Read abua Azaya 66 Bible Online

Azaya 66 - abua bible

Azaya 66

¹ Ọmoogh-we phọ rạḅem ghan mọ, “Ạke phọ kụ ogbogh ạgada ọdaam mọ ạmi, kụ ade phọ kụ ịkasi ọkpasaghiom aruwol ạmi. Ọghen ọdo otu kụ ẹdi nyina kịlhoghonaan bọ ịmi, ẹghen ọdo esi kụ ẹdi mị kạtol ghan?

²Mị rꞌaloor kụ ụlhem bọ aḅirini phọ! Awe dị osooromi loor kụ okiton esi ịkaraph ụḅeeraan ịmi, rꞌawe dị ughiilaan ịmi kụ ụnaghanan ịmi.

³“Awe phọ uḍighi ghan ịlo ẹḅeeraan bịdi. Esi ạbidi ọgbaranaan ólho; mụghumo bịdi ughiigh ḍilephiri ạnam ḅịle mꞌoye, kụ ọphighironom ẹkia; mụghumo bịdi ughiigh mọony oyool-ọga ḅịle mꞌosoph orum aghoogh, kụ ọphighironom ẹkia; mụghumo bịdi umitiom ẹkia ịbiakpa ḅịle mꞌịḅaal arophoropo; mụghumo bịdi ụsuughi ịnsens ḅịle mꞌọoḅereghi ịyaar lọ ọka. Ạḍiḅeeraan phọ ạbidi ooseenyom ghan ịdipho phọ, ạḅaphanya.

⁴Kụ iḍighi kụ mị katuomaan bịdi imananaan — ọkar ịyaar phọ bịdi rokiilaan ghan bọ — loor esi dị, mem lọ mị ạmagh, oye ómeera; ḅịle kẹn mem lọ mị ạghaaph, oye ọ́naghanan. Bịdi uphin ọḅaar ẹmhu esi ạmi rꞌoḍighi ịkaraph.”

⁵Ịnaghan ịdi Ọmoogh-we phọ rạḅem, nyina phọ ạbuphe ẹnaghanan bọ nyọdi rꞌoghiilaan: “Loor esi dị nyina imeeraam ịmi, buniin awe sịphe ogbo phọ anyina ịlogh inyina ḍien kụ ụ́moogh ịyaar oḍighinom anyina. Bịdi ịnmoghoghoom inyina kụ rọḅem ghan mọ, ‘Ọmoogh-we phọ agananami igbogh phọ ọdi uḍeenaan iyoor! Ọdi ịphel inyina yoor ọmiin ịdi nyina rebo iboh!’ Kụ bịdi rꞌaloor kụ kọmoogh roofola!

⁶Iler rụru ẹnaghan! Aḍiboom ạḍiaḅa phọ edi bọ sịphe ẹmha phọ rꞌọyugh phọ ẹḍua bọ sịphe Otu ịiḅereghi phọ kụ retu, ḍịen kụ ạḍiaḅa Ọmoogh-we phọ dị rạliomom bụmulogh-ḍien phọ ọdi!

⁷“Ẹmha iigbia phọ ạmi ẹkigh ạnir dị ạmar mọony akperenom dị oghunughun úkun.

⁸Oye mạmiin ghan ni ḅịle mꞌạnaghan ghan ni ịyaar dị ẹrol ịduon ḍụghum? Mọmar ghan ni eelhe ḍiniin aḍio ḍụghum? ẠZayon kạ́miinom mun ịdi kebia, kụ ogbi ọmar eelhe phọ.

⁹Kẹ́etughian mọ mị kạsighe ni we phọ ạmi asiemi esi ẹmaria, kụ kámeera mọ ọmar bịdi.” Ọmoogh-we phọ mạḅem.

¹⁰Ịmoogh iboh rꞌaJeruselem, ẹmooghaan nyọdi ọḅaal ologhi, oomo anyina ạbuphe ẹphomoghian bọ ẹmha phọ ẹphen! Ịmoogh iboh rꞌọdi nyịidipho, oomo anyina ạbuphe ẹdaphan bọ nyọdi ẹrol dọl ọto!

¹¹Nyina keliom ni ẹeḍiom ọdi, mụdi ọony lọ ạkporori ọnhu mạmaam onhiin ọdi.

¹²Ọmoogh-we phọ rạḅem ghan mọ, “Mị kiruomaan inyina ẹeḍiom dị kẹtol kꞌagee-pọ; aruphua areelhe phọ kekil kụ etu esi anyina ịdipho ạmuum ọphiiny dị rámuneen ghan. Nyina kẹkigh mọony dị onhiin ọdi kụ aakonom, aḅeton rạghaagh ọdi, kụ ạphamam rꞌẹphomoghian.

¹³Mị kịidereghi ni inyina sịphe Jeruselem, ịdipho onhiin rạadereghi ghan bọ mọony ọdi.

¹⁴Mem dị nyina ẹmiin lọ ịphen phọ remite, nyina kẹmoogh ni ọḅaal ologhi rꞌomoon aloor. Ọpo kụ amem dị nyina kelegheri mọ mị Ọmoogh-we phọ rạpel ghan ni bụphe ụnaghanan bọ ịmi, kụ mị aḍeenaan ọghagh ologhi esi ạbumulogh-ḍien ạmi.”

¹⁵Ọmoogh-we phọ katumom rꞌạnian. Ọdi kạtol ạnyu araphaaph oghim kụ ạliom bụphe ropin bọ ologhi ọdi.

¹⁶Ọdi kạḅar nịan rꞌelhool ẹgham kụ ạliom oomo awe aḅirini phọ bụlo ọdi ạmiin mọ erugh epum — kụ kọze ni ịbadi.

¹⁷Ọmoogh-we phọ rạḅem ghan mọ, “Eekuna phọ mekpekian esi ạbuphe oselemian bọ siloor ạbidi ọnya ọoḅereghi aruru, bụphe ọkoolan bọ kụ ọghi rooghoony iigbia, kụ rọba bọ rophoropo rꞌiwo rꞌịnon ạraraar olheeghi dị eḍighi ḅạphanya.

¹⁸Mị alegheri ni ịlo bịdi ọotughian rꞌịlo bịdi oḍighi yogh. Mị ratu ni ookpomoghi awe oomo areelhe. Mem dị bịdi ookpomoghan, bịdi kọmiin ni ịdi ịikpo phọ ạmi keḍighi

¹⁹kụ kolegheri ni mọ mị kụ ọpo rạliom ghan bọ bịdi. “Kụ mị kasugheeny ni buniin ạbidi ạsighe ạkiighi we areelhe rꞌịikela arere dị kọ̋naghan ghan ḍien phọ ạmi, ḅịle kọ̋miin ghan igbogh phọ rꞌịikpo phọ ạmi: ẹpe Spen, Lịbia rꞌạLidia rꞌạbuo ẹmaar ọraph ạsikumugh ạbidi, rꞌẹpe Tubal rꞌaGris. Sịphe igbo oomo areelhe phọ ịphen bịdi kogbeelom ghan igbogh phọ ạmi.

²⁰Bịdi koḅulemi oomo awe phọ anyina lọ ọrologhu reelhe phọ kụ eḍighi ruunmo dị ruunmo ịmi. Bịdi koḍiku ịnam-ạsu, ịnam adool, sịkamel rughuugh ẹgham rꞌịlo ude kụ otu sịphe ẹeḅaraph iigbia phọ ạmi ẹpe Jeruselem. Ịdipho awe phọ Ịzirel ọsighe ghan bọ ẹkia ịbiakpa odoghoḍi iloghi ạraraar adool dị ẹserere eseleman orumom Otu ịiḅereghi phọ, ịdipho kụ ẹdi kọloghoḍi bịdi iloghi arughuugh ẹgham ude ọsaany ọki osi ẹpe Jeruselem.

²¹Mị kaḍighi buniin ạbidi bụpinyon rịkia rꞌạbuo aLivai.

²²“Ịdipho aḍimoom ade phọ rꞌimoom ạsike kẹtol bọ ebia esi ịikpo phọ ạmi, ạnmuny-oko anyina rꞌaḍien phọ anyina kẹtol li ebia.

²³Tọrobo ẹyaal omoom ụnwanyu rꞌạtorobo aḍio ophooghian, awe areelhe kịrokiro kotu uuseeny ịmi sịen Jeruselem,” Ọmoogh-we phọ kụ ạḅem.

²⁴“Mem dị bịdi rọḍua, kọmiin ni we dị momuughu loor ọḅaar ẹmhu esi ạmi. Ạsileegbem lọ ạa bịdi kémugh, kụ ạnian phọ reemorom bọ bịdi kótue óḍime. Ọmiin ịphen phọ keḍighi ịyaar ạḅaphanya esi oomo awe aḅirini phọ.”