Read abua Azaya 50 Bible Online

Azaya 50 - abua bible

Azaya 50

¹Ọmoogh-we phọ rạḅem ghan mọ, “Nyina egbi mọ mị ụsighe ni we ạmi ạḍuanam ịdipho oye dị aseere ạnir ọdi ḍụghum? Ạrinya ọgbaranaan phọ edi ẹghen nụun? Nyina regbi mọ mị kụ aal inyina mọ ịtol ikoli ẹgham, ịdipho oye dị aal nmụny ọdi mụdi ạrebene ḍụghum? Eeye, nyina kụ irelhe ni eḍigh ikoli ẹgham loor ịkaraph phọ anyina; ịsighe inyina ọḍuanam loor iilogh dị nyina esoroghu.

²“Eeghe kụ awe phọ ạmi ụ́naghanan bọ mem mọ mị ạghi bọ ọphel ạbidi? Eeghe kụ úmegheron bọ mem mọ mị ạmagh bọ? Mị adugh ni iboom ọphel ạbidi ḍụghum? Mị atue ni ạkaragharami mụum ọphiiny rꞌịto ạmi, ạḅile akiton rịphiiny atene de ịisaar pịdi ina phọ ẹrol bọ sịphe phọ emuughu loor ẹkuom ạmuum.

³Mị atue ni aḍighi okuaḍio phọ akiton abil mụdi dị ramoghi oye dị amugh.”

⁴Ọkar Ogbogh Ọmoogh-we phọ mụtughemi ịmi ịlo ọghaaph, ẹrol dị mị ạngo ịnyaam bụphe modugh bọ. Tọrobo ạḍiroor ọdi rụngo ịmi ẹephua ọnaghan ịlo ọdi kụtughemi ịmi.

⁵Ọmoogh-we phọ mụngo ịmi ọnaghanan ạḍughum, kụ mị kọ̋ḅaar ẹmhu, ḅịle kọ́ḍua loor ọdi.

⁶Mị ụgumom oopho ọman bụphe ukuphogh bọ ịmi; mị úkikima bịdi mem dị bịdi ruutuuny bọ ịmi, mem dị bịdi oruph ọleem ạmi kụ umurughiom ịmi ịghor.

⁷Kụ ọlo iikunya ạbidi esi ạmi ípin loor esi dị Ọkar Ogbogh Ọmoogh-we phọ rụngo ghan ni ịmi pẹleeny. Mị ụphama loor ạmi ọkparam. Mị alegheri mọ ịmi kúufolomi,

⁸loor esi dị Ẹnaan etuman ni, kụ ọdi ạḅem mọ mị úlegheri aani. Oye kạnya ni bịn ọkpalhagham ạmi ḍụghum? Ịyal phọ ayira osoor erugh ịiruen egina amem. Ọdi amitiom ịkpalagham mọ ọdi.

⁹Ọkar Ogbogh Ọmoogh-we phọ rꞌaloor ọdi kụ rụphel ghan ịmi — ạnhian nụun kụ kạgba bọ uphume ịmi? Oomo ạbuphe ụgbaam bọ ịmi ịkaraph ạsiagba phọ kosumughu ni; bịdi kope ni ịdipho ukpe lọ ịphelepheel elhe.

¹⁰Oomo anyina phọ eghueni bọ Ọmoogh-we phọ kụ ẹnaghanan bọ ikpo ọnhu otelhedom mọ ọdi, eten phọ nyina retelhe bọ iini kebil li iboom, kụ ịkpasi oḍuom ologhi anyina esi Ọmoogh-we phọ, ẹrol loor Ẹnaan phọ anyina.

¹¹Oomo anyina phọ emite bọ ẹkaraph ezue ophiemi ạbunon phọ, ezue phọ anyina kụ kiphiemi ni inyina. Ọmoogh-we phọ rꞌaloor kaḍighi ni ịphen phọ amitiom; nyina kẹmiinom ni ḍighiil ạdol.