Read abua Lịvitikos 3 Bible Online

Lịvitikos 3 - abua bible

Lịvitikos 3

¹Tọrobo amem dị ọnyo anyina ratu ọphighiron ẹkia ẹboroph, ọdi ạsighe ghan nạm, mꞌạḍiya mꞌaḍilephiri, dị kẹ̋epuan loor, kụ ạpighironom.

²Oye phọ ạḅam ḍịghaagh ọdi ẹmhu ẹnam mọ, kụ aghiigh sịphe ọnhu-aḍibuo Ogbogo Ạdol Ọmoogh-we phọ, kụ ariil ạrikia phọ, ạnmuny phọ Eeron, ọsighe ịḅaal phọ ọsaraghi oomo ịsiphe enmeny phọ okitonom,

³kụ ẹkia ẹboroph phọ, ọsighe ẹnuum mọ eekpereghiom bọ ịpe ọkuruḅaka phọ rꞌoomo phọ ẹnuum mọ edi bọ ologhi phọ, oguom nịan ịdipho ẹkia dị ọphighironaan egbodo Ọmoogh-we phọ.

⁴Ọḅaram kẹn ịyal phọ ịkpinyoom mọ rꞌẹnuum mọ edimom bọ loor ạbidi, rꞌẹebogh ẹnuum mọ ẹpe ẹḅaram bọ sịphe ạni phọ, ọsighe.

⁵Kụ ariil ạrikia phọ ọsighe oomo phọ ịphen phọ oguom nịan sịphe enmeny phọ, ọḅaram rꞌạrikia oguom ạnian phọ. Ẹphen phọ ẹkia eeḅi eḍu dị oguom nịan ọngo Ọmoogh-we phọ.

⁶Kụ eru mạar dị ẹkia ẹboroph phọ eḍighi ẹlo oyool-ọga mꞌạtu-ọga, oye phọ ạsighe ghan ọlo loor kọ̋opuan.

⁷Eru oyool-ọga kụ rọphighironom ẹkia ẹboroph phọ, pọ ọdi ạsighe ghan ạghi egbodo Ọmoogh-we phọ kụ ạphighironaan.

⁸Ạḅam ḍịghaagh ọdi ẹmhu ọga phọ kụ aghiigh sịphe aḍibuo Ogbogo phọ, kụ ariil ạrikia phọ ọsighe ịḅaal phọ ọsaraghi oomo ịsiphe enmeny phọ okitonom,

⁹kụ sịphe ẹkia ẹboroph phọ, ọsighe ẹnuum mọ rꞌoomo ịpe ọkuruḅaka phọ, ẹphen ẹsoph phọ rꞌẹnuum mọ eekpereghiom bọ rꞌẹnuum mọ ẹpe edi bọ ologhi phọ rꞌoomo ẹnuum mọ edi bọ sịphe ọkuruḅaka phọ, oguom nịan ịdipho ẹkia dị ọphighironaan egbodo Ọmoogh-we phọ.

¹⁰Ọḅaram kẹn ịyal phọ ịkpinyoom mọ rꞌẹnuum mọ edimom bọ loor ạbidi, rꞌẹebogh ẹnuum mọ ẹpe ẹḅaram bọ sịphe ạni phọ, ọsighe.

¹¹Oḍighi oyil ạrikia phọ ọsighe ghan oomo phọ ịphen phọ oguom ạnian sịphe enmeny phọ. Ẹphen phọ ẹkia eḍien dị oguom nịan ọngo Ọmoogh-we phọ.

¹²Kụ eru ạtu-ọga kụ ạpighironom ẹkia ẹboroph, pọ oye phọ ạsighe ghan ạghi egbodo Ọmoogh-we phọ kụ ạphighironaan.

¹³Oye phọ ạḅam ḍịghaagh ọdi ẹmhu ạtu-ọga phọ, kụ aghiigh sịphe ọnhu-aḍibuo Ogbogo phọ, kụ ariil ạrikia phọ, ạnmuny phọ Eeron, ọsighe ịḅaal phọ ọsaraghi oomo ịsiphe enmeny phọ okitonom,

¹⁴kụ sịphe ẹkia ẹboroph phọ, ọsighe ẹnuum mọ eekpereghiom bọ ịpe ọkuruḅaka phọ rꞌoomo phọ ẹnuum mọ edi bọ sịphe ologhi phọ, oguom nịan ịdipho ẹkia dị ọphighironaan egbodo Ọmoogh-we phọ.

¹⁵Ọḅaram kẹn ịyal phọ ịkpinyoom mọ rꞌẹnuum mọ edimom bọ loor ạbidi, rꞌẹebogh ẹnuum mọ ẹpe ẹḅaram bọ sịphe ạni phọ, ọsighe.

¹⁶Oḍighi oyil ạrikia phọ, ọsighe ghan oomo phọ ịphen phọ oguom ạnian sịphe enmeny phọ. Ẹphen phọ, ẹkia eḍien dị oguom nịan ọngo Ọmoogh-we phọ. Oomo phọ ẹnuum mọ ịlo Ọmoogh-we phọ.

¹⁷Iilogh phọ ịphen eru eḍighinom ịyaar kꞌanyina kꞌagee-pọ oghiil atum oghiil: ị́ba ghan ẹnuum, ị́ba ghan ịḅaal.