Read abua Lịvitikos 6 Bible Online

Lịvitikos 6 - abua bible

Lịvitikos 6

¹Ọmoogh-we phọ ạngo Mozis ịinua mọ,

²“Ọdo awe phọ ạbuen ọphighoronaan ghan ẹkia ọkpe-oḅulemi, ịdi eḍighi bọ bịdi mọpioman oḍighi ịkaraph risigh Ọmoogh-we phọ: oye lọ úḅulemi matuman ọdi ịlo aruphua dị ọngo nyọdi mọ ạmaar aseere, oye lọ ạsighe ekpeḍien kụ ạsighenom ịyaar ọnon oye, mụghumo aagbegheḍiom matuman ọdi, mụghumo ami rạraar ọdi,

³mụghumo aḅom ịyaar ọnon oye lọ ephe kụ ạpharanaan, bịn apu akunya yogh.

⁴Mem lọ oye aḍighi ịkaraph dị ephum ni nyọdi, pọ ọdi aḅulemi ghan ịyaar phọ ẹpe ọdi ạsighe bọ reten imi kụ ạsighenom ạkpe, mụghumo ẹlo ọdi ạsighe ekpeḍien kụ ạsighenom, mụghumo ẹlo ọngo nyọdi oseenaan, mụghumo ẹlo ephe kụ aḅom.

⁵Esi oomo phọ ịpe ọdi ạtu bọ kụ aghunya yogh, iikunya ọkpe phọ ọdi, loor ạraraar phọ ịpe ọdi ạsighe bọ, pọ ọdi aḅulemi oomo phọ ịdi ạlogh ọḅar bin oogh abin ạḅaram ạngo uwo ạraraar phọ.

⁶Ọdi ạsighe odughuna mꞌạtu-ọga lọ kọ̋opuan loor, ạsighe aru ạphighironom ẹkia ọkpe-oḅulemi phọ ọdi ạngo Ọmoogh-we phọ; ạtomaam ọlo ạman ḍighi ịkaraph apum mọ.

⁷Kụ oyil ạrikia phọ awoph nyọdi egbodo Ọmoogh-we phọ, pụruku mọsar ịkaraph phọ ọdi ọwilenaan esi oomo ạraraar iigbegheḍiom mọ ọdi aḍighi yogh bọ.”

⁸Ọmoogh-we phọ ạghaaph ạḅeni Mozis

⁹mọ ạḅeni Eeron rꞌạnmuny phọ ọdi mọ, “Ịphen phọ kụ iilogh ịlo ẹkia oguom ạnian phọ. Ịdi eḍighi bọ ẹdi phọ ẹkia oguom ạnian, ẹrol sịphe enmeny phọ oomo aḍughul phọ kụ ẹemor ghan tụtu ẹḅaal.

¹⁰Oyil ạrikia phọ ạkpologhian ogudaguda ạsuoma phọ ọdi, ạlogha ọyegheyeghe ekulha anika phọ ọdi, kụ ạsighe ọoru phọ ọpo ạnian phọ mẹmoogh bọ ẹkia oguom ạnian phọ edi bọ ạnyu enmeny phọ, aseere ịigaany enmeny phọ.

¹¹Oyil ạrikia phọ ạkporonaan ạsuoma phọ ọdi anme ibura kụ ạsighe ọoru phọ ạḍuanam arugbogo phọ ạghimom esi ịisua phọ.

¹²Kụ ạwile nịan phọ edi bọ sịphe ạnyu enmeny phọ eemor ghan ni kíḍim. Kụ oyil ạrikia phọ atumughi ghan ịpe tọrobo ạḍiroor, kụ ạsighe ghan ẹkia oguom ạnian phọ ạmaar ghan asereghi sịphe ạnyu enmeny phọ, kụ ạsighe ẹnuum ẹkia ẹboroph phọ aguom nịan.

¹³Ạnian phọ kíḍim ghan rꞌamem, ẹemor ghan bịn ạnyu enmeny phọ.”

¹⁴“Ịphen phọ kụ ịinua ọlo ịyaar aghuḍum ịbiakpa phọ. Oyil ạrikia kꞌạnmuny phọ Eeron ạphighironaan ghan ẹkia phọ ẹphen phọ egbodo Ọmoogh-we phọ sịphe elhor enmeny phọ.

¹⁵Ọdi akpoph ẹezua ạḍighaagh ịgbieneen ịbiakpa phọ rꞌạmunum mọ rꞌịnsens phọ edi bọ sịphe aloor ịinua ẹkia ịbiakpa phọ, ạsighe ạkpooniom nịan sịphe enmeny phọ epur eeḅi eḍu, eḍighi ịyaar ọsighe ghan kụ ọotughianam esi Ọmoogh-we phọ.

¹⁶Eeron rꞌạnmuny phọ ọdi ọsighe ịpe esugha bọ olhe, ọḅaram rꞌạbred dị yist ụ́logh; ọrol sịphe esi iigbia, sịphe oghoony Ogbogo Ạdol Ọmoogh-we phọ, kụ ole.

¹⁷Kụ́ḅaram ịlo ọlogh yist kụ ọgbaghaḍiom. Mụphe phọ abin ẹkia ịkpuy dị mị ạngo bịdi. Ịyaar aghuḍum mọ ẹphen rꞌẹlo ịkaraph phọ rꞌẹlo ọkpe-oḅulemi phọ, eḍighi ni iigbia ni iboom.

¹⁸Oomo alephiri ạnmuny phọ Eeron kụ olhe ni. Eḍighi eḍighinom ịyaar kꞌagee-pọ, oghiil atum oghiil phọ kꞌanyina, ịlo ẹkia ọngo Ọmoogh-we phọ. Ọlo ạḅogh, pọ aako ghan loor ọdi ạrol dọl iigbia.”

¹⁹Ọmoogh-we phọ ạghaaph ạḅeni Mozis mọ,

²⁰“Ẹphen phọ ẹkia ẹlo Eeron rꞌạnmuny phọ ọdi, dị ọdi ạpighironaan Ọmoogh-we phọ ḍio phọ ạḍiphe kodeneghi bọ nyọdi otene oyil ạrikia phọ. Ọdi ạsighe ghan oniin ogbogh ọtoom ịgbieneen ịbiakpa phọ ạphighironom ẹkia ẹlo oselemian aloor rꞌẹboroph. Adi ạsighe ạpakiri abin aḍighinom ḍịroor, ạsighe pạkiri aḍighinom ḍughul.

²¹Ạlogh ni ologhi ọnyoki ạsighe mụnum ạlogh kụ ạgbaghaḍi, kụ ạsighe aru. Ạkiriph aḍighi ịpherepe ạsighe, ịlo ẹkia ịbiakpa phọ dị kạpighironaan dị kepur eeḅi eḍu esi Ọmoogh-we phọ.

²²Oyil abiil lọ ạḍua ọkuruḅaka ạnmuny phọ Eeron kụ amite lọ modeneghi mọ ạsighe esi phọ ọdi, kụ kạpighiron ghan ẹkia phọ ẹphen ạngo Ọmoogh-we phọ. Ịphen phọ iigbia dị kẹtol kꞌagee-pọ. Oomo phọ ịdi oguom ghan nịan.

²³Tọrobo ịyaar aghuḍum ẹlo ịbiakpa dị oyil ạrikia phọ kụ aḍighi, koguom ni nịan oomo phọ ẹdi.”

²⁴Ọmoogh-we phọ ạghaaph ạḅeni Mozis mọ ịphen kụ ịinua dị Eeron rꞌạnmuny phọ ọdi kooko ghan ịlo ẹkia ịkaraph mọ,

²⁵“Nyina keḍighi ghan ịyaar aghuḍum mọ sịphe ạga ephunom enmeny phọ ẹphen sịphe rọze ghan bọ ịnam mọ koguom bọ nịan phọ. Eḍighi ni igbogh iigbia.

²⁶Oyil ạrikia phọ kạpighiron bọ ẹkia phọ ẹphen alhe ni, ạrol sịphe esi iigbia kụ alhe, sịphe erugh Ogbogo Ạdol Ọmoogh-we phọ.

²⁷Oye mꞌịyaar lọ kạḅogh ịinua ẹkia phọ pọ aako loor ọdi ạrol dọl iigbia. Mem lọ rọsaraghi ịḅaal phọ kụ ẹteeny ạsuoma oye, pọ oye phọ ạsighe ạsuoma phọ ọdi ạghi aatol esi lọ eḍighi iigbia.

²⁸Ịnyoki phọ ọsaam bọ ịnam mọ oḅomoghi; kụ eru mạar dị ọsaam ogeny aguugh, pọ oghorogh ootol ọkuami.

²⁹Oomo alephiri ạnmuny phọ Eeron kụ olhe ghan. Eḍighi ni igbogh iigbia.

³⁰Tọrobo ẹkia dị ọpighiron oselemian aloor kụ mọsighe ịḅaal phọ oḍighom ologhi Ogbogo phọ kụ ọrol sịphe Ạdol Iigbia phọ kụ owoph oye, pọ oye kúlhe ọsighe oguom nịan.”