Read abua Azaya 62 Bible Online

Azaya 62 - abua bible

Azaya 62

¹Mị kạkaaph ni amitiom ọkparamiom ologhi aJeruselem; Mị káḅoorian tụtu ọdi ạmoogh pẹleeny, Kụ ọkpar opu ọdi ạmu ịdipho ọtozi ḍughul.

²Jeruselem, areelhe phọ kọmiin ni ịdi nạ mạkpar apu! Oomo ạbudaam ạbidi kọmiin ni eegu phọ ạna. Kụ ọta nyịna ḍimoom aḍien, Ḍien dị Ọmoogh-we phọ rꞌaloor kụ aghol.

³Nạ kạkigh ịma eghoony ọdaam esi Ọmoogh-we phọ.

⁴Nyịna kọ́magh mun mọ “Akinom,” Ḅịle mꞌoghol ade phọ ạna mọ “Ọkpagha.” Kụ koghol nyịna ḍimoom aḍien mọ, “Ụḅeeraan.” Kokol de phọ ạna mọ, “Ophineen,” Loor esi dị nạ ạḅeeraan nị Ọmoogh-we phọ Kụ kaḍighi ịdipho olhom sịphe ade phọ ạna.

⁵Ịdipho onyugheel ọony dị rạsighe ophin esina ọnyani dị kọ̋ka, Kụ ẹdi ọpo ạlhem bọ nyịna kaphin ni nyịna. Ịdipho oye lọ rapin ạnir, ologhi rạḅaal ghan bọ ọmiin ạnir phọ, Ịdipho kụ ẹdi ologhi Ẹnaan kạḅaal esi ạna.

⁶Sịphe iikpe phọ ạna, Jeruselem, mị mạmeremi yogh we okori; Bịdi kúkpomori ọnhu ootaany rꞌaḍughul, Bịdi ọghiom ghan ologhi Ọmoogh-we phọ ruguanaan phọ ọdi Bịdi kúmeera ọdi awula.

⁷Bịdi kúmeera ọdi aphooghian tụtu ọdi aḅulemi Jeruselem ḍigbaany ạdol phọ Kụ aḍighi ẹmha phọ ịdi oomo aḅirini kụ koboom.

⁸Ọmoogh-we phọ maguan oguanaan dị ạḅaram oghunya Kụ, esi ịikpo ọdi, kaḍighi ni amitiom: “Ịbiakpa ạna kéḍighi mun eḍien ạbumulogh-ḍien ạna Kụ aruuruen kọ́pughol mun miim ạna.

⁹Kụ nyina ạbuphe ẹzuph bọ kụ ẹku bọ ịbiakpa phọ Kele ni ạbred phọ kụ eboom Ọmoogh-we phọ. Nyina ạbuphe eekonom bọ kụ ẹku bọ iimuma avain phọ Kẹpughol li miim mọ sịphe ogiga Otu Ịiḅereghi phọ ạmi.”

¹⁰Weye aJeruselem, ịḍua sịphe ẹmha phọ Kụ ẹsamanaan eten we phọ anyina rotigheel bọ! Iseleminaan bịdi oḅodo, ẹsighiogh sighiigh phọ eroḅologhi! Ịkpo ạlagba oḍeenaan ọbo areelhe olegheriom

¹¹Mọ Ọmoogh-we phọ magbeel raleenye oomo ade phọ: “Ịḅeni weye phọ aJeruselem Mọ Ọmoogh-we phọ ratu ọphel anyina; ọdi ạpamam we phọ ọdi mạtagharan bọ.”

¹²Kighol inyina mọ “Awe Iigbia Phọ Ẹnaan,” “Awe Phọ Ọmoogh-we Phọ Mạphel Bọ.” Kokol Jeruselem mọ, “Ẹmha Dị Ẹnaan Ẹphomoghian,” “Ẹmha Dị Ẹnaan Íkinom.”