Read abua Lịvitikos 15 Bible Online

Lịvitikos 15 - abua bible

Lịvitikos 15

¹Ọmoogh-we phọ ạḅeni Mozis rꞌEeron

²mọ ọḅeni we phọ Ịzirel iilogh phọ ịphen. Oye lọ osiim apu bịn amiteghu loor, pọ ọ́ḅaal,

³mụghumo akilogh amiteghu, mụghumo usoph ni.

⁴Tọrobo ẹmina lọ oye phọ rạmina ghan, pọ ẹmina phọ ẹpe mẹphuph ị́ḅaal; tọrobo ịyaar lọ dị rạtolom ghan, pọ ịyaar phọ ẹpe mẹphuph ị́ḅaal.

⁵Tọrobo oye lọ ạḅogh ẹmina phọ ẹpe, pọ ọdi aatologh rukpe ọdi, ạghi asoor ologhi ạmuum awura, ạrol ḍịo ọdi gem dị ọ́ḅaal tụtu ẹteeny dulhe.

⁶Tọrobo oye lọ ạrolom ịyaar lọ oye phọ rạtolom ghan, pọ ọdi aatologh rukpe ọdi, ạghi asoor ologhi ạmuum awura, ạrol ḍịo ọdi gem dị ọ́ḅaal tụtu ẹteeny dulhe.

⁷Tọrobo oye lọ ạḅogh oye dị ụ́ḅaal, pọ ọdi ọ́ḅaal, pọ ọdi aatologh rukpe ọdi, ạghi asoor ologhi ạmuum awura, ạrol ḍịo ọdi gem.

⁸Oye phọ ọpo ọsinom bọ ịghor, pọ ọdi aatologh rukpe ọdi, ạghi asoor ologhi ạmuum awura, ạrol ḍịo ọdi gem dị ọ́ḅaal tụtu ẹteeny dulhe.

⁹Tọrobo ịyaar phọ ẹpe rọtolom ghan bọ kụ oye dị ụ́ḅaal ạrolom pọ mẹphu ị́ḅaal.

¹⁰Oye lọ ạḅogh ịyaar lọ edi sịphe phọ, pọ mạphuph ọ́ḅaal tụtu ẹteeny dulhe; kụ oye lọ arool ọdo ạraraar phọ ịpe, pọ oye phọ mạphuph, ọ́ḅaal aatologh rukpe ọdi, ạghi asoor ologhi ạmuum awura, ạrol ḍịo ọdi gem ẹteeny dulhe.

¹¹Tọrobo oye dị oye dị ụ́ḅaal kụ ạsighe rạghaagh ọdi lọ úutola kụ ạḅoghom, pọ oye phọ ọpo ọdi ạḅogh bọ aatologh rukpe ọdi, ạghi asoor ologhi ạmuum awura, ạrol ḍịo ọdi gem dị ọ́ḅaal tụtu ẹteeny dulhe.

¹²Tọrobo ịyaar erughotu lọ oye dị ụ́ḅaal ạḅogh, mꞌọnyoki mꞌoko, pọ iḅom. Kụ eru odo mꞌẹkpa, pọ ịsighe ẹroph ologhi ạmuum.

¹³Mem dị oye dị ụ́ḅaal maḍum ạkua, pọ ọdi agbi amuneni oḍual aḍughul-otu ịlo oselemian aloor, ọdi aatologh rukpe ọdi, ạghi esi lọ ạmuum rakiil, asoor awura mụum, bịn ọdi mạkua.

¹⁴Rẹman ọphaanya aḍughul-otu, ọdi ạsighe ịyal aruukumude mꞌịyal ịgaami arukuru-ghọzo ạpham ạghimom egbodo Ọmoogh-we phọ sịphe ọnhu-aḍibuo Ogbogo Ạdol Ọmoogh-we phọ, ạsighe ạngo oyil ạrikia phọ.

¹⁵Oyil ạrikia phọ kạsighe ni oniin ạphighironom ẹkia ịkaraph, ạsighe nyọori phọ ạphighironom ẹkia oguom ạnian, kụ awoph oye phọ egbodo Ọmoogh-we phọ ạsighe esi ẹḅaal phọ ọdi. Ịdipho phọ kụ ẹdi ọdi kaḍighi ịko oselemian aloor alephiri ọony.

¹⁶Eru mạar dị osiim apu bịn ramiteghu, pọ ọdi ạghi aatola loor phọ ọdi ologhi ạmuum, pọ ọdi ọ́ḅaal ạrol ḍịo ọdi gem tụtu ẹteeny dulhe.

¹⁷Tọrobo ukpe mꞌozu ẹnam lọ osiim mọ ạtephom pọ mẹepuan, pọ ootol oseere gem tụtu ẹteeny dulhe.

¹⁸Kụ ạnir lọ rꞌoye phọ ọpo osiim mọ apu bọ bịn amiteghu loor kụ ọrolan esi, pọ ịyal phọ ạbidi ọghi owura mụum, bịdi ọrol dọl awe lọ ụ́ḅaal tụtu ẹteeny dulhe.

¹⁹Ạnir lọ odi ẹmha ạnmariir, pọ ọdi ạrol ḍịo ọdi gem oḍual aḍughul-otu. Kụ tọrobo oye lọ ạḅogh nyọdi, pọ mạapuan loor ọdi, ạrol ḍịo ọdi gem tụtu ẹteeny dulhe.

²⁰Tọrobo ịyaar lọ ạnir phọ ạminanam sịphe ọdi odi bọ ẹmha ạnmariir phọ, pọ mẹphuph ị́ḅaal; tọrobo ịyaar kẹn lọ dị rạtolom ghan ude pọ mẹphuph ị́ḅaal.

²¹Tọrobo oye lọ ạḅogh ẹmina phọ ọdi mꞌịyaar phọ ẹpe ọdi rạtolom ghan bọ ude aatologh rukpe ọdi, ạghi asoor ologhi ạmuum awura, ạrol ḍịo ọdi gem dị ọ́ḅaal tụtu ẹteeny dulhe.

²⁴Eru mạar dị ạnir lọ odi ẹmha ạnmariir rꞌolephiri ọony kụ ọrolan esi kụ oye phọ agbulugha ẹmha ạnmariir phọ, pọ ọdi mạapuan loor ọdi. Oye phọ ạrol ḍịo ọdi gem oḍual aḍughul-otu; kẹn ẹmina phọ ẹpe bịdi ọminanam bọ mẹphuph aani.

²⁵Eru mạar dị ạnir lọ ạghi ẹmha ạnmariir kụ ẹrol epeele siḍughul-otu phọ ịpe rẹtol ghan bọ, pọ oomo ịpheri phọ ipeeleeny asiḍughul-otu phọ, ọdi ạrol li dọl ạnir lọ odi ẹmha ạnmariir.

²⁶Kụ ẹmina phọ ẹpe ọdi rạminanam ghan bọ ọnhu asiḍughul-otu phọ ịpe ẹmha ạnmariir phọ ọdi ẹrol bọ, pọ ẹpe, ẹmina ạnir dị odi ẹmha ạnmariir. Tọrobo ẹmina lọ ọdi ạmina rꞌạtorobo ịyaar lọ ọdi ạrolom mem mọ ạmuen phọ ị́ḅaal.

²⁷Tọrobo oye lọ ạḅogh rạraar phọ ịpe phọ, pọ ọdi mạapuan loor ọdi, ọdi aatologh rukpe ọdi, ạghi asoor ologhi ạmuum awura, ạrol ḍịo ọdi gem dị ọ́ḅaal tụtu ẹteeny dulhe.

²⁸Kụ mem dị okil phọ ọdi masoph, ọdi kakori oḍual aḍughul-otu. Kụ remunughan, pụruku ọdi mạḅaal.

²⁹Rẹman ọphaanya aḍughul-otu, ọdi kạsighe ni ịyal aruukumude mꞌịyal ịgaami arukuru-ghọzo ạpam ạkimom egbodo Ọmoogh-we phọ sịphe ọnhu-aḍibuo Ogbogo Ạdol Ọmoogh-we phọ, ạsighe ạngo oyil ạrikia phọ.

³⁰Oyil ạrikia phọ kạsighe ni oniin ạphighironom ẹkia ịkaraph, ạsighe nyọori phọ ạphighironom ẹkia oguom ạnian. Ịdipho kụ ẹdi ọdi kaḍighi ịko oselemian aloor ạnir-ephoph egbodo Ọmoogh-we phọ.

³¹Ọmoogh-we phọ ạghaaph ni ịphen phọ ạḅeni Mozis ọphur ạruru awe phọ Ịzirel ọbo bịdi kọpue ghan bọ Ogbogo Ạdol phọ ọdi, ọbo bịdi komuughu ghan bọ loor ẹ́ḅaal phọ ạbidi.

³²Ịphen phọ iilogh ịlo oselemian aloor ạbuphe mọopuan bọ: oye lọ osiim apu bịn amiteghu loor, mꞌakiil li sịphe ọghum mọ ọdi,

³³rꞌạnir lọ odi ẹmha ạnmariir, rꞌolephiri ọony lọ ạrolan esi kụ agbulugha ẹmha ạnmariir phọ.