Read abua Azaya 58 Bible Online

Azaya 58 - abua bible

Azaya 58

¹Ọmoogh-we phọ rạḅem ghan mọ, “Lọoghi ịlo nạ katue! Ḅẹni we phọ ạmi Ịzirel ịlo ịkaraph phọ ạbidi.

²Bịdi ruuseeny ghan ịmi oomo aḍio, kụ rọḅem ghan mọ ạbuno rọwa ghan olegheri areten phọ ạmi kụ ọnaghanan iilogh phọ ạmi. Bịdi rọḅem ghan mọ bụno rọwa ghan ịlo mị kạngo bụno igey iilogh kụ mọ ẹḅeeraan bụno ooseeny ghan ạmi.”

³Awe phọ ropuru ghan mọ, “Eeghe kụ yoor kọkaagh bọ ẹḍogh eḍighi ịyaar dị Ọmoogh-we phọ iyoor rụ́miin? Eeghe kụ yoor eḍien kőlhe bọ eḍighi ịyaar dị ọdi rápogh?” Ọmoogh-we phọ rạḅeni ghan bịdi mọ, “Igey ni. Egina amem mọ nyina rẹkaagh bọ ẹḍogh, nyina rẹwa ịlo anyina bịn kẹḅile ẹgbiphoghom we iiḍighi anyina.

⁴Ọkaagh ẹḍogh phọ rabeeghi. Nyina regbi mọ ọkaagh ẹḍogh dị ạrol ịduon katue ni aḍighi ịdi mị kạnaghan ịiḅereghi anyina ḍụghum?

⁵Mem dị nyina rẹkaagh ẹḍogh, nyina rẹmiine siloor anyina; nyina rezumeri ghan rụmhu anyina ude mụdi aḍimaam ạroogho, kụ ẹdeeghi rukpe-ọto eeḍuom ọoru kụ ẹminanam. Ịdipho phọ kụ ọkaraghi ạdol ọkaagh ẹḍogh ḍụghum? Nyina regbi mọ ịphen phọ kịḅeeraan ịmi ḍụghum?

⁶“Ọkaagh ẹḍogh phọ raḍighi ghan ịdi mị rạwa ịduon: Sịghe aroph ọdo kịrokiro ịkpiloghom ạbunon rꞌoogbo ịkaraph ịiruen, kụ ạtagharan bụphe rọmiinom bọ ịkpiloghom mọ ọmoogh ẹereegh.

⁷Dian eḍien ạna rꞌạbulo ọkoony rasiph ạḅile aghughuron otu ạna ạwilenaan buteneen uwekulom. Ngọ rukpe oye lọ ụ́moogh ọlo omuuna, kụ kạ́ḅitonaan ọngo ẹloghonaan ọnyo asiya ạna.

⁸“Kụ ịiseeny ạmi egbi ọmu aloor ạna ịdipho erumuḍio ạḍiroor, ḅịle ariisi lọ nạ aḍighima yogh rạraar ekeleghu ni. Mị kạtolan oomo amem rꞌạna ọphel ạna; okpekian phọ ạmi kaako ni nyịna akoom.

⁹Mem lọ nạ ạmagh, mị kamegheron ni nyịna. Mem lọ nạ ạmagh, mị kamegheron ni. “Eḍighi ịyaar lọ nạ ạwileghi ịkpiloghom, rꞌophogh osooromi ọphue, rꞌạtorobo ẹkaraph ekpo ọnhu;

¹⁰eḍighi ịyaar lọ nạ ạngo eḍien oye lọ ọkoony rasiph kụ akiton aphogh bụphe ẹkparam bọ, bịn ufiri phọ akoom bọ nyịna katen ḍịḅaal ogbo ootaany.

¹¹Bịn mị kạmaar ri ạpham nyịna kụ ạpheremiom nyịna igey ạraraar. Mị kạkparamiom nyịna rꞌomoon aloor. Nạ kạtol ịdipho oghoony ịizupha dị amuboom ạmuum odi ude, ịdipho ạmuum ọonu adir dị rámuneen ghan.

¹²Awe phọ ạna kọḅile oselemi ịpe eegulaan bọ, kụ ọḅile ọlogh ruutu sịphe igbaany ariphighiom mọ. Kolegheri ni mọ nyina awe dị ọḅile odoghoḍi iikpe phọ, dị ọḅile ọokodi ruutu dị emeleghu.”

¹³Ọmoogh-we phọ rạḅem ghan mọ, “Eḍighi ịyaar dị nạ ạpham ḍio ophooghian mọ aḍio oghueni kụ nạ rạ́gba ghan ḍịo ạna ḍio phọ ạḍiphe; eḍighi ịyaar dị nạ ạmanami ịyaar ḍio iigbia phọ ạmi kụ ạlogh eegu kụ nạ erelhe ọ́ghi, oḍighi óḍighi, ḅịle eepua ikpo ọnhu ọ́ḅa,

¹⁴bịn nạ kạmiin ḍidugh dị kẹḍua okumu ghan ạmi etu. Mị kaḍighi ịdi kọlogh nyịna eghuan sịen oomo aḅirini phọ, kụ nạ kaliom ni de phọ mị ạngo bọ Jẹkob ọde-oko phọ ạna. Mị Ọmoogh-we phọ kụ mạḅem.”