Read abua Azaya 52 Bible Online

Azaya 52 - abua bible

Azaya 52

¹Jeruselem, kpạrami loor ạḅile aḍighi ogbogh! Ẹmha iigbia phọ Ẹnaan, kpọloghian loor ạna ạsuoma ẹnighe! Ạbuphe Ẹnaan úlegheri bọ kóḍigh mun rụnhu-aḍibuo ạna.

²Pighemi loor ạna akpetenaan, Jeruselem! Ḅetenu sịphe ophugh phọ ạrolom ạgada ọdaam mọ! Weye ạZayon dị osiphi ẹgham, ịitoghonaan izime phọ ịkpooghiom bọ inyina!

³Ogbogh Ọmoogh-we phọ rạḅeni ghan we phọ ọdi mọ, “Mem mọ nyina ẹrol bọ dọl ạrebene, úkol ẹmhu anyina ụ́kpe oye ikpoki; ịdipho kẹn kụ ẹdi ikpoki kọ́kpe oseere anyina ẹereegh.

⁴Mem mọ nyina ẹghi bọ Ijipt ọrol ạdol aruuruen phọ, nyina iḍighi ịduon phọ rꞌophooph ologhi; kụ ọlo, bụo Asiria ịsighe ni inyina rꞌẹekpara ekpeḍien kụ úkol rụmhu anyina ọkpe rꞌịyaar.

⁵Kụ nyịidipho ẹpe Bạbilonia eniin phọ eḍighinom ịyaar phọ ni kụ imite: nyina meḍighi we dị osiphi ẹgham, kụ úkol rụmhu anyina ụkpe rꞌịyaar. Ạbudaam anyina rootuma ghan kụ kobaga kụ ịbadi amem uphogh ịmi ọḅitonaan.

⁶Mem dị retu nyina keloghoma ni mọ mị kụ Ẹnaan, kụ mọ mị mịḅeni ni inyina.”

⁷Pọ eeghe ịiḍaany ọmiin dị ọokpaany mạḍua ẹpe aruugum mọ ratu, dị ạphamam ooḅi ọghaaph phọ, ọghaaph ẹepho! Ọdi agbeelom ọkpar opu kụ rạḅem ghan Zạyon mọ, “Ẹnaan anyina kụ Ọdaam!”

⁸Bụphe rokori bọ ẹmha phọ rọlooghi ni, oomo ạbidi rọlooghiom rꞌibo. Bịdi ropogh kọmiin erigheel Ọmoogh-we phọ sịphe Zạyon!

⁹Ịlooghi ḍịolho iboh, iikpe phọ aJeruselem mọ olhereghi bọ! Ọmoogh-we phọ kạtagharan ni ẹmha phọ ọdi kụ ạadereghi we ọdi.

¹⁰Ọmoogh-we phọ kạsighe ni ịikpo iigbia phọ ọdi ạpelom we phọ ọdi, kụ oomo aḅirini phọ ọmiin.

¹¹Ịḍua Bạbilonia, oomo phọ ạbuphe ọphamagh bọ rạraar Otu Ịiḅereghi phọ! Kẹ́ḅogh ịyaar lọ ogbi; iseere siloor anyina dọl iigbia kụ ẹḍua.

¹²Mem mọ ạmuen nyina kẹ́ḍuanam rꞌephirighan; nyina kẹ́wa reten osuma. Ọmoogh-we Ẹnaan phọ anyina kiḍiemiom ni inyina kụ ạmaar iiko inyina ọman rꞌighisigh.

¹³Ọmoogh-we phọ rạḅem ghan mọ, “Otelhedom mọ ạmi kaḍighi ni oḍighi phọ ạlogh ẹmhu; kọlogh ni nyọdi eboom eghuan.

¹⁴Ịbadi awe ukperenom ni mem dị ọmiin bọ nyọdi; manmia bịn dị ụ́kigh mun oye.

¹⁵Kụ nyịidipho ịbadi areelhe kookia ni nyọdi, kụ ạbudaam mọ kọmaghagha yogh bịn esi aḍiigu. Bịdi kọmiin ni kụ ọnaghan ịyaar dị kꞌekulha kőlhegheri ghan.”