Read abua Azaya 60 Bible Online

Azaya 60 - abua bible

Azaya 60

¹Ḅetenu, Jeruselem, ạmu ịdipho erumuḍio phọ; Eegu Ọmoogh-we phọ rẹmuom nyịna.

²Ufiri kụ kạtol ịnon areelhe, Kụ loor ạna ạḍiḅaal Ọmoogh-we phọ kụ kesoorom; Ẹmueneen aloor phọ ọdi kẹtolan ni rꞌạna.

³Koḍur ri reelhe phọ otumeriom ḍịḅaal phọ ạna, Ạbudaam kụ kotumeriom ḍimoom aḍio phọ ạna rẹḅaal bọ.

⁴Nmạnaghian akoom loor ạna kụ ạmiin ịdi remite: Awe ạna rookpomoghan origheel ẹmha! Ạnmuny ạna kọḍua ni kꞌekpisi dị ẹkel; Nmạnyaan ạna koḅerion ịdipho ịbam ạnmuny.

⁵Nạ kạmiin ni ịphen phọ kụ ạmoogh iboom iboh; Nạ kapiigha rꞌunmam. Ẹelha aḅirini phọ koruomaan nyịna; Kꞌẹḅeenyom ạriphiiny kụ ẹdi igbogh phọ kẹḍua etu ẹteeny nyịna.

⁶Ọologh awe rꞌạsikamel kọḍua ni ẹpe Mịdian rꞌEfa etu ẹteeny nyịna. Bịdi kọḍua ẹpe Siba kụ ọpam gol rꞌịnsens otumom. Awe kọkaaph ooḅi ọghaaph ịlo ịpe Ọmoogh-we phọ maḍighi bọ.

⁷Oomo iyool-ịga phọ aKedar rꞌaNebayot Koruom nyịna ịdipho ịyaar aghuḍum Kụ ọḅam ạnyu enmeny phọ oḍighi ịdi kẹḅeeraan Ọmoogh-we phọ. Ọmoogh-we phọ kaselemi ni Otu Ịiḅereghi phọ ọdi aḍighi ịdi kạmoogh eegu dị kꞌekulha kẹ̋rol ghan.

⁸Ịphen phọ eeghe ọdo ạrunwunyaru dị resugh bọ kẹḅeeny mụdi ọotu phọ, Mụdi arukuru-ghọzo dị retigheel kꞌạbidi?

⁹Bịdi arughuugh ạvala dị ẹḍua rikpisi dị ẹkel kụ retu, Dị ẹsighe we Ẹnaan retigheelom. Bịdi ọpamam silva rꞌagol Oghueniom aḍien Ọmoogh-we phọ, Ẹnaan Iigbia phọ Ịzirel, Ọpo maḍighi bọ ịdi oomo aḅirini rokueni we phọ ọdi.

¹⁰Ọmoogh-we phọ rạḅeni ghan Jeruselem mọ, “Aruuruen kụ kọḅile ọḅiirogh iikpe phọ ạna, Kụ ạbudaam ạbidi kokumu ghan nyịna. Mị ụsighe ophin ologhi ạmi kụ ạlhiomom bọ nyịna. Kụ nyịidipho mị kaḍeenaan nyịna ịse rꞌọnma ighirigiir.

¹¹Ootaany rꞌaḍughul ạrunhu-aḍibuo ạna kekughuronu ghan ni, Pịdi ạbudaam areelhe phọ Iruomaan inyina ẹelha phọ ạbidi.

¹²Kụ areelhe lọ nyịna úkumu Kopiemi ni ọman.

¹³“Ireeny ạḍiipioph, rꞌụphogh rꞌọzeme, Ọkar ịma ireeny ạruukpua phọ ạLebanon, Kotool otumom oselemiom ạna, Jeruselem, Oḍighi Otu Ịiḅereghi phọ ạmi ịlo kạnighe, Oḍighi ịdi ẹmha phọ ạmi keḍigh eghuan.

¹⁴Ạnmuny ạbuphe ọgbiphoghom bọ nyịna kotu ni Kụ ozumeri rụmhu oḍeenaan arughuenian ạbidi ọngo ạna. Oomo ạbulo eniin amem ụ́manami nyịna ịyaar kooseeny sịphe rạda aruwol ạna. Bịdi kọmagh nyịna mọ ‘Ẹmha Ọmoogh-we phọ,’ ‘Zạyon, ẹmha Ẹnaan Iigbia phọ Ịzirel.’

¹⁵“Nyịna kọ́ḅitonaan mun ọḅile ọloghom ḍien, Ẹmha dị ọwile osumughu kụ eḍighi ọkpagha. Mị kaḍighi ịdi nạ kạbugh kụ ạnighe, Esi iboh kꞌagee-pọ kꞌagee-pọ.

¹⁶Areelhe rꞌạbudaam kụ kọmaar ọpham nyịna Ịdipho onhiin rạpam ghan bọ mọony ọdi. Nạ kalegheri mọ mị Ọmoogh-we phọ mạphel nyịna, Mọ Ẹnaan Oomo Ịikpo phọ Ịzirel kụ ịtagharan nyịna.

¹⁷“Mị karuomaan nyịna gol esi enaba, Silva rꞌenaba esi okuron rꞌoreeny Ḅịle okuron esi aḍighiigh. Ạbudaam mọ ạna kọ́kpiloghom mun nyịna; Mị kaḍighi bịdi ophoghom nyịna ooḅi ọoruen rꞌẹepho.

¹⁸Oghur ạḍigam kọ́naghan mun; Ọphueghi rꞌamuphe kémitenaan mun eelhe phọ ạna. Mị kạmaar ạpham nyịna, ạḅile aḍighi ọsuaram ạna ịdipho iikpe; Nạ kụseph ni ịmi loor esi dị mị mạphel nyịna.

¹⁹“Amem kẹ́tol mun dị erumuḍio kụ kẹḅile ẹngo nyịna ḍịḅaal ootaany Ḅịle ụnwanyu kụ kạngo nyịna ḍịḅaal ḍughul; Mị Ọmoogh-we phọ kụ kaḍighi ḍịḅaal ạna kꞌagee-pọ; Ạḍiḅaal eegu phọ ạmi kẹmuom nyịna.

²⁰Ariiḍio amukum ologhi ạna kesi eekuna. Mị Ọmoogh-we phọ kụ kaḍighi ḍịḅaal ạna kꞌagee-pọ, Ịdi kebia epu erumuḍio rꞌụnwanyu phọ.

²¹Awe ạna, oomo phọ ạbidi, koḍighi ghan ịdi ẹnighe, Kụ ọmoogh de phọ kꞌagee-pọ. Mị kụ ụzuph bịdi, mị kụ ụlhem bịdi, Oḍeenaan igbogh ạmi oomo awe.

²²Ghạlamo ọkar ẹbam eghunotu dị esooromi loor Kẹḅile ni eten egbogh eelhe dị ẹmoogh ịikpo. Mem dị ọkar amem mọ ẹteeny, Mị kaḍighi ịdi ịphen phọ kẹnuun emite. Mị kụ Ọmoogh-we phọ!”