Read abua Lịvitikos 21 Bible Online

Lịvitikos 21 - abua bible

Lịvitikos 21

¹Ọmoogh-we phọ ạḅeni Mozis mọ ạḅeni nmụny phọ Eeron ạbupinyon rịkia phọ mọ, “Mị úmeera mọ oyil ạrikia ạapuan ghan loor esi oḍighi ạraraar amaḍi mem dị ọnyo asiya amugh,

²Omuton oye lọ ạkaraghi akulan nyọdi: onhiin ọdi, ọde ọdi, ọony ọdi, ọnyani ọdi, umor ọdi,

³umor ọdi ạnir-ephoph dị oye rꞌọdi esi kọ̋rolan dị ạkaraghi atuman nyọdi kụ ilhom kạ̋al, pọ ọdi ạapuan ni loor.

⁴Kụ́tuan mọ aḍighi ọnyo asiya ọdi loor apinien, ọdi ạghi ạapuan loor.

⁵“Bịdi kúkula rụmhu ạbidi; ḅịle kẹn, kúkula ọleem ạbidi; ḅịle kẹn, kụ́kiripha siloor ạbidi.

⁶Bịdi ọphama siloor phọ ạbidi ịlo awe iigbia egbodo Ọmoogh-we phọ, kúufolomi ḍien phọ ạmi Ẹnaan phọ ạbidi, ịdi eḍighi bọ ẹkia ịbiakpa phọ ẹpe roguom ghan bọ nịan, bịdi kụ rọpighiron ghan kọngo nyọdi. Kụ iḍighi kụ bịdi oseerian siloor phọ ạbidi dọl iigbia.

⁷Bịdi kúpin oliom ẹmha ạnir lọ mạapuan loor; kẹn kúpin ạnir dị olhom ạḅamanaan ikpoki, ịdi eḍighi bọ oyil ạrikia phọ oye iigbia Ẹnaan phọ ọdi.

⁸Ẹkpianaan we phọ ọosa nyọdi oselemi oseere dọl iigbia, ịdi eḍighi bọ ọdi kụ rạpighiron ghan ẹkia eḍien kạngo Ẹnaan phọ ạbidi. Mị kụ Ọmoogh-we phọ ạasa bọ we phọ ạmi, mị Ẹnaan iigbia.

⁹Ọnyani oyil ạrikia lọ aafolomian loor ọdi, pọ maafolomi ọde phọ ọdi. Ịsighe nyọdi eguom nịan.

¹⁰“Oye lọ maḍighi uwo ẹmhu oyil ạrikia sịphe aḍita abumor phọ ọdi kụ mọsighe mụnum-ịko phọ ọsagharan ẹmhu ọdi, mọosa nyọdi ọkpologhian ghan ạrusuoma iigbia phọ. Ọdi kúkula ghan ẹmhu ọdi, ḅịle kẹn, kụ́panyi ghan rukpe ọdi ịlo oḍeenaan mọ ọdi rạto ni.

¹¹Mị kụ Ọmoogh-we phọ. Eghoony iigbia phọ ọsagharan bọ mụnum-ịko phọ ạmi edi ẹmhu ọdi. Ọdi kụ́ḍua ghan sịphe Ẹphan phọ. Ḅịle kẹn, kụ́ubeeph ghan esi lọ ọmuneen oḍim ạapuan loor ọdi, kụ́tuan ọde ọdi mꞌonhiin ọdi.

¹³Ọdi aphin esina ọnyani lọ oye rꞌọdi esi kọ̋rolan.

¹⁴Bụen ọdi kúpin: ekpukele ạnir, ạnir lọ olhom ạḅamanaan ikpoki, ạnir lọ maafolomian loor rꞌoliom-ẹmha ạnir. Ọdi aphin esina ọnyani dị kọ̋ka sịphe eelhe phọ ạbidi.

¹⁵Ịdipho kụ ílho, ạnmuny phọ ọdi ọkpe bọ oḍighi bụo iigbia koḍighi esi ịko ị́ḅaal. Mị kụ Ọmoogh-we phọ kụ mị kụ ạasa bọ nyọdi.”

¹⁶Ọmoogh-we phọ ạghaaph ạḅeni Mozis

¹⁷mọ ạḅeni Eeron mọ, “Sịphe ọkuruḅaka phọ ạna, oghiil atum oghiil, ọlo kꞌạna lọ ạmoogh etuph, pọ ọdi kụ́ubeeph ịlo ọphighiron ẹkia eḍien ọngo ạmi Ẹnaan phọ ọdi.

¹⁸Oye lọ aḍigh ẹgha, mꞌọlo ariḍien meḅomoghian, mꞌọlo izon eḅomaan, mꞌọlo aḍizu ifuruma,

¹⁹mꞌoye lọ aruwol rꞌạraghaagh meḍiku ẹgha,

²⁰mꞌoye lọ ạmoogh eḅu-ọman, mꞌẹkugha, mꞌọlo aḍigh ẹgha ariiḍien, mꞌọlo ạmoogh ịkpakiar, mꞌoophoony oye;

²¹tọrobo ọlo kꞌEeron oyil ạrikia phọ lọ ạmoogh etuph, pọ ọdi kụ́ubeeph ịlo oḍighi ịyaar aghuḍum mọ ọngo Ọmoogh-we phọ, nyẹpe roḍighinom ghan bọ nịan, ọphighiron ẹkia eḍien Ẹnaan phọ ọdi.

²²Ọdo phọ oye phọ ọphon atue ni ale eḍien phọ ụngo bọ ịmi. Ịpe eḍighi bọ iboom iigbia rꞌoomo ạraraar phọ ịpe eḍighi bọ iigbia, ọdi ale ni.

²³Ọdi kútu utuman sịphe ukpe Ẹphan phọ, kúḍuraan ụubeeph ẹpe enmeny ạrikia phọ, ịdi eḍighi bọ ọdi oye ẹgha, ọbo ọdi kạpue ghan bọ dọl iigbia phọ mị ạasa bọ. Mị kụ Ọmoogh-we phọ.”

²⁴Ịphen kụ ịdi aMozis ạghaaph ạḅeni Eeron rꞌạnmuny phọ ọdi rꞌoomo awe phọ Ịzirel.