Read abua Azaya 51 Bible Online

Azaya 51 - abua bible

Azaya 51

¹Ọmoogh-we phọ rạḅem ghan mọ, “Ịnaghanan ịmi, nyina ạbuphe rẹwa bọ pẹleeny phọ, nyina ạbuphe eru bọ esi ạmi ọwa ẹloghonaan phọ. Ịitughian ḍighiigh esi phọ nyina ẹḍua bọ emite, dọl aḍighiigh phọ iguph bọ inyina omitiom.

²Ịitughian Ebraham ọde ạburude phọ anyina rꞌaSera, ọophi phọ nyina ẹḍua bọ emite. Mem dị mị ạmagh Ebraham, ọdi mọony ọ́moogh, kụ mị ạngo nyọdi ḍịseph ạngo nyọdi nmụny. Mị aḍighi ịdi ạnmuny ọdi oḍiza.

³“Mị kaḍeenaan ọnma ighirigiir esi aJeruselem, esi oomo ạbulo odi ḍiigulaan ạdol sịphe phọ. Ghạlamo ade ạbidi ịisaar ri bịn, mị kaḍighi ịdipho oghoony, ịdipho oghoony phọ Iden mị ạzuph bọ. Iboh rꞌọḅaal ologhi kẹtolonaan ni bịdi sịphe phọ. Awe kọmoor ri sụor oboomiom rꞌọsephom ạmi.

⁴“Ịnaghanan ịmi, we ạmi, Ịnaghan ịpe mị kạḅem bọ: Mị ạngo ịtughemi ạmi reelhe phọ; iilogh phọ ạmi ketuomaan bịdi ḍịḅaal.

⁵Mị kạnuun ni atu ạpel bịdi; amem ọkpar opu ạmi mẹebeeph. Mị rꞌaloor kụ kạda reelhe phọ. Ạreekela arikpisi rekori ghan mọ mị utu. Awe phọ rokoriom rꞌoḍuom ologhi mọ mị kạpel li bụno.

⁶Ipogh ạnyu ẹpe ạsike phọ; ipogh de phọ! Ạsike phọ keḍigh ighu mụdi ạmughi; ade phọ kekpaghagha ịdipho ogbaany ukpe, kụ oomo awe phọ ọdi komuughu ni ịdipho ịphi. Kụ ọtagharan phọ mị kạsighe bọ atu kạtol kꞌagee-pọ; ọkpar opu ạmi kụ ekureriom.

⁷“Ịnaghanan ịmi, nyina ạbuphe elegheri bọ ịlo ẹnighe, bụphe ọkan bọ ịtughemi phọ ạmi iloghi phọ anyina. Kékiilaan mem dị awe rịgilaam kụ rịḅeni yogh inyina.

⁸Bịdi kope ịdipho ukpe lọ ịphelepheel melhe! Kụ ọtagharan phọ mị kạsighe bọ atu kạtol li kꞌagee-pọ; ọkpar opu ạmi kạtol ghan bịn.”

⁹Ḅetenu, Ọmoogh-we, ạlhogh ḍịghaagh! Sịghe ịikpo phọ ạna ụphelom iyoor; Ḍighinom ịikpo ịdipho amem ageedi phọ. Nạ kụ uugbo bọ rukulha Rehab nonom ọphiiny phọ.

¹⁰Nạ kẹn kụ uḍighi ịdi ạmuum ọphiiny phọ amoopha kụ amitiom eten sịphe ạmuum mọ, ẹrol dị bụphe nạ rạpel bọ ọḅeeny.

¹¹Bụphe nạ mạtagharan bọ kosi Jeruselem rꞌọḅaal ologhi, kụ ọmoor sụor rꞌịlooghi rꞌibo. Ologhi ạbidi kạḅaal li kꞌagee-pọ, dị mokpetenaan kꞌagee-pọ ọto rꞌokururu.

¹²Ọmoogh-we phọ rạḅem ghan mọ, “Mị kụ ọpo rịngo ghan bọ inyina ịnyaam. Eeghe kụ nyina rekiilaan bọ oye ịsien aḅirini phọ, ọpo rạ́kparam ghan bọ kapu rọogho?

¹³Nyina mewula Ọmoogh-we phọ ịlhem bọ inyina, ọpo ạreghe bọ sịke phọ kụ aphighi bọ de phọ ạkparami? Eeghe kụ nyina edi ghan bọ dọl oḅio-kakaph ọghagh ologhi ạbidi inyina kị́teeny mun, ạbuphe ọnya bọ ophiemi anyina? Ọkaraph ookuugh ạbidi inyina kạ́teeny.

¹⁴Bụphe odiighi bọ ikoli phọ kọnuun ni omiteghom; bịdi kọtol li ọkpo kụ ọmoogh tọrobo eḍien ịlo ẹphu bịdi.

¹⁵“Mị kụ Ọmoogh-we Ẹnaan phọ anyina; mị kụ raḅunyon ghan bọ ọphiiny phọ kụ aḍighi ịdi oologh phọ kamoogha. Ḍien ạmi ughol mọ Ọmoogh-we oomo ịikpo phọ!

¹⁶Mị kụ ụreghe bọ amitiom sịke phọ kụ aphighi bọ ephighiom ade phọ ạkparami; Mị ạḅeni Jeruselem mọ, ‘Nyina awe ạmi! Mị mịngo inyina ịtughemi phọ ạmi, kụ mị riiko ni inyina rꞌạḍighaagh ạmi.’”

¹⁷Jeruselem, sụma! Zạamian loor ạna aḅetenu! Nạ mạphugholom ẹgo ạmuum ẹliomom dị Ọmoogh-we phọ ạsighe ọghagh ologhi ạngoom nyịna ọphugholom; Nạ ạphughol ạmadan bịn amiigh ọbelebele.

¹⁸Oye oḍiemiom ạna ólho, rꞌoniin ólho sịphe aḍita phọ anyina dị kạpam ḍịghaagh ạna.

¹⁹Ịyal igbogh ịiḅaghami mesoorom nyịna: ẹgham mephiemi de phọ ạna, kụ awe phọ ạna odi ọkoony. Oye ólho ọseenyaan ạna.

²⁰Oomo ikol areten phọ awe phọ ạna rọkaaru yogh ghan loor ẹ́moogh ịnyaam. Bịdi rọkigh ịdipho ạrunuen dị emeel siphil ọnyo ịtaya. Bịdi molhoghoma ḍịkpar ophin ologhi phọ Ẹnaan.

²¹Nyina awe aJeruselem dị rọmiinom, nyina dị rẹbelebele mụdi amiim kụ rakiigh.

²²Ọmoogh-we Ẹnaan phọ anyina rieenaan ni inyina kụ rạḅem ghan mọ, “Mị rạsighe ẹgo ịminimiin phọ ẹpe mị ịngo bọ inyina esi ophin ologhi phọ. Nyina kẹ́pughol mun miim mọ raḍighi ghan bọ ịdi nyina kẹbelebele phọ.

²³Mị kạngo bụphe rịgbiphoghom bọ inyina, ạngo bụphe oḍighi bọ ịdi nyina emeleghu ude reten kụ ọozeghi mụdi nyina atopha.”