Read abua Azaya 56 Bible Online

Azaya 56 - abua bible

Azaya 56

¹Ọmoogh-we phọ rạḅeni ghan we ọdi mọ, “Iḍighi ghan ịlo esel rꞌịlo eḍighi elhiom loor esi dị mị kạnuun ni ịphel inyina.

²Mị kạseph ni bụphe oomo amem rooko ghan ḍio ophooghian phọ kụ róḍighi ịlo ạteeny. Mị kạseph ni bụphe róḍighi ghan bọ ịlo eeph.”

³Ooruen lọ mạḅophan we Ọmoogh-we phọ kụ́ḅem mọ, “Ọmoogh-we phọ kámeera mọ mị rꞌawe phọ ooseeny nyịno.” Ophoony oye kụ́utughian ghan mọ loor esi dị ọno kátue bọ ạmoogh nmụny, pọ ọno kóniin ọlo kꞌẸnaan.

⁴Ọmoogh-we phọ rạḅeni ghan ọdo oye phọ ọphon mọ, “Eḍighi ịyaar dị nạ ughueni ni ịmi aako ghan ḍio ophooghian phọ kụ eḍighi ịyaar dị nạ aḍighi ịlo ịḅeeraan ịmi kụ ạphamanam ịyo phọ ạmi rꞌoomo ologhi ạna,

⁵pọ kọotughian ni ḍien ạna sịphe Otu Ịiḅereghi phọ ạmi rꞌịsiphe ogbo awe phọ ạmi kebia epu dị nạ mụmoogh nmụny alephiri rꞌạnmanyaan. Nyịna kówula mun.”

⁶Kụ Ọmoogh-we phọ rạḅeni ghan ruuruen phọ ạbuphe phọ okiton bọ oḍighi buniin awe ọdi, bụdi ọphomoghian nyọdi kụ oḍighinaan nyọdi iiḍighi, bụdi ooko ḍio ophooghian phọ kụ ọphamanam ịyo phọ ọdi rꞌoomo ologhi ạbidi mọ,

⁷“Mị kịsighe ni inyina ạki Zạyon, ẹeḅaraph iigbia phọ ạmi, ịngo inyina ọḅaal ologhi sịphe Otu Ịiḅereghi phọ ạmi, kụ ạsighe rịkia lọ nyina ẹphinyon ghan ạnyu enmeny phọ ạmi. Otu phọ ạmi kokol mọ Otu Ịiḅereghi oomo areelhe.”

⁸Ogbogh Ọmoogh-we phọ, ọpo mạsighe bọ we phọ Ịzirel ẹpe bịdi ọrol bọ ikoli ẹgham mọ arighelom, maguanaan mọ ọno kạḅile kẹn ạsighe bụnon awe atu ọḅaram bịdi.

⁹Ọmoogh-we phọ mạḅeni iiruen areelhe phọ mọ oru ịdipho ịnam eḍum ạa we phọ ọdi.

¹⁰Ọdi rạḅem ghan mọ, “Oomo abuḍiemiom mọ, bụphe ọkpe bọ ọphur ạruru we phọ ạmi, moḍighi we ikpom ariḍien! Bịdi ịyaar úlegheri. Bịdi ọkigh suogh okoriom otu dị régbophoghu ghan — bịdi rọmina ghan oomo amem kọmalha rạmalha. Pọ eeghe ịdi bịdi ọphomoghian rạlha!

¹¹Bịdi ọkigh suogh eeph ịkaraph dị rọ́moogh ghan ịlo ẹkasian. Abuḍiemiom mọ ạbuen ụ́moogh ọnaghanan ạḍughum. Tọrobo ọnyo ạbidi raḍighi ghan ịlo ẹḅeeraan kụ ạwa ịlo ạsuo ọdi bịn.

¹²Ạbupughol miim mọ ạbuen phọ rọḅem ghan mọ, ‘Iḍighi pạ ọwa ẹnum amiim, kụ ọphughol mụlo yira kotue! Iḍueneen kẹnighe ghụn epu rodon!’”