Read abua Lịvitikos 18 Bible Online

Lịvitikos 18 - abua bible

Lịvitikos 18

¹Ọmoogh-we phọ ạghaaph ạḅeni Mozis

²mọ ạḅeni we phọ Ịzirel mọ, “Mị kụ Ọmoogh-we phọ Ẹnaan phọ anyina.

³Keḍighi yogh ịpe bịdi oḍighi yogh bọ ẹpe eelhe phọ Ijipt nyina ẹrol ghan bọ. Íḍighi ghan ịpe bụo aKenan phọ roḍighi yogh bọ, ẹpe mị ịsighe bọ inyina rẹki. Ị́daph ghan iilogh phọ ạbidi.

⁴Ịdaph ghan ịtooghi phọ ạmi kụ eḍighi, eeko ghan iilogh phọ ạmi. Mị kụ Ọmoogh-we Ẹnaan phọ anyina.

⁵Kụ iḍighi, ịtuugh iilogh phọ ạmi rꞌịtooghi phọ ạmi eeko ghan. Oye lọ ạtuugh ịphen phọ kụ ạdaph kạpel li ghuḍum ọdi. Mị kụ Ọmoogh-we phọ.”

⁶Ọmoogh-we phọ adoghoḍi iilogh phọ ịphen kụ ạḅem mọ, “Ọnyo anyina rꞌọnyo asiya ọdi kụ́tolan esi. Mị kụ Ọmoogh-we phọ.

⁷Ụ́miin ghan ẹdaḅa ọde ạna mꞌẹdaḅa onhiin ạna. Ọdi kụ onhiin ạna. Kạ́miin ẹdaḅa ọdi.

⁸Ụ́katan ghan ukpe ạnir ọde ạna, ạmiin ẹdaḅa ọdi. Ẹpe phọ, ẹdaḅa ọde phọ ạna.

⁹Kạ́tolan esi ipesi rꞌumor ạnir-ephoph ạna, mụghumo ọony onhiin mọ ọony ọde ạna uukonom nyọdi oniin otu phọ rꞌạna mꞌẹnon ekpisi.

¹⁰Kạ́tolan esi ọnyani ọony ạna mọ ọnyani ọnyani ạna, kạ́katan ukpe ạbidi, ạmiin ẹdaḅa ạbidi, ịdi eḍighi bọ ẹdaḅa ạbidi, pọ ẹdaḅa ạna.

¹¹Kạ́tolan esi rꞌọnyani dị ạnir ọde ạna ạmar, ịdi eḍighi bọ ọdi umarani ạna.

¹²Kạ́tolan esi rꞌumor ạnir-ephoph ọde ạna ịdi eḍighi bọ ọdi phọ ọnyo asiya ọde ạna.

¹³Kạ́tolan esi umarani onhiin ạna, ịdi eḍighi bọ ọdi ọnyo asiya onhiin ạna.

¹⁴Kạ́tolan esi rꞌạnir umor ọde ạna, Ọdi umarani ọde ạna.

¹⁵Kạ́tolan esi rꞌạnir ọony ạna, ịdi eḍighi bọ ẹpe phọ, ẹdaḅa ọony phọ ạna.

¹⁶Kạ́tolan esi rꞌạnir umor ạna ịdi eḍighi bọ ẹpe phọ, ẹdaḅa umor phọ ạna.

¹⁷Kạ́tolan esi rꞌạnir onhiin rꞌọnyani ạkarion rukpe ạbidi, ạmiin ẹdaḅa ạbidi. Ḅịle kẹn kạ́tolan esi ọnyani ọony onhiin phọ mꞌọnyani ọnyani onhiin phọ, dị rꞌạna mẹrolan ghan esi, ịdi eḍighi bọ bịdi phọ asiya ạnmariir egina esi; ịphen phọ kẹn ạsipioghom.

¹⁸Ḅịle kẹn, úpin ghan umarani ạnir phọ ạna, ụ́katan ghan ukpe ạmiin ẹdaḅa ọdi, mem dị ạnir phọ ạna odi ni eye; pọ nạ mạkom ịruonu rꞌịiḅaghami aseere.

¹⁹“Kạ́tolan esi rꞌạnir lọ odi ẹmha ạnmariir ịdi eḍighi bọ ọdi ọ́ḅaal.

²⁰Kạ́tolan esi rꞌạnir amatuman ạna, ọbo nạ kạapuan ghan bọ loor ạna.

²¹Kạ́ḅogh rꞌoniin ọbumoony ạna ạngo ọoḅereghi eru phọ ạMolek. Ịpe kẹsighe roofola ẹngo ḍien iigbia Ẹnaan phọ. Mị kụ Ọmoogh-we phọ.

²²Ọmina ạriiniom pọ ạḅaphanya Ẹnaan ẹkel li. Ịphen phọ ạḅaphanya.

²³Olephiri ọony mꞌạnir-ephoph kụ́tolan esi rꞌẹnam. Oye lọ aḍighi ịphen phọ, pọ mạapuan loor.

²⁴“Ị́ipuan ghan siloor anyina esi oomo ạraraar phọ ịphen. Areelhe phọ nyina rẹki bọ mọopuan siloor ạbidi esi oomo ạraraar phọ ịphen phọ. Kụ iḍighi kụ mị kaporogh bọ bịdi ạwalalami ạsighiogh.

²⁵Ade phọ kẹn mẹphuph aani, kụ mị ạtu bọ ạsighe ịkaraph phọ ạḅam ẹmhu ạbidi, kụ ade phọ rꞌaloor mekuḅa bụphe orugh bọ ezuughi.

²⁶Kụ iḍighi ịmaar eeko iilogh phọ ạmi rꞌịtooghi phọ ạmi. Íle ghan rꞌamuniin ạḅaphanya phọ ịphen, mꞌạna ọlo ịsiphe ẹmha phọ mꞌạna ooruen,

²⁷(loor esi egbi ghan oomo iigbia phọ ịphen kụ ẹdi awe phọ orughogh bọ ẹpe ade phọ edi bọ risigh anyina ọphuphogh bọ)

²⁸ọbo ade phọ kíkuḅa ghan bọ inyina ezuughi mem lọ nyina mẹepu de phọ, ịdipho ekuḅa bọ reelhe ạbuo ade phọ edi bọ risigh anyina ezuughi.

²⁹Tọrobo oye lọ aḍighi ugbini ugbini phọ ịphen, oye lọ ạapuan loor ọdi esi ạḅaphanya phọ, pọ kotoph nyọdi ogbeph omutonaan nyọdi esi awe phọ ọdi.

³⁰“Kụ iḍighi, ịmaar eeko iilogh phọ ạmi rꞌiigbia phọ ạmi ịphen, ọbo nyina kéle ghan bọ muniin ạḅaphanya, ịdipho bụphe odi bọ risigh anyina oḍighi yogh bọ, ẹepuan siloor anyina. Mị kụ Ọmoogh-we Ẹnaan phọ anyina.”