Read abua Azaya 63 Bible Online

Azaya 63 - abua bible

Azaya 63

¹“Ạnhian kụ ọphon phọ ạḍua bọ ẹmha aBozra ẹpe Idom kụ ratu? Ạnhian kụ ọphon phọ ạkpologhian bọ ịma iinmenan dị ẹtogh kụ agiriph bọ raten rꞌịikpo rꞌịnyaam?” “Ọmoogh-we phọ ạmoogh bọ ịikpo ọphel phọ kụ ratu ogbeelom ọkpar opu ọdi.”

²“Eeghe kụ iinmenan phọ ọdi ẹtogh bọ mụdi ịlo oye dị rạzeer ghan iimuma avain oḍighi amiim?”

³Ọmoogh-we phọ ạpagharanaan mọ, “Mị mạzeer reelhe phọ ịdipho iimuma avain, kụ oye óru ọloghonaan ạmi ḍịghaagh. Mị ụzeerom bịdi rꞌophin ologhi, kụ ịḅaal ạbidi mẹphueghi oomo iinmenan ạmi.

⁴Mị aloghoma mọ amem ọphel awe phọ ạmi mẹteeny; pọ kụ amem ọliom ạbumulogh-ḍien phọ ạbidi.

⁵Iḍigh ḍiigu esi ạmi mem dị mị aphogh kụ ạmiin mọ oye ọloghonaan ạḍighaagh ịmi ólho. Kụ ophin ologhi ạmi ụkparami ịmi, kụ ọkpar opu aḍighi ọlo ạmi rꞌaloor.

⁶Rꞌophin ologhi ạmi, mị ạzeer bọ reelhe ạwalawalami. Mị azu ịḅaal aghuḍum mọ ạbidi ude.”

⁷Mị kạkaaph ni ịlo ẹphomoghian Ọmoogh-we phọ amabi úlho ghan bọ; mị aboom nyọdi esi oomo ịpe ọdi muḍighinaan bọ iyoor. Ọdi mạngo ḍịseph phọ ọdi dị ẹbugh iboom we Ịzirel loor esi ọnma ighirigiir ọdi rꞌẹphomoghian dị edi ghan bịn.

⁸Ọmoogh-we phọ ạḅem mọ, “Bịdi awe ạmi; bịdi ịmi kúukeleghi.” Kụ iḍighi kụ ọdi ạphel bịdi ạsighe

⁹esi oomo ịminimiin phọ ạbidi. Kọ́okpaany kꞌạke, kụ Ọmoogh-we phọ rꞌaloor kụ ạphel bịdi. Esi ẹphomoghian rꞌọnma ighirigiir ọdi kụ ẹdi ọdi ạtagharan bịdi. Ọdi ạmaar ghan ni aphogh bịdi mem dị meten,

¹⁰kụ ọlo bịdi ụḅaar ẹmhu kụ oḍighi ịdi Uwaloor phọ ọdi akururu. Loor ịduon phọ Ọmoogh-we phọ aten mụlogh-ḍien ạbidi kụ eenan bịdi.

¹¹Pọ kụ amem dị bịdi ọotughian igbaany phọ, ọrugh phọ aMozis otelhedom Ọmoogh-we phọ, kụ bịdi opuru mọ, “Odi ẹghen nyịidipho Ọmoogh-we phọ, ọpo ạphel bọ buḍiemiom awe phọ ọdi ạsighe sịphe ọphiiny phọ? Odi ẹghen Ọmoogh-we phọ, ọpo ạngo bọ uwaloor phọ ọdi Mozis?

¹²Odi ẹghen Ọmoogh-we phọ, ọpo esi ịikpo phọ ọdi aMozis aḍighinom bọ ni iboom ạraraar, adi bọ mụum ọphiiny phọ kụ aḍiemiom we ọdi ạḅeenye mụum dị ạkel li ude, ọmooghom aḍien dị kẹtolom rꞌọdi kꞌagee-pọ?” Ọmoogh-we phọ aḍiemiom bịdi kụ ạkparami ruwol phọ ạbidi ịdipho ịlo ilhom ạrusu ọbo bịdi kokpetaan ghan bọ owol loor aḍighiigh ọnmighima.

¹⁴Ịdipho abupoghom rọkimom ghan bọ sịnam eḍiiny dị ẹnuum, ịduon kụ ịdi Ọmoogh-we phọ ạngo we phọ ọdi ophooghian. Ọdi aḍiemiom ni we phọ ọdi kụ aghueniom ḍien phọ ọdi.

¹⁵Ọmoogh-we, tọl kꞌạke kụ uphogh iyoor, ẹpe nạ odi ghan bọ rꞌiigbia rꞌeegu phọ ạna. Odi ẹghen oseere ologhi phọ ạna esi ayoor? Ịikpo phọ ạna edi ẹghen? Edi ẹghen ẹphomoghian phọ ạna rꞌigbiririph phọ ạna? Kụ́ḅitonaan iyoor.

¹⁶Nạ kụ ọde ayoor. Ebraham rꞌạJekob ạburude phọ ayoor iyoor ụ́logh elegh, kụ nạ, Ọmoogh-we, kụ ọde ayoor, ọpo oomo amem rụtagharan ghan bọ iyoor.

¹⁷Eeghe kụ nạ ameera bọ mọ yoor ọgbol ghan reten phọ ạna? Eeghe kụ nạ ạngo bọ ọgel dị yoor kọḅaar ẹmhu dị kọgumom nyịna ọman? Ḅịle aḅula ẹphen loor esi ạbuphe rokumu bọ nyịna, loor esi awe phọ oomo amem oḍighi bọ bụo ạna.

¹⁸Ạbumulogh-ḍien uphorogh ni iyoor we iigbia phọ ạna omiteghom ẹnum amem. Bịdi ọozeghi dọl iigbia phọ ạna.

¹⁹Nạ ruḍighi iyoor mụdi nạ iyoor kụ̋da ghan mem, mụdi yoor kőḍighi ghan we ạna.