Read abua Lịvitikos 27 Bible Online

Lịvitikos 27 - abua bible

Lịvitikos 27

¹Ọmoogh-we phọ ạngo Mozis

²ịtooghi ọdaph phọ ịphen ịlo awe phọ Ịzirel: “Oye lọ mọngo Ọmoogh-we phọ esi omuneni ạkiro oguanaan, oye phọ ọpo koseere ẹereegh esi ọkpeeghi ikpoki phọ ịphen,

³ọdaph ọkaraghi aḍiigbu ipoḍi asilva ịsiphe ạdol iigbia phọ: — emiigh bụlo mọman ịyaldi ạsia kụ esiemi odiinydi ạsia: ịlo oye, ooghdi ipoḍi asilva — ịlo ạnir, ịraardi ipoḍi asilva — ịlo olephiri, emiigh bụlo mọman oogh ạsia kụ esiemi ịyaldi ạsia: ịyaldi ipoḍi asilva — ịlo ọnyani, ḍioph ipoḍi asilva — ịlo ọbumoony, emiigh bụlo mọman oniin ụnwanyu kụ esiemi oogh ạsia, oogh ipoḍi asilva — ịlo ọbam ọnyani, ịraar ipoḍi asilva — ịlo okumoor oye emiigh bụlo mọman odiinydi ạsia kụ ẹghiom risigh, ḍioph rꞌoogh ipoḍi asilva — ịlo okumoor ạnir emiigh bụlo mọman odiinydi ạsia kụ ẹghiom risigh, ḍioph ipoḍi asilva

⁸“Kụ eru mạar dị oye phọ aguan bọ oguanaan phọ aḍighi uwekulom dị útue ụkpe ọkaraghi ịpe ẹman bọ, pọ sịghe oye phọ ạghiom oyil ạrikia phọ, kụ oyil ạrikia phọ kaseere ḍighi dị esoorom, ọdaphan ịpe oye phọ ạman bọ.

⁹“Kụ eru ẹnam dị oye ạsighe aru ọphighironom ẹkia ọngo Ọmoogh-we phọ, pọ tọrobo ẹlo oye ạsighe ạghi ọphighironom ẹkia ọngo Ọmoogh-we phọ eḍighi ni iigbia.

¹⁰Ọdi kúnme ẹnon ịyaar, kẹn kụ́sighe unmiom ẹnon ịyaar, kụ́sighe egeny únmiom ẹkaraph, kụ́sighe ẹkaraph únmiom egeny. Eru mạar dị ọdi ạsighe ẹnam kụ anmiom ẹnam, ẹpe ọdi ạsighe bọ kụ anmiom bọ rꞌẹpe onmiom bọ, ịyal phọ ịnam mọ eḍighi ịlo Ọmoogh-we phọ.

¹¹Kụ eru mạar dị ẹnam mọ ị́nighe ị́ḅaal ítu ọdo ịpe rọsighe ghan bọ kọphighironom ẹkia ọngo Ọmoogh-we phọ, pọ oye phọ ạsighe ẹnam mọ ạghiomonaan oyil ạrikia phọ.

¹²Oyil ạrikia phọ kụ kạaḅeghion apogh mụghumo ẹnighe ni mꞌị́nighe. Ịpe oyil ạrikia phọ ạmanami bọ kụ ịdi kẹtol.

¹³Kụ eru mạar dị oye phọ rạwa ọtagharan, pọ ọdi kạlogh ọḅar oogh abin ạḅaram rꞌịpe ịyaar phọ ẹman bọ kụ ạtagharanam.

¹⁴“Mem dị oye awoph otu ọdi aselemi aseere dọl iigbia ạngo Ọmoogh-we phọ, pọ oyil ạrikia phọ ạaḅeghion ni apogh mụghumo ạnighe ni mꞌọ́nighe. Ịlo oyil ạrikia phọ agbiighi, pọ ẹrol ịdipho.

¹⁵Kụ eru mạar dị oye phọ ọpo aseere bọ otu phọ ọdi dọl iigbia phọ, kụ ạḅile ạatughian mọ ọno kạtagharan otu phọ ọno, pọ ọdi kạlogh ọḅar oogh abin ạḅaram rꞌịpe otu phọ ạman bọ kụ ạtagharanam.

¹⁶“Eru mạar dị oye aseere pạkiri ade ọdi, dị eḍighi erua, kụ ạngo Ọmoogh-we phọ, pọ ḍighi phọ kọkpaariom esi ọdaph ọnhu ikpo iimuma dị kẹsighe ọzuph esi phọ, ogbi ghan ḍioph ipoḍi asilva esi ạtorobo ịyaldi igbogh ịtoom ẹemor abali.

¹⁷Eru mạar dị oye aseere ozo ọdi dọl iigbia emiigh lhạ ẹyaal iboh oḅula ọmoogh phọ, pọ aḍikpom aḍighi phọ kụ kẹtol.

¹⁸Eru mạar dị oye aseere ozo ọdi mem dị ạlha iboh ọmoogha loor phọ meten, pọ oyil ạrikia phọ kagbi sịa phọ ịpe esugha bọ kụ ẹteeny ḍiḍiman ạlha ẹyaal iboh ọmoogha aloor phọ, kụ agbi ikpoki phọ kụ amuton ịyaar esi ikpoki phọ ịpe nạ agbi bọ mọ ẹman bọ.

¹⁹Kụ eru mạar dị oye phọ ọpo aseere bọ ozo phọ ọdi dọl iigbia phọ kụ ạatughian mọ ọno kạtagharan ozo phọ ọno, pọ ọdi ạlogh ọḅar oogh abin ạḅaram rꞌịpe ozo phọ ạman bọ, pụruku ozo phọ aru ọlo ọdi.

²⁰Eru mạar dị ọdi aalha de phọ ọnon oye dị ọdi ụ́pur ụ́tagharan esi Ọmoogh-we phọ, ọdi atoph elhiom ọḅile ọtagharan.

²¹Ḍiḍiman ạlha ẹyaal iboh ọmoogha aloor phọ, mem mọ koḅulemi bọ ozo phọ, pọ ozo phọ uwotu phọ aseere bọ dọl iigbia phọ kaḍighi ọlo oyil ạrikia phọ.

²²“Eru mạar dị oye aseere ozo lọ ọdi agho, dị ítu pạkiri abin erua, kụ ạngo Ọmoogh-we phọ,

²³pọ oyil ạrikia agbi ịpe ozo phọ ạman bọ ẹsighe ẹteeny ḍiḍiman ạlha iboh ọmoogha aloor phọ kụ oye phọ ạngo ḍighi phọ ḍio phọ ạḍiphe; ikpoki phọ ịlo Ọmoogh-we phọ.

²⁴Kụ ẹteeny lhạ ẹyaal iboh ọmoogha aloor phọ, de phọ koḅulemi ọngo ọpo ạmoogh bọ de mꞌạnmuny ạnmuny ọdi.

²⁵“Oomo asiḍighi kogbi ghan ọkpaariom ọdaphan ọkaraghi ịpe ịto phọ ẹḅem bọ.

²⁶“Ọḅel ọony lọ ẹnam ẹmar maḍighi ẹlo Ọmoogh-we phọ. Esi ịduon oye káseere dọl iigbia phọ. Mꞌạnam mꞌoyool-ọga mꞌạtu-ọga, pọ ọlo Ọmoogh-we phọ.

²⁷Kụ eru ẹnam dị ị́ḅaal, pọ ọdi kạlogh ọḅar oogh abin ạḅaram rꞌịpe ẹnam mọ ẹman bọ kụ ạtagharanam. Kụ eru mạar dị rọ́tagharan, pọ koboola ọnon oye ḍighi phọ ạḍiphe ịto phọ ẹḅem bọ.

²⁸“Kụ tọrobo ịyaar dị oye mạnyagharaan ạngo Ọmoogh-we phọ esi oomo ạraraar phọ ịpe ọdi ạmoogh bọ, mꞌoye, mꞌẹnam, mꞌaleeny lọ ọdi alhe erua, pọ kótue ni obool, kótue kẹn ni ọtagharan. Tọrobo ịpe nạ magbiighi bọ kụ ạḅogh ạngo Ọmoogh-we phọ, pọ eḍighi ni iboom iigbia.

²⁹Oye lọ moruule mọ ophiemi kótue ni ọtagharan. Eeḅulemineen kị́tol, ikiigh bịn.

³⁰“Muniin abin esi aḍioph abin oomo ịpe ade phọ emitiom bọ, mꞌeḍien ịsiphe ade phọ mꞌiimuma ireeny phọ, pọ ịlo Ọmoogh-we phọ. Eḍighi ni iigbia.

³¹Eru mạar dị oye rạwa ọtagharan amuniin abin esi aḍioph phọ ịpe ọdi mạngo bọ Ọmoogh-we phọ, pọ ọdi ạlogh ọḅar oogh abin ạḅaram ịpe ọdi mạngo bọ kụ ạtagharanam.

³²Esi ạtorobo aḍioph ịnam rꞌịga rꞌoomo ịnam-otu, oniin kaḍighi ọlo Ọmoogh-we phọ.

³³Oye kúupuruan mụghumo ịduon phọ ẹnighe ni mꞌị́nighe. Ọdi kúunmeni. Kụ eru mạar dị aanmeni, pọ ẹpe ọdi ạsighe bọ kụ anmiom bọ rꞌẹpe ọdi aanmenenom bọ, ịyal phọ ịdi keḍighi ịlo Ọmoogh-we phọ kụ kọ́tagharanan mun.”

³⁴Ịphen phọ iilogh dị Ọmoogh-we phọ ạlogh ạngo Mozis ịlo awe phọ Ịzirel sịphe Eegum aSainai.