Read abua Azaya 57 Bible Online

Azaya 57 - abua bible

Azaya 57

¹Abugey awe omugh kụ oye ọ́naghan ḅịle ụ́sighe mọ ịyaar emite ni. Kụ ọlo, mem dị bịdi omugh, imananaan bịdi kéḍighi ịyaar.

²Bụphe ọrol bọ ḍigey ạdol kọmoogh ẹepho rꞌophooghian mem dị omugh.

³Itu sịen, nyina abuḍighinom ịkaraph. Kosoph ni ọoruen ịngo inyina. Nyina ị́nighe ipu we ạghama, bulhiom ẹmha rꞌạnmariir erelhe ipesi.

⁴Nyina rẹgilaam ghan ạnhian? Ạnhian kụ ẹdi nyina ạbugbaam ọkpe phọ rẹnmoghoghoom ghan bọ?

⁵Nyina reeseeny ghan rụmugh ẹmaria kụ rẹtolan ghan eeḍian iizin ireeny iigbia phọ anyina. Nyina rẹpinyonom ghan nmụny anyina rịkia ologhi aropogh asighiigh dị etuman eeḍian okol ọphiiny.

⁶Nyina ẹsighiogh ịkpolkpol iiḅoghoḍi asighiigh sịphe phọ kụ reeseeny ghan mọ ạrumugh. Nyina remoor ghan miim ạrikia kẹphinyon rịkia ịbiakpa ẹngo bịdi. Nyina regbi mọ oomo ịphen phọ ịḅeeraan ni ịmi ḍụghum?

⁷Nyina rẹki ghan ạnyu iiphopha aruugum mọ ọphinyon ạrikia rꞌọrolan esi.

⁸Nyina ẹsighe ịkaaghineen ạrumugh ipesi esereghi ọman esomanan arughuugh rꞌịḅaghaghaam aruutu anyina. Nyina ịḅitonaan ịmi; nyina ẹkaranaan rukpe anyina kụ ẹsinyighu ạnyu igbogh ạrimina anyina rꞌạruga phọ anyina, bụphe nyina ephir bọ mọ ọrolan esi phọ.

⁹Nyina egbula rolho ẹḅile ẹsaraghian mụnum ịma eḍu kụ ẹki ooseeny ạMolek ẹmugh phọ. Esi ọmiin ạrumugh ooseeny, nyina eeromogh butelhedom mọ ọghi ịikela ariikpisi kịrokiro, ghạlamo rꞌọmar iḍim ni.

¹⁰Aloor anyina emunenom ọwa ghan ịnon ạrumugh, kụ nyina ị́pher. Nyina regbi ghan mọ ịkaaghineen ạrumugh ipesi kụ kịngo inyina ịnyaam kụ iḍighi kụ inyina rị́pher ghan bọ.

¹¹Ọmoogh-we phọ rạḅem ghan mọ, “Ịghen kụ ạrumugh phọ ịpe rịngo ghan bọ inyina oḅio-kakaph, ẹrol dị nyina ẹgba ọkpe ịḅeni ịmi bịn iwula ịmi ẹman? Nyina mẹwile oghueni ghan ạmi loor esi dị mị aḅoorian bọ kꞌamem dị mebia ḍụghum?

¹²Nyina regbi mọ ịpe nyina reḍighi bọ elhiom ni, kụ ọlo mị kạagurion ẹzo phọ anyina, kụ ạrumugh phọ anyina kétue ịphel inyina.

¹³Mem dị nyina emoghi ẹloghonaan, ịmagh ạrumugh phọ anyina ịphel inyina. Ḍiniin aḍiphulaam ookuugh bịn kepula etoḅologhi. Kụ ọlo, bụphe ọkpasi bọ oḍuom ologhi ạbidi esi ạmi kọtol li sịphe ade phọ kụ uuseeny ịmi sịphe Otu Ịiḅereghi phọ ạmi.”

¹⁴Ọmoogh-we phọ rạḅem ghan mọ, “Awe ạmi origheel esi ạmi! Igboton tọrobo ịyaar lọ egbororian eten ạbidi. Iḅol eten phọ, ẹmaar eseere.

¹⁵“Mị kụ Ọkar Egbogh Ẹnaan Iigbia phọ, ọpo odi bọ kꞌagee-pọ. Mị atugh esi iigbia dị ephoph, kụ mị ạḅile odianan rꞌawe lọ osooromi loor kụ ọwile yogh oḍighi ịkaraph, ọbo mị aḅulemi omeeraam rꞌoḍuom ologhi ạbidi.

¹⁶Mị ụngo ni we ạmi ghuḍum kụ mị kạ́kpalhagham mun bịdi ḅịle ạ́kagham bịdi ologhi kꞌagee-pọ.

¹⁷Mị ụmooghom bịdi ọghagh ologhi loor ạsipioghom rꞌekpooko ạbidi kụ mị ạlhiom ạḅile aghinom bịdi. Kụ bịdi ụḅaar ri ẹmhu orelhe ghan reten ịlo ạbidi.

¹⁸“Mị mạmiin ni eḍighinom ịyaar ạbidi, kụ ọlo mị kaakonom ni bịdi. Mị kaḍiemiom ni bịdi ạḅile ạngo ẹloghonaan, kụ mị ạadereghi bụphe odi bọ dọl ọto phọ.

¹⁹Mị kạngo ni ẹepho oomo awe, bụlo okpekian rꞌạbulo ọkelan! Mị kaakonom ni we phọ ạmi.

²⁰Kụ ọlo, ạbukaraph awe ọkigh ịdipho ọphiiny oologh dị rạ́po ghan, dị ráḅunyonu ghan kaphunughi ẹenir rꞌịgbosoro.”

²¹Ọmoogh-we phọ rạḅem ghan mọ, “Ạdol ẹereegh ílhoonaan buḍighinom ịkaraph.”