Read abua Azaya 53 Bible Online

Azaya 53 - abua bible

Azaya 53

¹Kụ awe phọ ọpagharanaan mọ, “Ạnhian kụ mameeraam dom mọ yoor ọpham bọ orumom nyịidipho? Esi ạnhian kụ ẹdi mogananami oḍeenaan Ọmoogh-we phọ sịen?

²Eḍighi ni igbiighi Ọmoogh-we phọ mọ otelhedom ọno aphoph mụdi ẹezupha dị ạsini rẹkpaph ude esi dị ạgharaghar. Ọdi óḍigh eghuan ọḅile ọnighe oseere ologhi okiton ophogh ekpeḍien. Ịyaar ẹephua sịphe loor phọ ọdi ị́tol; ịyaar dị kiḍur iyira etumeniom nyọdi ị́tol.

³Yira ughel nyọdi kụ ọḅitonaan nyọdi; ọdi ạkparam ni ịminimiin rꞌaḍiphin. Oye ólho dị ạwa ọmiin ọdi — yira ụḅitonaan ni nyọdi mụdi kị́yaar.

⁴“Kụ ọdi ạkparam ịminimiin dị miḍighi ịlo ayira, rꞌaḍiphin dị yira kụ muloghoma. Oomo amem mọ yira ugbi mọ ịminimiin phọ ọdi ạghelhe dị Ẹnaan kụ eruomaan.

⁵Kụ ụtuan ịkaraph phọ ayira kụ oḍighi nyọdi ịyaar, okuphogh nyọdi loor ạsipioghom ayira. Ịminimiin phọ ọdi ạmiinom bọ miikonom iyira, Yira momoonogh loor ịpe okuphogh bọ nyọdi.

⁶Oomo ayira ụghigh iyool-ịga dị ephe, oye ye ratelhe ḍio ọdi, kụ Ọmoogh-we phọ aḍighi ịdi ạghelhe phọ ameelom nyọdi, ạghelhe phọ ụkpe bọ iyira.

⁷ “Ukporoghom ni nyọdi rꞌigbagbaar, kụ ạkparam ni rꞌosooromi aloor; ọdi rꞌẹḍogh ọ́ḅa. Mụdi ọony oyool-ọga dị rọwa ọmeegh, mụdi oyool-ọga dị rọwa ọsam asuphuugh phọ, ọdi rꞌẹḍogh ọ́ḅa.

⁸Usiph nyọdi osophonaan ọoruen aḍuugh kụ ọsighe ọḍuanam oghiigh, kụ ị́kigh ịyaar esi oye ịlo kemitenaan nyọdi. Ụtuan ịkaraph awe phọ ayira kụ oghiigh bọ nyọdi.

⁹Ụlhogh nyọdi ologhi oḍi rꞌạbukaraph awe, kụ oḍiom nyọdi rꞌạraalha, ghạlamo ịduon ọdi mạar ụ́piom bọ ni ḅịle ọkpe ụ́gba bọ ni.”

¹⁰Ọmoogh-we phọ rạḅem ghan mọ, “Eḍighi ni igbiighi ạmi mọ ọdi ạmiinom; aḍuugh phọ ọdi eḍighi ẹkia ọsar ọwilenaan. Kụ loor ịduon phọ ọdi kạmiin ni ẹemara etum ẹemara phọ ọdi; ọdi kạmoogh ni kụudoony aghuḍum, kụ loor ọdi kụ ịpe mị rạwa bọ emite eganana.

¹¹Mem dị ạdol ịminimiin meten, ọdi kạḅile ni ạmoogh iboh; ọdi kalegheri mọ ọno ọ́pu bịn kụ ạmiinom. Ooḍighia otelhedom ạmi, ọdi ụḅeeraan ịmi, kạkparami ni ghẹlhe ịbadi awe kụ loor ẹmhu ọdi mị kạsar ri ạbilenaan bịdi.

¹²Kụ iḍighi kụ mị kạngo ni nyọdi dọl eghuan, dọl ọrolom sịphe igbo igbogh rꞌawe ịikpo phọ. Ọdi kụ ạḅogh ni ghuḍum ọdi ạngo kụ aphin aani bin ịiḅaghami rꞌawe ạsipioghom. Ọdi ạsighe esi ịbadi abuḍighinom ịkaraph kụ ạaḅereghi mọ ọbo ọsar ọwilenaan bịdi.”