Read abua Lịvitikos 8 Bible Online

Lịvitikos 8 - abua bible

Lịvitikos 8

¹Ọmoogh-we phọ ạto ạḅeni Mozis mọ,

²“Sịghe Eeron rꞌạnmuny phọ ọdi rꞌibura rꞌạmunum-ịko rꞌaḍilephiri ạnam ịlo ẹkia ịkaraph, rꞌịyal idughuna rꞌegunum ạbred dị yist ụ́logh,

³kụ aakpomoghi ḍita awe phọ sịphe ọnhu-aḍibuo Ogbogo Ạdol Ọmoogh-we phọ.”

⁴AMozis ạtuugh ịpe Ọmoogh-we phọ ạto bọ ạngo nyọdi aḍighi kụ oomo awe phọ ookpomoghan.

⁵Kụ ạḅeni mọ, “Ịphen phọ ịdi Ọmoogh-we phọ ạḅem mọ yira oḍighi.”

⁶Kụ aMozis ạsighe mụum ạḍiḅaal awur Eeron rꞌạnmuny phọ ọdi.

⁷Kụ ạsighe ạsuoma iikpera ạraghaagh phọ ạay bọ ekpologhi phọ ạkpologhi Eeron, ạsighe okuughaam mọ akuugh nyọdi, ạsighe ibura phọ awur nyọdi, kụ ạsighe dọni phọ ạkpologhi, ạsighe oodugha okuughaam ạdoni phọ ạkagh aghiiny akitonom.

⁸Kụ ạsighe ọsuaram ekpologhi ạkpologhi nyọdi, kụ ạsighe Yurim rꞌaTumim ạkomoghi sịphe ọsuaram ekpologhi phọ,

⁹kụ ạsighe eghoony abiil phọ azu ẹmhu ọdi, kụ ạsighe sigol ạdamaghi elhor eghoony iigbia phọ, ịdipho Ọmoogh-we phọ ạto bọ ạngo nyọdi.

¹⁰Ịphen reten kụ aMozis ạsighe mụnum-ịko phọ adeneghiom Ogbogo Ạdol Ọmoogh-we phọ rꞌoomo phọ ạraraar ịsiphe Ogbogo phọ ạḅogh ạngo Ọmoogh-we phọ,

¹¹kụ ạsighe mụnum mọ adeneghi enmeny phọ oḍual amem, ạsighe mụnum mọ adeneghi enmeny phọ rꞌoomo ạraraar ịlo ịsiphe enmeny phọ, rꞌogbogh aguugh aruwol phọ ạasa.

¹²Kụ ạsighe mụnum mọ aaku ẹmhu Eeron, adeneghiom nyọdi, ạrolomi nyọdi dọl iigbia.

¹³AMozis ạḅile ạsighe rụsuaram ekpologhi phọ ạkpologhi nmụny phọ Eeron, ạsighe ikuughaam iidugha phọ akuughogh bịdi, azuughi bịdi roghoony ariil ạrikia, ịdipho Ọmoogh-we phọ ạto bọ ạḅeni nyọdi.

¹⁴Kụ aMozis ạsighe aru ḍilephiri ạnam mọ kọpighironom bọ ẹkia ịkaraph phọ, Kụ Eeron rꞌạnmuny phọ ọdi ọsighe rạghaagh ạbidi ọzuom ẹmhu aḍilephiri ạnam mọ koḍighinom bọ ịyaar aghuḍum mọ.

¹⁵Kụ aMozis aghiigh ḍilephiri ạnam mọ, ạsighe ghụnugh ọdi atiom ịḅaal phọ adoghoḍi iniin ologhi ạraphaal ịsiphe enmeny phọ akitonom; kụ ạsighe ịpe esugha bọ aaku eeḍian ude enmeny phọ ịlo owophom ọosa oseere dọl iigbia.

¹⁶AMozis ạsighe oomo ịpe ologhi phọ, nị phọ, muupuph phọ, ịkpinyoom mọ, ḍiḅalalaany phọ rꞌẹnuum mọ aguom nịan sịphe enmeny phọ.

¹⁷Kụ ozu ạnam mọ rꞌịlha phọ ọdi rꞌạriir phọ ọdi, ọdi ạsighe ạḍuanam sịphe arugbogo phọ kụ aguom nịan, ịdipho Ọmoogh-we phọ ạḅeni bọ nyọdi.

¹⁸Ịphen reten kụ aMozis ạsighe odughuna phọ koḍighinom bọ ịyaar aghuḍum oguom ạnian phọ, kụ Eeron rꞌạnmuny phọ ọdi ọsighe rạghaagh ạbidi ọzuom ẹmhu odughuna phọ.

¹⁹Kụ aMozis aghiigh odughuna phọ kụ ạsighe ịḅaal phọ ạsaraghi oomo ịsiphe enmeny phọ akitonom.

²⁰Kụ ạkanyan ạkiriph ịpherepe, kụ ạsighe mụum aatolom ịpe ọkuruḅaka phọ rꞌaruwol phọ, kụ ạsighe ẹmhu phọ, ịpherepe phọ rꞌẹnuum mọ aguom nịan sịphe ạnyu enmeny phọ, ịdipho Ọmoogh-we phọ ạḅeni bọ nyọdi. Ẹphen phọ ịyaar aghuḍum ịbiakpa, ẹkia eeḅi eḍu dị ọphighironom nịan ọngo Ọmoogh-we phọ.

²²Ịphen reten kụ Eeron ạsighe nyọori phọ odughuna phọ, odughuna ọphon ọlo ịko ariil ạrikia. Kụ Eeron rꞌạnmuny phọ ọdi ọsighe rạghaagh ạbidi ọzuom ẹmhu odughuna phọ.

²³Kụ aMozis aghiigh odughuna phọ, ạsighe ịḅaal phọ ạsagharan aḅeri-elhiom Eeron, ạḅile ạsagharan kugbogh ạghunugh elhiom ọdi, ạḅile ạsagharan kugbogh ạghunugh owol ọdi.

²⁴Kụ aMozis ạsighe nmụny phọ Eeron, ạsighe ịḅaal phọ ạsanyan reḅeri elhiom ạbidi rꞌạsunugh elhiom ạbidi rꞌigbogh ạsunugh aruwol elhiom ạbidi; kụ aMozis ạsighe ịḅaal phọ ạsaraghi oomo ịsiphe enmeny phọ akitonom.

²⁵Kụ ọdi ạsighe ẹnuum mọ, eboom mọ ẹsoph phọ rꞌoomo phọ ẹnuum mọ eekpereghiom bọ ịpe ọkuruḅaka phọ, rꞌamuupuph phọ ạzuom bọ nị phọ, rꞌịkpinyoom mọ rꞌẹnuum mọ ạbidi, rꞌowol elhiom mọ.

²⁶Kụ ọdi ạghi sịphe egunum ạbred phọ yist ụ́logh bọ oseere bọ egbodo Ọmoogh-we phọ, ạsighe eniin eeḅoghoḍi rꞌoniin akek rꞌoniin ẹpeḅere opoḍi ạkikia, ạsighe ạḅam ạnyu ẹnuum mọ rꞌạnyu aḍiphe-elhiom mọ.

²⁷Kụ ọdi ạsighe oomo phọ ịdi ạlogh rạghaagh Eeron rꞌạraghaagh ạnmuny phọ Eeron, kụ ạsighe ạgbanyan bịdi, ạphighiron ẹkia phọ ẹphen egbodo Ọmoogh-we phọ.

²⁸AMozis ạsighiogh rạraar phọ rạghaagh ạbidi ạsighe aguom nịan sịphe ạnyu enmeny phọ sịphe ạrikia oguom ạnian phọ, dị ọosa oḍighi ẹkia eeḅi eḍu, ẹkia ịpophoghi dị oḍighi ọngo Ọmoogh-we phọ.

²⁹AMozis ạsighe mạmaam mọ odughuna phọ oḍighinom bọ ịyaar aghuḍum iwopha phọ ạgbanyan egbodo Ọmoogh-we phọ. Ạmamaam mọ ọlo Mozis, ịdipho Ọmoogh-we phọ ạḅeni bọ nyọdi.

³⁰AMozis ạsighe mụnum-ịko phọ rꞌịḅaal phọ ẹrol bọ sịphe ạnyu enmeny, ạsighe ạsaraghi Eeron rꞌạrusuoma phọ ọdi, ạsaraghi nmụny phọ ọdi rꞌạrusuoma ạnmuny phọ ọdi, awoph bịdi rꞌạrusuoma phọ ạbidi.

³¹AMozis ạḅeni Eeron rꞌạnmuny phọ ọdi mọ, “Ịsighe ịnam mọ ẹsa sịphe ọnhu-aḍibuo Ogbogo Ạdol Ọmoogh-we phọ. Ịtol sịphe kụ ele, elhiom rꞌạbred ịko phọ odi bọ sịphe egunum mọ, nyọpo mị ạḅem ghan bọ mọ Eeron rꞌạnmuny ọdi kụ kole.

³²Ịnam mọ rꞌạbred lọ asugha, pọ ịsighe eguom nịan.

³³Nyina kẹtol bọ sịphe ọnhu-aḍibuo Ogbogo phọ oḍual aḍughul-otu, tụtu asuḍughul-otu ịko phọ anyina emunughan. Asuḍughul-otu ịko phọ anyina ẹman bọ oḍual aḍughul-otu.

³⁴Ịphen phọ yoor oḍighi bọ rodon kụ ịdi Ọmoogh-we phọ ụḅeni iyoor mọ oḍighi pịdi iwoph inyina ọsighe esi ịkaraph phọ, ookpereghi ịkaraph phọ anyina.

³⁵Kụ iḍighi nyina kẹtol bọ sịphe ọnhu-aḍibuo Ogbogo phọ oḍual aḍughul rꞌoḍual ootaany. Ịtuugh ịpe Ọmoogh-we phọ ạḅem bọ eeko ghan, ọbo nyina kemugh ghan bọ. Ọphon phọ kụ ologh phọ ọlogh bọ ụḅeni ịmi.”

³⁶Kụ Eeron rꞌạnmuny phọ ọdi ọtuugh oomo phọ ạraraar phọ ịpe Ọmoogh-we phọ ạlogh bọ ologh ạḅogh ạngo Mozis oḍighi.