Read abua Azaya 49 Bible Online

Azaya 49 - abua bible

Azaya 49

¹Ịnaghanan ịmi, reelhe dị ẹkelogh, nyina awe phọ edi bọ rikpisi dị ẹkel! Tụtu kụmar bọ ịmi, Ọmoogh-we phọ mụsaḅar ri ịmi kụ ụma ịmi oḍighi otelhedom ọdi.

²Ọdi aḍighi ịdi ikpo ọnhu ạmi ẹsiosio ịdipho elhool ẹgham. Rꞌạḍighaagh ọdi kụ ạmaar ụphamam ịmi. Ọdi ụkpol ịmi ịdipho ẹkpina dị eroph kụ ẹnighe ọrapham.

³Ọdi ụḅeni ni ịmi mọ, “Ịzirel, nạ otelhedom ạmi; loor ẹmhu ạna kụ uboom ni ịmi.”

⁴Mị ụḅem mọ, “Mị makumuan ni, kụ epe ni oopho bịn! Mị mạman ịnyaam ạmi, kụ ịyaar úḍighi umitiom.” Ghạlamo ịduon phọ bịn mị aḍuom ni ologhi Ọmoogh-we phọ dị kụmeeranaan ni ịmi; ọdi kuunmo ni ịmi ruunmo esi ịpe mị aḍighi bọ.

⁵Tụtu kụmar bọ ịmi, Ọmoogh-we phọ mụma ni ịmi; ọdi uḍighi ịmi otelhedom ọdi ọsighe awe phọ ọdi oḅulemi, ọsighe oḅulemi awe Ịzirel phọ ọdi ọwalala bọ. Ọmoogh-we phọ rughueni ghan ịmi eghuan; ọdi kụ azin ịnyaam ạmi ẹḍua ghan retu.

⁶Ọmoogh-we phọ ụḅeni ịmi mọ, “Mị ạmoogh ni oḍighi dị ạbugh apu sịen, dị nạ kuḍighinaan ịmi. Nạ kaḅulemi dọl igbogh we phọ Ịzirel mọwalala bọ, kụ mị kạḅile aḍighi nyịna ḍịḅaal areelhe phọ — ẹrol dị oomo aḅirini phọ ọmoogh pẹleeny.”

⁷Ẹnaan Iigbia rꞌỌpelia phọ Ịzirel rạḅeni ghan nyọpo ọkaraghi bọ ọḅitonaan, ọpo areelhe phọ ọlhogh bọ ḍien phọ kụ aḍighi bọ otelhedom ạbudaam mọ: “Ạbudaam kọmiin ni ịdi moseere nyịna, kụ oḅerenu ọngo ạna rughuenian; ịkpana ạnmuny ạbudaam kẹn bịn kọmiin ni, kụ bịdi kozumeri rụmhu ọngo ạna eghuan.” Ịphen phọ kemite loor esi dị Ọmoogh-we phọ mạsaḅar ri otelhedom ọdi; Ẹnaan Iigbia phọ, Ẹnaan phọ Ịzirel reḍighi ghan ni kemitiom ịlo ọdi aguanaan.

⁸Ọmoogh-we phọ rạḅeni ghan we phọ ọdi mọ, “Mem dị amem mọ ẹteeny ọphel anyina, mị kịlogh ni inyina ịse ạḅile ạnaghanan emoghi ẹloghonaan phọ anyina. Mị kịpham ni iiko inyina kụ ạtuan ẹmhu anyina kụ akiran ịyo rꞌawe oomo areelhe phọ. Mị kaḍighi ịdi nyina kẹḅile ẹmoogh dọl sịphe ade phọ anyina reten bọ ọkpagha.

⁹Mị kạḅeni bụo ikoli phọ mọ, ‘Ikeel rꞌẹereegh’ kụ bụphe odi bọ dọl ufiri phọ mọ, ‘Itu ẹphen ạḍiḅaal phọ!’ Bịdi kọkigh iyool-ịga dị rẹḅal ịḅal sịphe ạraaḅaraph phọ;

¹⁰Bịdi kọ́tol ọkoony eḍien mꞌẹphuom ạmuum. Ẹghologhol ogogo rꞌẹlo ịsiphe ade ịisaar phọ bịdi kéḍighi mạar, ịdi eḍighi bọ oḍiemiom mọ ạpomoghian ni bịdi. Ọdi kaḍiemiom bịdi ạkimom rụunu adir.

¹¹“Mị kạkoghoron oḅodo ạḅeenye rạaḅaraph phọ kụ aḅol eten dị awe ạmi kotelhe.

¹²Awe ạmi kọḍuaghu rikpisi dị ẹkelogh kụ otu, kꞌẹpe ephunom mọ rꞌemeelom erumuḍio phọ, kụ emiigh Ạsuan ẹpe esoorom mọ.”

¹³Ịmoor sụor, sịke phọ! Ịlo ḍịolho iboh, de phọ! Aruugum mọ elataan ḍụor! Ọmoogh-we phọ kạadereghi ni we phọ ọdi; Ọdi kạmoogh ni ọnma ighirigiir esi awe phọ ọdi rọmiinom bọ.

¹⁴Kụ ọlo awe phọ aJeruselem ọḅem mọ, “Ọmoogh-we phọ mughinom iyoor! Ọdi muwula iyoor.”

¹⁵Kụ Ọmoogh-we phọ ạpagharanaan mọ, “Onhiin katue ni abula mọony ọdi dị rạmaam ḍụghum, kụ kạ́pomoghian mọony phọ ọdi kụ ạmar bọ ḍụghum? Ghạlamo onhiin kabula ni mọony ọdi, mị inyina kíwula.

¹⁶Jeruselem, mị nyịna káwula! Mị mạge ḍien ạna rạda ạraghaagh ạmi.

¹⁷“Bụphe koselemi bọ nyịna ọnuun ni rotu dị kébia kụ bụphe ophiemi bọ nyina kọḍua ni.

¹⁸Pogh aaghironom kụ ạmiin ịdi remite! Awe phọ ạna rookpomoghan — bịdi rotigheel ẹmha ạbidi! Ịdipho mị kụ aḍighi bọ Ẹnaan dị edi ghan eye, nạ kabagaam ni we phọ ạna, ịdipho ọnyani dị rạbal ilhom rabagaam ghan bọ ịbekulari phọ ọdi.

¹⁹“Eelhe phọ ạna uugulemi ni kụ otene ọkpagha — kụ nyịidipho kekom ẹpughan dị kẹ́manam dị bụphe rotigheel bọ kotugh. Kụ bụphe oogulemi bọ nyịna ọman kọsighe ni ọkele loor ạna.

²⁰Awe phọ ạna ọmar bọ dọl ikoli ẹgham mọ kọḅeni ni eniin aḍio mọ, ‘Ade phọ ạḍien ekom ẹpughan — yoor rọwa esi dị ẹetool orugh!’

²¹Pọ kụ amem dị nạ kạḅenian loor ạna mọ, ‘Ạnhian kụ ụmaranaan bọ ịmi oomo ạnmuny phọ ạbuen? Ạnmuny ạmi umuughu ni kụ mị ụ́moogh mun. Uphorogh ịmi uroph ịmi ọlogh ikoli ẹgham — ạnian kụ aakonom bọ nmụny phọ ạbuen aḍume? Ụwile ogina ạmi bịn — ạnmuny phọ ạbuen ụḍua ẹghen kụ oru bọ?’”

²²Ọkar Ogbogh Ọmoogh-we phọ rạḅeni ghan we phọ ọdi mọ, “Mị kạyapha reelhe phọ, kụ bịdi kọsighe ni nmụny phọ anyina otigheelom.

²³Ạbudaam kọtol ịdipho ạburude esi anyina; ạrukueni kọtol ịdipho aburunhiin. Bịdi kozumeri rụmhu risigh anyina kụ ịlogh inyina eghuan; bịdi kosooromi loor kụ ịngo inyina eghuan. Pọ kụ amem dị nyina kelegheri mọ mị kụ Ọmoogh-we phọ; oye ólho dị rakori pẹleeny ạmi kụ kạmoogh mabi.”

²⁴Oye katue ni ạsighe ạḍuanam ruphua dị ọlo ẹgham mawum ḍụghum? Oye katue ni ạtagharan we ikoli ḍịghaagh ọkaraph ọdaam ḍụghum?

²⁵Ọmoogh-we phọ ạpagharanaan mọ, “Ịdipho kụ ịdi kemite. Bụphe awe ẹgham mọ oseere bọ otu ikoli phọ, komiteghom ni, Ruphua phọ ọkaraph ọdaam mọ awum bọ, kozirion ni. Mị kabianan tọrobo ạbulo eenan inyina kụ mị ạtagharan nmụny phọ anyina.

²⁶Mị kaḍighi ịdi bụphe rịgbiphoghom bọ inyina kọzian siloor; ọko enu rꞌophin ologhi kekiigh ni bịdi ịdipho amiim rakiigh ghan bọ oye. Pọ kụ amem dị oomo awe ịsien aḅirini phọ kolegheri mọ mị kụ Ọmoogh-we phọ, ọpo rịphel ghan bọ inyina kịtagharan inyina. Bịdi kolegheri ni mọ mị kụ Ẹnaan phọ Ịzirel ẹmoogh bọ ịikpo phọ.”