Read abua Lịvitikos 2 Bible Online

Lịvitikos 2 - abua bible

Lịvitikos 2

¹Tọrobo amem dị ọnyo anyina ratu ọphighiron ẹkia ịbiakpa ọngo Ọmoogh-we phọ, pọ ọdi ạsighe ghan igeny ịgbieneen ịbiakpa ạsighe mụnum akironom ạsighe ịnsens aaḍuom.

²Ạghi ạngo riil ạrikia, nmụny phọ Eeron. Oyil ạrikia phọ akpoph ẹezua ạḍighaagh ịgbieneen ịbiakpa phọ rꞌạmunum mọ rꞌịnsens phọ bịn aguom nịan sịphe enmeny phọ ịlo ọotughianam ghan mọ mọphinyon oomo phọ ịdi ọngo Ọmoogh-we phọ, ẹkia eeḅi eḍu dị oguom nịan dị oḍighi ọngo Ọmoogh-we phọ.

³Kụ ịpe esugha bọ ịlo ariil ạrikia phọ. Ịphen phọ ạraraar iigbia ịdi eḍighi bọ ịlo ẹkia dị ọphighiron ọngo Ọmoogh-we phọ.

⁴Eru mạar dị ẹkia ịbiakpa phọ ọdi ratu bọ ọphighiron phọ eru ẹlo mọgbaghaḍi, pọ ạsighe ghan ịgbaghaḍineen ịlo yist ụ́logh, igeny ịgbieneen ịbiakpa dị okirionom mụnum, mụghumo ịpeḅere ipoḍi ạkikia ịlo yist ụ́logh kụ mụnum okironom, kụ arumom.

⁵Eru mạar dị ẹkia ịbiakpa phọ ọdi ratu bọ ọphighiron phọ eru ẹlo mọgbaghaḍi loor ọnyoki, pọ ạsighe ghan igeny ịgbieneen ịbiakpa dị yist ụ́logh dị okirionom mụnum, kụ arumom.

⁶Ạparion aḍighi ịpherepe ạsighe mụnum aaḍuom. Ẹphen phọ ẹkia ịbiakpa.

⁷Eru mạar dị ẹkia ịbiakpa phọ ọdi ratu bọ ọphighiron phọ eru ẹlo mọsa loor ạgbagba, pọ ạsighe ghan igeny ịgbieneen ịbiakpa dị okironom mụnum, kụ ọphighironom.

⁸Ạsighe ạghi egbodo Ọmoogh-we phọ, kụ ạngo oyil ạrikia phọ, dị ạsighe ạghi ẹpe enmeny phọ.

⁹Kụ oyil ạrikia phọ ạsighe muniin abin aguom nịan sịphe enmeny phọ ọotughianam ghan mọ mọphinyon oomo phọ ịdi ọngo Ọmoogh-we phọ, ẹkia eeḅi eḍu dị oguom nịan dị ọphighiron ọngo Ọmoogh-we phọ.

¹⁰Kụ ịpe esugha bọ ịlo ariil ạrikia phọ. Abin phọ ạmuen phọ abin iigbia, ịdi eḍighi bọ mụo ẹkia dị ọphighironaan ọngo Ọmoogh-we phọ.

¹¹Kạ́sighe ghan ịyaar lọ ọlogh yist ạphighironom ẹkia ịbiakpa egbodo Ọmoogh-we phọ. Kạ́sighe yist mꞌẹnuum aḍiowo ạphighironom ẹkia oguom ạnian ạngo Ọmoogh-we phọ.

¹²Ẹkpe ni ọsighe ghan ịphen phọ ọphighironom ẹkia ịḅel iimuma phọ, kụ ị́kpe ọghimom ẹpe enmeny ạrikia oguom ạnian ọngo Ọmoogh-we phọ ọbo ephur eeḅi eḍu.

¹³Lọgh ghan boph tọrobo ẹkia ịbiakpa ịdi eḍighi bọ aboph kụ ạmeera ịyo phọ ạna rꞌẸnaan.

¹⁴Eru mạar dị nạ ạsighe ịḅel iimuma phọ ạna kụ ạpighironom ẹkia ịbiakpa egbodo Ọmoogh-we phọ, pọ sịghe ghan ịḅel arughuuny ịbiakpa lọ ọḅur nịan mụghumo ikpo lọ mọponyon;

¹⁵akironom mụnum, kụ ạsighe ịnsens aaḍuom. Ẹphen phọ ẹkia ịbiakpa.

¹⁶Oyil ạrikia phọ ạsighe ghan mụbam abin ịbiakpa phọ mọponyon bọ rꞌạmunum mọ rꞌoomo ịnsens phọ aguom nịan ịlo ọotughianam ghan. Ẹphen phọ ẹkia oguom ạnian dị kọpighironom ghan egbodo Ọmoogh-we phọ.