Read abua Azaya 59 Bible Online

Azaya 59 - abua bible

Azaya 59

¹Kẹ́etughian ghan mọ Ọmoogh-we phọ adugh iboom dị kátue ịphel inyina, ḅịle mꞌạḅaaghaph iboom dị kạ́naghan ḍịmagh ẹloghonaan anyina.

²Loor esi ịkaraph anyina kụ ẹdi ọdi inyina rị́naghanan ghan bọ. Ịkaraph anyina kụ ịlogh ọku igbo anyina rꞌẸnaan mem lọ nyina ẹwa ooseeny ọdi.

³Ologh ọkpe rꞌạḍigam rꞌọko enu isiph inyina.

⁴Nyina esoor erugh ịiruen, kụ iphum inyina. Nyina eḍuom ologhi ọgba ọkpe kụ ọmooghom akeel. Nyina emitenom ịkaraph igbiighi ịlo oḍighi ịyaar bụnon awe.

⁵Ịkaraph igbiighi phọ anyina ebeeph ịdipho areghelhe ẹkaraph-ịyaar. Oḅom eghelhe phọ bịn ẹkaraph-ịyaar emite! Kụ ẹkaraph ezue phọ anyina kéḍighi ịma ịngo inyina — ebeeph ịdipho ukpe dị oḍighinom ruutu ọotaku.

⁷Nyina regbiighi ghan oomo amem oḍighi ịkaraph, kụ ẹkpar ri dị nyina kẹkparam ekori oḍighi phọ. Nyina reegulemi ghan kephiemi mem ọze awe lọ úlegherian ni. Nyina remitiom ghan oogulemi tọrobo ekpisi lọ nyina ẹghi,

⁸kụ ekpisi lọ nyina esi oye rákpetenaan ḍuugh. Tọrobo ịyaar lọ nyina eḍighi ị́daphan ologh. Nyina etelhe ẹkulhakulha eten, kụ oye ólho dị arelhe eten phọ ẹpe phọ kụ ẹnighenom.

⁹Awe phọ rọḅem ghan mọ, “Nyịidipho yoor molhegheri ẹmhu phọ eḍighi bọ kụ Ẹnaan iyoor rị́phel bọ kẹ́sighe esi ạbuphe rụkpiloghom bọ iyoor. Yoor uḍuom ologhi ḍịḅaal orelhiom, kụ ufiri bịn kụ odi,

¹⁰kụ yoor rookula ghan ịdipho awe ikpom ariḍien. Yoor rokpeteghaan ni ootaany, mụdi aḍughul, ẹkigh mụdi yoor odi ọmar iḍim.

¹¹Yoor roopuph kụ asiloor aloor medugh. Yoor romoghi ghan dị Ẹnaan kịphel iyoor esi ịkpiloghom rꞌịkaraph kụ ịyaar ímite.

¹²“Ọmoogh-we, ạsipioghom ayoor esi ạna ẹbugh ni. Ịkaraph ayoor kụ rịkpalham iyoor. Yoor ọkar ri ologhoma oomo phọ ịne.

¹³Yoor mọḅaar ẹmhu esi ạna, oghel nyịna, kụ úmeera ọdaph ạna. Yoor mọkpiloghom bụnon kụ ọḍua loor ạna. Ịitughian ayoor ị́nighe; ikpo ọnhu ayoor ọkpe.

¹⁴Mophorogh iiḅi ịiruen ọkele, kụ elhiom kékpekian mun. Igey phọ reekpeteghaan ghan egbogh erugh, kụ ịma ẹrolom ị́moogh dọl sịphe.

¹⁵Ẹnum egey eḍighinom ịyaar bịn kụ edi; tọrobo oye lọ ạwile oḍighi ịkaraph kameel aḍighanaan sighiton.” Ọmoogh-we phọ mạmiin ni ịphen phọ kụ repin esi ọdi dị iiḅi ịiruen ílho mun.

¹⁶Iḍigh ni ḍiigu esi ọdi ọmiin mọ oye ólho ọphel ạbuphe mọkpiloghom bọ. Loor ịduon phọ ọdi kạsighe ni ịikpo ọdi kụ ạtagharanam bịdi kụ ạmooghom ọkpar opu.

¹⁷Ọdi kạkpologhian iiḅi ịiruen mụdi ọsuaram ekpologhi rꞌịikpo ọphelom mụdi ekpokoro eghoony ẹgham. Inmenaan aloor ọdi eḍighi ẹephua dị ẹkpar ịlo oolemi yogh ạraraar kụ ọliom ọḅile oḅulemian ịkaraph phọ ịpe awe phọ ọmiinom bọ.

¹⁸Ọdi kạliom bụmulogh-ḍien ọdi ạdaphan ịpe bịdi moḍighi bọ, ghạlamo ạbulo odiighi rikpisi dị ẹkel.

¹⁹Ẹḍua emitenom erumuḍio kụ esi emeelom mọ, tọrobo oye kakiilaan ni nyọdi rꞌigbogh ịikpo phọ ọdi. Ọdi katu ịdipho ọphiiny dị rakil, ịdipho ọokpara oghim.

²⁰Ọmoogh-we phọ rạḅeni ghan we phọ ọdi mọ, “Mị katu Jeruselem eenaan anyina rꞌọphel oomo phọ ạbuphe mokiton bọ esi ịkaraph phọ ạbidi.

²¹Kụ mị akiran ịyo rꞌanyina: mị mịngo inyina ịikpo phọ ạmi rꞌịtughemi phọ ạmi ịdi keḍighi ịlo anyina kꞌagee-pọ, kụ emiigh kꞌạnyiidipho kụ ẹghiom ghisigh, nyina kịnaghanan ịmi kụ ẹtughemi nmụny anyina rꞌạnmuny oko anyina ọnaghanan ghan ạmi oomo amem dị retu.”