Read abua Lịvitikos 26 Bible Online

Lịvitikos 26 - abua bible

Lịvitikos 26

¹“Ị́kaaghi ghan rụmugh eseerian siloor, íbologh ghan igbudu, ígimogh ghan sịghom ạrana ọoḅereghi sịphe ade phọ anyina, ịdi eḍighi bọ mị kụ Ọmoogh-we Ẹnaan phọ anyina.

²Iiko ghan oomo ariiḍio ophooghian phọ ạmi, kụ eghueni esi phọ ịsiphe ruuseeny ghan bọ ịmi. Mị kụ Ọmoogh-we phọ.

³“Eru mạar dị nyina ẹphamanam ni ịtooghi phọ ạmi rꞌịiruen phọ ạmi kụ ẹdaph eḍighinom,

⁴pọ mị kạloph ghan ọlophia ọkaraghi amem mọ, ọbo ade phọ esoor ghan eḍien, kụ ireeny ịsiphe ade phọ emuum ghan iimuma phọ ạbidi.

⁵Ariiḍien phọ anyina kẹpughan ni ẹku ịbiakpa mem dị mẹteeny ookoroghi iimuma, kụ nyina ẹḅile ghan kẹn ẹson iimuma mem dị mẹteeny ọzuph ịbiakpa. Nyina kele ghan ni eḍien ịpher inyina kụ ẹtol ẹereegh sịphe ade phọ.

⁶“Mị kạpoomi ni de phọ nyina ketugh bọ kụ nyina ẹnaani dị nyina oye kékiilaan. Mị kaporogh ni ilhom ịnam mọ ạsighiogh sịphe ade phọ; kụ ẹgham kẹ́tol mun sịphe ade phọ.

⁷Nyina keporogh ni bụmulogh-ḍien phọ anyina, bịdi omeleghu risigh anyina ọgbal elhool ẹgham.

⁸Oogh awe anyina ketue ni ẹkpar epu oniin okuron awe ạbidi; kụ oniin okuron awe anyina koporogh ni ḍioph ọonir awe ạbidi, kụ ạbumulogh-ḍien phọ anyina omeleghu risigh anyina ọgbal elhool ẹgham.

⁹Mị kịloghoma ni inyina, kụ mị aḍighi ịdi nyina kẹmar emuzeḍi, kụ mị kạkparami ni ịyo phọ ịpe mị aghiran bọ rꞌanyina.

¹⁰Ibugha phọ anyina kẹpughan ni dị kịsighe inyina lhạ, kụ esi ịduon phọ ni nyina ketoph ni ịdi esugha esi igbaany ibugha phọ ọmoogh esi dị kọlogh imoom mọ.

¹¹Kụ mị ạlogh Ogbogo Iigbia phọ ạmi ogbo anyina, kụ uwaloor phọ ạmi inyina kị́ḅitonaan.

¹²Kụ mị atelhe yogh ghan sịphe ogbo phọ anyina, kụ mị aḍighi Ẹnaan anyina, kụ nyina eḍighi we ạmi.

¹³Mị kụ Ọmoogh-we Ẹnaan phọ anyina, ọpo ịsighe bọ inyina ẹpe eelhe phọ Ijipt amitiom, ọbo nyina kẹ́ḅile ghan bọ eḍighi rẹbene. Mị mạkpanyan izime phọ ịkasaghiom bọ inyina, aḍighi ịdi nyina meeleeny kụ retelhe.

¹⁴“Kụ eru mạar dị nyina ịmi ị́naghanan, kụ nyina ị́daph oomo iilogh phọ ạmi, kịliom ni inyina;

¹⁵eru mạar dị nyina ẹḅitonaan ịtooghi phọ ạmi, kụ uwaloor anyina aphogh ịiruen phọ ạmi ạḅitonaan, kụ nyina íiko oomo phọ iilogh phọ ạmi, pọ nyina mẹka ịyo phọ mị maghiran bọ rꞌanyina.

¹⁶Mị kịliom inyina. Mị kịngo inyina ilhom ịiḅaghami dị ketu izuom inyina ịmooph inyina, rẹezegh dị kótue ookonom rꞌosipheeny dị kạaḅaghami riḍien anyina, kụ aḍighi ịdi aghuḍum anyina kaguul ape. Nyina ẹpu ghan bịn ẹzuph ịizupha phọ anyina, dị ạbumulogh-ḍien kụ kole ghan ịpe nyina mẹzuph bọ.

¹⁷Kụ mị ạgbole risigh ạmi esi anyina kụ ạbumulogh-ḍien phọ anyina ịze inyina, bụphe ịlogh bọ inyina ḍien ọtooghi ghan ịngo inyina, kụ nyina ẹpu bịn ekiil esumughu mem dị oye inyina ríphorogh.

¹⁸“Kụ eru mạar dị ghạlamo amem dị oomo ịphen meten kụ nyina ịmi ị́naghanan ni, pọ mị kạbughe ni ghelhe phọ anyina oḍual amem

¹⁹abunughi ịikpo phọ nyina rebagaam bọ. Ọlophia kạ́loph kụ ade phọ anyina ẹkaraghar ịdipho okuron.

²⁰Kụ ịnyaam mọ anyina ẹpu bịn eminonom yogh. Ade phọ anyina késoor mun eḍien, kụ ireeny ịsiphe ade phọ kémuum mun rughuuny.

²¹“Eru mạar dị nyina reten phọ ạmi ị́daph kụ erelhe ghan, nyina ịmi rị́naghanan, pọ mị kạḅile ni ạbughe ni ọmiinom mọ anyina oḍual amem

²²Kụ mị ạbile ilhom ịnam eḍigh pạ ogbo phọ anyina, kụ ẹsighiogh ghan nmụny phọ anyina, ẹḅile ghan ẹze ghan ịnam-otu phọ anyina, kụ ighome inyina nyina kéḍiza mun, kụ areten phọ anyina epeeghu.

²³“Eru mạar dị esi oomo ạghelhe phọ ạmi ạkuen kụ nyina ínmia, kụ nyina ẹḅaar ẹmhu ọopu ạmi kụ nyina ịgbatanaan ịmi,

²⁴pọ mẹteeny dị mị kịgbatanaan inyina kụ ịliom inyina oḍual amem ịdi ẹkpar epu ịḅel phọ.

²⁵Kụ mị kịlhiom inyina ẹgham esi ọka ịyo phọ yira oghiran bọ. Kụ eru mạar dị nyina eekpomoghan sịphe ạramha phọ anyina ịlo ẹereegh, mị kiruom inyina rẹezegh dị kótue ookonom, kụ ẹkpaariom nyina emeel eḍigh rạghaagh ạbumulogh-ḍien phọ anyina.

²⁶Mị kapiemi ni riiḍien phọ anyina dị ḍioph ạnmariir kụ kọḅaran ghan oniin aguugh, kụ ọtooghi ghan riiḍien phọ uwo abin rꞌabin kụ ọponyi, kụ mem dị nyina melhe ẹmadan, ọkoony phọ kạḅile ni isiph inyina.

²⁷“Kụ eru mạar dị oomo phọ ịphen meten kụ nyina ẹḅile ni ẹḅaar ẹmhu ọopu ạmi kụ nyina ịgbatanaan ịmi,

²⁸pọ mị kạtuugh ni ịdipho phọ ịgbatanaan inyina rꞌọghagh ologhi, kụ mị ạḅile ịliom inyina oḍual amem ịdi ẹkpar epu ịḅel phọ.

²⁹Ịgbakuro kạbugh ni iboom dị nyina ẹba ghan iphulupul ạnmuny phọ anyina. Iphulupul ạnmanyaan phọ anyina kụ ịdi nyina kẹba ghan.

³⁰Kụ mị apiemi riisi phọ ịpe nyina eeseeny ghan bọ ruru kụ mị aagbo renmeny ạrikia phọ anyina, kụ mị ạsighe iḍim anyina ạḅamaghiom ạnyu iguuleeny ịkaaghineen ạrumugh phọ anyina; kụ uwaloor ạmi ịḅitonaan inyina.

³¹Kụ mị kakiton rạmha phọ anyina atene ịzeghe, kụ mị apiemi riisi ooseeny phọ anyina, kụ akel ọsighe ạrikia phọ anyina.

³²Kụ mị apiemi de phọ kụ ạbumulogh-ḍien phọ anyina orugh ghan bọ sịphe ade phọ ookia ghan.

³³Kụ mị ịwalalami inyina aleenye oomo areelhe, kụ mị ạsighe elhool ẹgham iphoroghom inyina, kụ ade phọ anyina eguul, kụ ạramha phọ anyina epe.

³⁴Kụ amem mọ ạmuphe kụ ẹdi ologhi ade phọ kạḅaal ghan riiḍio ophooghian phọ ọpo nyina ímeera bọ mọ ẹmoogh. Ade phọ meguul bọ kẹkpo ni oomo ạsia phọ ịpe nyina edi bọ ẹpe areelhe ạbumulogh-ḍien phọ anyina.

³⁵

³⁶“Kụ ịyal-ikpo anyina ạbuphe osugha bọ, mị kạsighe mukum ologhi ạlogh iloghi ạbidi ẹpe areelhe ạbumulogh-ḍien phọ bịdi orugh bọ kụ rominonom; kụ ẹḍogh ạḍinya oreeny dị ookuugh rapula keḍighi ịdi bịdi kokiil osumughu dịadi awe lọ roporoghom elhool ẹgham, kụ omeleghu mem dị ạmulogh-ḍien inyina útuman kụ ạri oye kụ ráporogh bịdi.

³⁷Kụ oniin ameel ạḅamian ạnyu oniin dịadi odi ghisigh elhool ẹgham, dị oye kụ bịdi ráporogh bọ ni. Nyina kẹ́moogh ịnyaam ẹmeera egbodo ạbumulogh-ḍien phọ anyina.

³⁸Kụ nyina emuughu ẹpe ạramha ạbumulogh-ḍien phọ anyina, kụ areelhe ạbumulogh-ḍien phọ anyina ịaa inyina.

³⁹Kụ bụphe osugha bọ kọtol esi ọto rꞌamukum ologhi loor ịkaraph phọ ạbidi kụ ominenom yogh omuneen sịphe areelhe ạbumulogh-ḍien phọ anyina, kụ ọtuan esi ịkaraph ạburude phọ ạbidi kụ ọtol esi ọto kụ ọdaph bịdi ope.

⁴⁰“Bụo ẹemara phọ anyina kọgba ni ịkaraph phọ ạbidi omitiom, kụ ọḅile ootuma sịpioghom ạburude phọ ạbidi ọḅaar bọ ẹmhu esi ạmi, ụwile ịmi kụ roḍighi yogh ịpe ítu bọ ịne, kụ ụgbatanaan bọ ịmi

⁴¹kụ mị phọ kẹn mạgbatanaan ni bịdi ratelhe ḍịo ạmi, mị ạsighe bịdi ạki ạlogh sịphe areelhe ạbumulogh-ḍien phọ ạbidi. Eekuna phọ, mem dị ạnmuny ạnmuny phọ anyina osooromi loor kụ kosereghian ologhoma ịminimiin ạsipioghom mọ ạbidi rꞌiloghi phọ ạbidi úḍuna yogh bọ,

⁴²kụ mị agbi ọotughian ịyo phọ mị rꞌạJekob rꞌẠizik rꞌEbraham oghiran bọ, kụ mị ạḅile ạasa ịyo phọ ạmi ọngo awe phọ ạmi de phọ.

⁴³Ẹḅel phọ, tọrobo ịlo ẹrol, ẹkpe dị bịdi kọbile de phọ ạḍiphe, kụ ade phọ ẹmoogh iboh riiḍio ophooghian phọ ọdi, loor esi ịdipho bịdi úlho mun bọ sịphe ade phọ. Loor esi ịkaraph phọ ạbidi, ịdi eḍighi bọ ụḅitonaan ni iilogh phọ ạmi kụ aruwaloor ạbidi ụḅitonaan ịtooghi phọ ạmi kụ ẹdi ade phọ edi bọ ịdipho bịn, kụ bịdi ologhoma ịminimiin ạsipioghom mọ ạbidi.

⁴⁴Ghạlamo ịdipho bịdi odi bọ ni ẹpe areelhe ạbumulogh-ḍien phọ ạbidi, mị kạ́tu ịpe bịn amutonaan bịdi. Mị kạ́tu ịpe bịn akel bịdi ạḅitonaan bịdi, aguule bịdi, ạphue ịyo phọ bịdi rꞌạmi oghiran bọ. Mị kụ Ọmoogh-we Ẹnaan phọ ạbidi.

⁴⁵Mị kạasa ni ịyo phọ abugbogh ạburude phọ ạbidi rꞌạmi oghiran bọ, bụphe mị ạsighe bọ amitiom ạḍuanam ẹpe eelhe phọ Ijipt ịdi iiruen ạramha phọ ọmiin aani mọ mị kụ Ẹnaan ạbidi. Mị kụ Ọmoogh-we phọ.”

⁴⁶Ịphen phọ iilogh rꞌịtooghi dị Ọmoogh-we phọ ạloghonaan we phọ Ịzirel ạngo Mozis ẹpe Eegum aSainai.