Read abua Lịvitikos 22 Bible Online

Lịvitikos 22 - abua bible

Lịvitikos 22

¹Ọmoogh-we phọ ạghaaph ạḅeni Mozis

²mọ ạḅeni Eeron rꞌạnmuny phọ ọdi mọ, “Ịgbatanaan ẹkelan esi ạraraar iigbia phọ awe phọ Ịzirel ịpe nyina eseere bọ egbodo ạmi, ọbo nyina keefolomi ghan bọ ḍien iigbia phọ ạmi. Mị kụ Ọmoogh-we phọ.

³Eru mạar dị tọrobo ọlo kꞌạna oghiil atum aghiil kụ ạghi atuman rạraar iigbia phọ awe Ịzirel mugbianaan bọ ịmi, mem dị ọdi ụ́ḅaal, pọ itoph oye phọ ọpo ogbeph emutonaan nyọdi egbodo ạma. Mị kụ Ọmoogh-we phọ.

⁴“Tọrobo ọlo kꞌEeron lọ ẹzegh ọku ufe mꞌẹzegh ọogholha eḍighi, pọ oye phọ ọpo kúle ghan rạraar iigbia phọ tụtu esi ịko ọdi ọdi ạḅaal. Oyil ạrikia lọ ạḅogh ịyaar lọ mẹphuph mꞌoye lọ mamugh mꞌoye lọ ạmuum mụo aloor kụ ramiteghu ghan,

⁵mꞌịyaar lọ rekuura ude mꞌoye lọ ụ́ḅaal;

⁶tọrobo oye lọ ạḅogh ọdo ạraraar phọ ịphen, pọ ọdi mạphuph. Ọdi ạtol ẹ́ḅaal ḍịo ọdi gem tụtu ẹteeny dulhe. Kẹn ọdi kụ́ba rꞌeniin ịyaar iigbia phọ, tụtu ọdi awura mụum.

⁷Erumuḍio memeel ighool, pọ ọdi mạḅaal. Pụruku ọdi kale ni rạraar iigbia phọ ịdi eḍighi bọ eḍien ọdi ni.

⁸Ịyaar lọ epu bịn emugh, mụghumo ẹlo elhom ẹnam kụ eghiigh, ọdi kạ́ba, ọbo ọdi kạapuan ghan bọ loor ọdi. Mị kụ Ọmoogh-we phọ.

⁹“Kụ iḍighi kụ oomo ariil ạrikia ooko ghan ịtooghi phọ ạmi, ọbo, mem dị bịdi moofolomi, ịkaraph lọ ẹḍua sịphe kụ eru kọḅam ghan bọ rụmhu ạbidi, bịn ọtuan ịpe phọ omugh. Mị kụ Ọmoogh-we phọ ịisa bọ bịdi.

¹⁰“Ooruen ọlo ẹnon ẹmha lọ rꞌanyina erughan mꞌoye lọ nyina ẹsighe oḍighinaan anyina oḍighi kúle ghan rạraar iigbia phọ.

¹¹Eru mạar dị oyil ạrikia phọ ạsighe ikpoki kụ aghoom oye, pọ ale ni; kẹn, bụlo ọmar sịphe kꞌọdi, pọ bịdi ole ni eḍien phọ ẹpe oyil phọ ạar bọ.

¹²Eru mạar dị ọnyani oyil ạrikia phọ kụ ạal ooruen, pọ ọdi kúle rạraar aghuḍum iigbia phọ.

¹³Eru mạar dị ọnyani oyil ạrikia phọ kụ maḍighi ekpukele ạnir mụghumo ạḅam ikpoki kụ mọony ọ́mar kụ magheel kꞌọde ọdi, ịdipho amem mọ ẹghoroghor phọ ọdi, pọ ọdi ale ni eḍien ọde phọ ọdi, kụ ọlo ooruen kúle.

¹⁴“Eru mạar dị oye ạsighe élegheri kụ ale rạraar iigbia phọ, pọ ọdi aḅulemi ịpe ẹman bọ ạlogh oogh abin ạḅaram kụ ạngo oyil ạrikia phọ.

¹⁵Ạbupinyon rịkia phọ kúufolomi rạraar iigbia phọ ịpe awe phọ Ịzirel oḍighinom bọ ịyaar aghuḍum ọngo Ọmoogh-we phọ,

¹⁶bịn eḍighi ịdi bịdi kọmiinom, ọmoogh apum ọsighe ịkaraph ọḅam rụmhu ạbidi. Mị Ọmoogh-we phọ kụ ọdi ạasa bọ rạraar iigbia phọ.”

¹⁷Ọmoogh-we phọ ạghaaph ạḅeni Mozis

¹⁸mọ ạḅeni Eeron rꞌạnmuny phọ ọdi rꞌawe phọ Ịzirel mọ, “Tọrobo amem lọ ọlo ịsiphe kꞌỊzirel mꞌooruen dị rꞌanyina erughan kụ aru oḍighi ịyaar aghuḍum oguom ạnian, mꞌẹlo ọdi aguanaan Ọmoogh-we phọ mꞌẹlo ophooph ologhi,

¹⁹Sịghe olephiri ạnam mꞌodughuna mꞌekpe lọ ụ́moogh etuph kụ aḍighinom.

²⁰Kạ́sighe ghan ọlo ạmoogh etuph kụ aḍighinom. Eru ịdipho, pọ ịyaar aghuḍum ạna kọ́sighe.

²¹Tọrobo oye lọ raḍighi ịyaar aghuḍum ẹboroph, mꞌẹlo dị aguanaan Ọmoogh-we phọ mꞌẹlo ophooph ologhi, mꞌạnam mꞌoyool-ọga mꞌạtu-ọga, pọ aru ọlo aseleman dị loor kọ̋opuan, ọbo ọsighe ịyaar phọ ọdi.

²²Kạ́sighe ghan ẹnam ikpom ariḍien, mꞌẹlo meḍigh ẹgha, mꞌẹlo oophoony, mꞌẹlo ẹmoogh ẹko dị resoor mụum, mꞌẹlo mẹghooraan, mꞌẹlo ạḍikaraph anem. Kạ́sighe ghan ịphen atumom egbodo Ọmoogh-we phọ oḍighinom ịyaar aghuḍum ạnian sịphe enmeny ạrikia phọ.

²³Mꞌaḍilephiri ạnam mꞌọony oyool-ọga dị ụ́ḅophoghan ḍimite rꞌịpheri phọ ọmar phọ ạbidi, pọ otue ni ọsighe ghan oḍighinom ịyaar aghuḍum ophooph ologhi. Kụ ọlo eḍighi ịyaar aghuḍum dị nạ aguanaan, pọ kạ́sighe aḍighinom. Eru ịdipho, pọ ịyaar aghuḍum ạna kọ́sighe.

²⁴Tọrobo ẹnam lọ ẹmoogh ḍi, mꞌẹlo opho, mꞌẹlo osoph ipholophool, kạ́sighe átumom egbodo Ọmoogh-we phọ. Kéḍighi ghan ịphen ẹpe ẹmha phọ anyina.

²⁵“Ghạlamo ooruen kụ ạpham ọdo ẹnam dị ẹrol ịduon aru oḍighinom ạrikia ịkpuy ọngo Ẹnaan phọ ayoor ị́boor ghan, ịdi eḍighi bọ aḍimite phọ ạbidi mẹphue bịdi. Ẹkia phọ kọ́sighe.”

²⁶Ọmoogh-we phọ ạghaaph ạḅeni Mozis mọ,

²⁷“Mem lọ aḍilephiri ạnam mꞌoyool-ọga mꞌạtu-ọga ạmar, ị́ḅogh ghan. Ịbile ọdi rꞌonhiin phọ ọdi ọrolan oḍual aḍughul-otu. Kụ rọman ọphaanya aḍughul-otu, pọ otue ni ọsighe oḍighinom ịyaar aghuḍum oguom ạnian.

²⁸Tọrobo ẹnam otu, mꞌạnam mꞌọga, ị́ḅar ghan onhiin phọ rꞌọony phọ eghiigh eniin aḍio phọ.

²⁹Mem lọ nyina reḍighi ịyaar aghuḍum ọseph Ọmoogh-we phọ, ịdaph ịtooghi phọ ọbo ịsighe inyina.

³⁰Ile ghan egina phọ aḍio phọ kụ késugheeny rꞌeniin tụtu ẹteeny ḍịeri phọ ạḍiroor phọ. Mị kụ Ọmoogh-we phọ.

³¹Kụ iḍighi, iiko ghan iilogh phọ ạmi, ẹdaph ghan kụ eḍighinom. Mị kụ Ọmoogh-we phọ.

³²Íifolomi ghan ḍien iigbia phọ ạmi. Nyina awe Ịzirel, iseere ni ịmi dọl iigbia phọ. Mị kụ Ọmoogh-we phọ ịisa bọ inyina.

³³Mị kụ ịsighe bọ inyina amitiom ạḍuanam ẹpe ade phọ Ijipt oḍighi Ẹnaan anyina. Mị kụ Ọmoogh-we phọ.”