Read abua Azaya 45 Bible Online

Azaya 45 - abua bible

Azaya 45

¹Ọmoogh-we phọ mạsaḅar Sạiros mọ aḍighi ọdaam! Ọdi mạsaḅar nyọdi mọ ạkpar apu reelhe; ọdi ratom nyọdi mọ ạanyi bụdaam ịikpo ạbidi. Ọmoogh-we phọ kakunyonaan rụnhu-aḍibuo ạramha nyọdi. Ọmoogh-we phọ ạḅeni Sạiros mọ,

²“Mị rꞌaloor kaseleminaan ni nyịna eten ạna, aalemi yogh ruugum rꞌạraaḅaraph. Mị kaḅomoghi rụnhu-aḍibuo lọ oḍighinom enaba kụ abunughi iiḅeneghiom lọ oḍighinom okuron.

³Mị kạngo nyịna ruphua dị ẹḍua riisi ịbooghian ufiri kụ eru; kụ nạ alegheri mọ mị kụ Ọmoogh-we phọ, kụ mọ Ẹnaan phọ Ịzirel mẹmagh ḍien ạna gai.

⁴Mị ạma nyịna ọloghonaan ạḍighaagh butelhedom mọ ạmi Ịzirel, we phọ mị mạsaḅar bọ. Mị mạngo nyịna eghuan dị ẹbugh, ghạlamo ịduon nạ ịmi úlegheri bọ ni.

⁵“Mị kụ Ọmoogh-we phọ, ẹnon ẹmugh ílho. Mị kạngo nyịna ịnyaam mọ nạ rạwa bọ, ghạlamo ịduon nạ ịmi úlegheri bọ ni.

⁶Mị raḍighi ịphen phọ ẹrol dị tọrobo oye, emiigh eniin eekuna aḅirini phọ kụ esi nyẹeri phọ, alegheri mọ mị kụ Ọmoogh-we phọ kụ mọ ẹnon ẹmugh ílho.

⁷Mị ạlhem ḍịḅaal rꞌufiri; mị ạngo ḍịseph rꞌịiḅaghami. Mị Ọmoogh-we phọ kụ uḍighi oomo ạraraar phọ ịphen.

⁸Mị kạsighe ọkpar opu kꞌẹpe ạke atu ịdipho ọlophia; ade phọ kekughuronu ni ọsighe kụ ẹereegh aḍiiḅi ạdol aruukuan eepaany. Mị Ọmoogh-we phọ kaḍighi ni oomo ịphen phọ.”

⁹Oko mạpakian ghan ni rꞌoye phọ ạlhem bọ nyọdi ḍụghum, oko dị ạrol ịdipho ịpheri phọ? Ạḅay phọ mapuru ghan ni ọlemom aroko mọ nạ raḍighi ghan eeghe? Oko phọ mạnun ghan ni mọ ọlemom mọ ọ́maar ọlhem ḍụghum?

¹⁰Ọony mapuru ghan ni ọde rꞌonhiin ọdi mọ, “Eeghe kụ nyina imitiom bọ ịmi ịduon ḍụghum?”

¹¹Ọmoogh-we Ẹnaan Aruukuan phọ Ịzirel, ọpo rapogh ghan bọ ịlo edi ghisigh phọ, rạḅem ghan mọ, “Nyina ị́moogh elhiom opuru ạmi ḍipuru ịlo ạnmuny ạmi, ḅịle mꞌọḅeni ạmi ịlo mị kaḍighi!

¹²Mị kụ ọpo ạlhem bọ de phọ kụ ạlhem oye mọ ạghelom; Mị ụsighe ịikpo ạmi kụ ạlhemom bọ sịke phọ; mị rạpamaghan ghan erumuḍio phọ, ụnwanyu phọ rꞌạraanaan phọ.

¹³Mị rꞌaloor maphighemi Sạiros oḍighi ịyaar omitiom, ọdaphan igbiighi ạmi kụ osereghi ạraraar ịlo ẹnighe. Mị kaalemi tọrobo oḅodo lọ ọdi katelhe. Ọdi kạḅile aselemi Jeruselem ẹmha phọ ạmi kụ amiteghom we ạmi dị odi ikoli ẹgham. Oye nyọdi óphir, ḅịle óti nyọdi ọman oḍighi ịphen phọ.” Ẹnaan Oomo Ịikpo phọ, Ọmoogh-we phọ, kụ ạghaaph.

¹⁴Ọmoogh-we phọ rạḅeni ghan Ịzirel mọ, “Ẹelha phọ Ijipt rꞌạSudan keḍighi ẹlo anyina, kụ iiphopha awe phọ aSeba koḍighi rẹbene anyina; bịdi kịdaph ghan inyina oniin atum nyoniin. Bịdi kozumeri ghan ẹmhu ghisigh anyina kụ ọḅem mọ, ‘Ẹnaan edianaan rꞌanyina — ọdi bịn kụ Ẹnaan.

¹⁵Ẹnaan phọ Ịzirel, ọpo rạpel ghan bọ weye phọ ọdi, eḍighi Ẹnaan dị ạaghi loor ọdi.

¹⁶Bụphe rọkaaghi ghan bọ rụmugh komeelom ni umugholoor, koofolomi ni oomo phọ ạbidi.

¹⁷Kụ ọlo Ọmoogh-we phọ mạphel li we phọ Ịzirel, kụ ọkpar opu phọ ạbidi kạtol kꞌagee-pọ; kótue oofolomi bịdi.’”

¹⁸Ọmoogh-we phọ ạlhem bọ sịke phọ — ọdi kụ ọpo aḍighi bọ Ẹnaan. Ọdi kụ ạḅol kụ ạlhem de phọ — ọdi ạkparami ịdi kebia. Ọdi óḍighi esi ọkpagha kụ aḍighi esi dị awe kọtol. Ọdi kụ rạḅem ghan mọ, “Mị kụ Ọmoogh-we phọ, kụ ẹnon ẹmugh ílho.

¹⁹Mị kọ̋ghaaph ghan ịyaar reten ịbooghian, mọ ạaghi igbiighi ạmi. Mị ụ́wa mọ awe Ịzirel ụwa ịmi ekpisi dị eḍighi ọkpagha. Mị kụ Ọmoogh-we phọ kụ mị rạgba ghan igey; mị raḍighi ghan ịlo awe kolegheri ịpe eru bọ elhiom mọ.”

²⁰Ọmoogh-we phọ rạḅem ghan mọ, “Iikpomoghan, weye areelhe phọ, oomo ạbuphe okpetenaan bọ mem mọ emeel ọmar phọ, emiteghom siloor anyina esoor erugh ịiruen! Bụphe rọsaram bọ ịkaaghineen ạrumugh phọ ạbidi kụ rọoḅereghi ghan rụmugh dị kétue ẹpel bịdi — awe phọ ạbuphe ịyaar úlegheri rꞌẹnum!

²¹Itu ẹgba sighiton phọ anyina sịphe otu ịiruen; nyina ạbuphe rẹpakian bọ eepuruan sịagba phọ. Ạnhian kụ ạmiin bọ uḍien kꞌamem dị meten ịyaar dị kemite? Kạ́mi Ọmoogh-we Ẹnaan phọ rạpel ghan bọ we phọ ọdi ḍụghum? Ẹnon ẹmugh ílho.

²²“Ikiton isoman ịmi nyịidipho, kụ ẹmoogh pẹleeny, we oomo aḅirini phọ! Mị bịn kụ egina Ẹnaan phọ edi ghan bọ.

²³Oguan ạmi pọ ịne phọ ni ọkpe ólho ghan kụ kónme. Mị akunya esi aḍien phọ ạmi rꞌoomo ịpe mị ạman bọ: Tọrobo oye katu kụ akpuḍian ghisigh ạmi kụ akunya mọ ọno kaler ri loor ọdi ụngo ịmi.

²⁴“Bịdi kọḅem ni mọ esi ạmi bịn kụ ẹdi kọmiin ọkpar opu rꞌịnyaam; kụ ọlo oomo ạbulo ụlhogh ịmi ḍien kozuan ni roofola.

²⁵Mị Ọmoogh-we phọ kạtagharan ni oomo ẹemara ẹemara phọ ạJekob, kụ bịdi ụngo ịmi ḍịseph.