Read abua Azaya 8 Bible Online

Azaya 8 - abua bible

Azaya 8

¹Ọmoogh-we phọ ụḅeni ni ịmi mọ, “Sịghe opakara okpooghi ạge ikpo ạraraar dị ebagana yogh mọ, ‘Owum elhom, Ọphueghi elhom’.

²Sạḅar ịyal awe oḍuom ologhi, Yuraya oyil ạrikia phọ rꞌạZekaraya ọony phọ aJeberekaya, mọ oḍighi bụo ọgbaanaan.”

³Reru reten kụ ạnir ạmi asoph eghun. Mem dị ọmar bọ mọony phọ ayoor, Ọmoogh-we phọ ụḅeni ni ịmi mọ, “Kol nyọdi mọ ‘Owum elhom, Ọphueghi elhom’.

⁴Tụtu ọony phọ kạmanam ọḅem mọ ‘onhiin rꞌọde’, ọdaam mọ Asiria katool oomo ẹelha phọ ạDamaskos rꞌoomo ạraraar phọ ịpe owum bọ Sameria ạḍuanam.”

⁵Ọmoogh-we phọ ạḅile ni ạḅa ẹḍogh ụḅeni ịmi,

⁶kụ ạḅem mọ, “Loor esi dị awe phọ ạbuen moghel mụum okol oodu phọ aSiloa upiigha bọ kụ bịdi rookpeka esomanan ạbudaam mọ Rezin rꞌaPeka,

⁷mị Ọmoogh-we phọ kạsighe ni atu ogbogh ọdaam Asiria rꞌoomo ạbuo ẹgham mọ ọdi ozuom aJuda. Bịdi koḍigh ịdipho ạmuum-aḍigho Ọphiiny aYufratis dị kapunughu aakpereghi oomo phọ iigbom mọ ọdi.

⁸Bịdi kọtara ni ọḅeeny Juda ịdipho ạmuum-aḍigho dị maḍigh atenom sikpe kụ ạminoghom oomo ạraraar.” Ẹnaan edi ni rꞌayoor. Araphaaph phọ ọdi ạrar bọ ekoph de phọ.

⁹Iikpomoghan eniin esi ẹmoogh oghiilaan, nyina areelhe phọ! Iler rụru, nyina arikpisi ade phọ ẹkelogh bọ. Iikolobian ịlo ẹgham, kụ ịḅaram ni eepuph. Ii, iikolobian kụ ịḅaram ni eepuph.

¹⁰Igbiighi ni kụ ekori anyina! Kụ bịdi kọ́kpar opu. Ịḅa ni ịlo ịḅeeraan inyina! Kụ oomo phọ ịdi oopho ni bịn ị́moogh mạar oḍighinom, ịdi eḍighi bọ Ẹnaan edi rꞌayira.

¹¹Esi igbogh ịikpo ọdi, Ọmoogh-we phọ ụphur ịmi rụru kụ ạḅem mọ, “Kạ́daph eten phọ ẹpe awe phọ rọdaph bọ.

¹²Kạ́daphan eḍighinom ạraraar awe phọ kụ kákiilaan rạraar phọ ịpe bịdi rokiilaan bọ.

¹³Tụutughian mọ mị Ọmoogh-we oomo ịikpo phọ kụ oye iigbia. Mị kụ ọdi ạkpe ni oghiilaan.

¹⁴Loor ẹmhu ạdol iigbia rꞌeegu phọ ạmi, mị ạkigh ịdipho ẹkan aḍighiigh dị awe rokpetaan ghan komeel. Mị ạkigh ịdipho aḍiphil dị kesiph we ọmar phọ aJuda rꞌọmar phọ Ịzirel rꞌawe phọ aJeruselem.

¹⁵Ịbadi kokpetaan ni; bịdi komeel li kụ ọozighiḍian. Bịdi komeel ḍiphil.”

¹⁶Nyina, abutelhedom mọ ạmi ọkpe ọkparamian ukpe kụ ọphamanan asidom mọ ịpe Ẹnaan mịngo bọ ịmi.

¹⁷Ọmoogh-we phọ mạgumom ọman we phọ ọdi, kụ mị aḍuom ni nyọdi ologhi kụ ạkpasi emooph ạmi esi ọdi.

¹⁸Sịen mị odimom nmụny phọ Ọmoogh-we phọ mụngo bọ ịmi. Ọmoogh-we oomo ịikpo phọ, ọpo ạgada ọdaam ẹmha ọdi odi bọ ẹpe Eegum ạZayon, murom ni iyoor sidom dị edi eye ọghiom awe phọ Ịzirel.

¹⁹Kụ awe kịḅeni ni inyina mọ ịki idike kꞌạbuo ịmiin dị rọopioph ghan kọomo. Bịdi kọḅem ni mọ, “Ẹkpe ni dị awe kokol ẹmhu ạbulo odi kụ kopuru ghan ruwaloor phọ rꞌạbulo úlho ịlo ạdol phọ ḍụghum?”

²⁰Nyina kẹpagharanaan ni bịdi mọ, “Ịnaghanan ịphen Ọmoogh-we phọ rịtughemi bọ inyina. Kéler rụru ẹnaghanan riil arukuru rꞌạroḍogh ạbulo úlho — ịpe bịdi kịmiinaan bọ inyina ḍịghaagh kẹ́logh.”

²¹Awe phọ koyeela ni sịphe ade phọ, iloghi eḅoronu rꞌọkoony. Esi ọkoony rꞌọghagh ologhi, bịdi kotonyon ni ọdaam mọ rꞌẸnaan phọ ạbidi. Bịdi oḍighom ịyaar kopogh ni ạnyu ẹpe okuaḍio phọ,

²²mꞌọghughe ade phọ kụ ịyaar bịdi kọ́miin emuton ịiḅaghami rꞌufiri, ufiri eegu dị roporogh bịdi kọlogh.