ameera mọ ẹkaaneen ịyaar phọ ọno ạpham bọ ḍịghaagh kẹ́mugh ni bịn.

²¹Ọmoogh-we phọ rạḅem ghan mọ, “Weye Ịzirel, ịitughian ịphen; ilegheri mọ nyina abutelhedom ạmi. Mị ịlhem inyina oḍighi abutelhedom ạmi kụ mị inyina kíwula.

²²Mị magbuurogh ịkaraph anyina ạsighe mụdi ọotu. Iḅula esi ạmi; mị kụ ọpo rịphel ghan bọ inyina.”

²³Ịlo ḍịolho iboh, nyina ạsike! Ịlo, riisi aḍigher ịsien ade phọ! Ịlo ḍịolho iboh, ruugum rꞌạtorobo oreeny ẹekpua phọ! Ọmoogh-we phọ maḍeenaan ni igbogh phọ ọdi esi ọphel Ịzirel awe phọ ọdi.

²⁴“Mị kụ Ọmoogh-we phọ, ọpelia phọ anyina. Mị kụ ọpo ịlhem bọ inyina. Mị kụ Ọmoogh-we phọ, ọlemom oomo ạraraar. Ogina ạmi kụ ụreghe bọ sịke phọ; mem mọ mị ạlhem bọ de phọ, oye ịmi ḍịghaagh ụ́loghonaan.

²⁵Mị ạmagh élegheri-ịyaar we ịmiin ạḅile ạpue ịmiin awe dị ọtuugha ịlo ạraanaan ạsike. Ikpo ọnhu awe olegheri ịyaar phọ mị ạparanaan kụ aḍeenaan mọ olegheri-ịyaar ạbidi elologhi.

²⁶Kụ mem dị abutelhedom ạmi ọmiin uḍien, mem dị mị arom ọokpaany ọghaaph omitiom ịpe mị ragbiighi bọ, Mị raḍighi ghan igbiighi phọ rꞌịmiin phọ kamitiom. Mị ạḅeni Jeruselem mọ awe kọḅile ni otugh sịphe phọ, kụ ạramha phọ aJuda kẹḅile ni eḅula ḍigbogh ạdol phọ ạbidi. Rạmha phọ ịphen mophiemi bọ kọḅile ni ọloghoḍi oselemi.

²⁷Esi eniin ekpo ọnhu ịtooghi ạmi, bịn mị ạkaragharami otu-ḅualhe phọ.

²⁸Mị ạḅeni Sạiros mọ, ‘Nạ kụ kuphoghonaan ni ịmi; nạ kaḍighi ni ịlo mị ạḅeni nyịna oḍighi; nạ kạto ạngo mọ oselemi ẹmha phọ aJeruselem kụ ophighi ephighiom Otu Ịiḅereghi phọ.’”