Read abua Jerimaya 1 Bible Online

Jerimaya 1 - abua bible

Jerimaya 1

¹Ạḍinya phọ ạḍien eḍighi ọghaaph dị aJerimaya ạghaaph. Ọdi ọony ạHilkaya, oniin oyil ạrikia ẹpe ẹmha phọ Anatot ẹpe eelhe phọ ạBenjamin.

²Ọmoogh-we phọ ạḅeni ni Jerimaya mem dị aJosaya ọony Ạmon mạda Juda ḍioph rꞌịraar ạsia,

³ḅịle kẹn ọdi ạḅaanaan ni nyọdi mem dị aJehoyakim ọony aJosaya kụ ạda. Ịphen phọ reten kụ Ọmoogh-we phọ ạḅaanaan ni nyọdi ịbadi amem tụtu ẹteeny ḍioph rꞌaḍiniin ạlha esi amem mọ ọpo ạZedekaya ọony phọ aJosaya ạda bọ. Omuneniom oogh ụnwanyu ạlha phọ ạḍiphe kụ ẹdi ọsighe bọ weye phọ aJeruselem ọghi oseere dọl iiruen phọ.

⁴Ọmoogh-we phọ ụḅeni ni ịmi mọ,

⁵“Mị ụsaḅar ri nyịna kụ mị agbi bọ ọngo ạna ghuḍum mọ, ḅịle kẹn tụtu kọmar bọ nyịna mị mạsaḅar ri nyịna mọ ḍighi oyil Ẹnaan ẹpe areelhe phọ.”

⁶Kụ mị ạphagharanaan mọ, “Ọkar Ogbogh Ọmoogh-we, mị úlegheri ịlo ọghaaph ịyaar; mị aḍighi ọbumoony ạpughan.”

⁷Kụ Ọmoogh-we phọ ụḅeni ni ịmi mọ, “Kạ́ḅem mọ nạ aḍighi ọbumoony ạpughan. Kịa ghụn ạteeny weye phọ mị rarom bọ nyịna, ạḅile ạḅeni bịdi tọrotoro ịyaar lọ mị ạto ạḅeni nyịna.

⁸Kákiilaan bịdi loor esi dị mị kạrolan ni nyịna aako nyịna. Mị Ọmoogh-we phọ kụ ụḅem.”

⁹Kụ Ọmoogh-we phọ asele ḍịghaagh ọdi, ạḅogh ịidoronhu ạmi kụ ụḅeni ịmi mọ, “Ler rụru, mị rạngo nyịna ikpo ọnhu dị nạ kạkaaph.

¹⁰Rodon phọ mị mạngo nyịna ịikpo apeleghiom rạmha rꞌareelhe ịlo oruphuron rꞌolereghi, oogulemi rꞌọkpar opu, ọlogh ọmeremi rꞌọzuph.”

¹¹Ọmoogh-we phọ upuru ịmi mọ, “Jerimaya, nạ rạmiin ghan eeghia?” Mị ạphagharanaan mọ, “Ọla ọmir-ighool.”

¹²“Nạ ạmiin ni agey,” Ọmoogh-we phọ ạḅem, “ḅịle kẹn mị ragon ni ọmiin mọ ikpo ọnhu phọ ạmi emite ni.”

¹³Kụ Ọmoogh-we phọ ạḅile ụḅaanaan ịmi. Ọdi apuru mọ, “Eeghe kụ ẹnon ịyaar dị nạ ạmiin?” Mị ạphagharanaan mọ, “Mị ạmiin guugh dị rapul ẹpe ephunom mọ kụ rạwa ozuan oru ạḍighaagh phọ ạḍien.”

¹⁴Kụ ọdi ụḅeni ịmi mọ, “Oogulemi kapul ẹpe ephunom mọ kụ azuughiom oomo awe lọ odi sịen ade phọ ạḍien,

¹⁵loor esi dị mị rạmagh oomo areelhe phọ edi bọ ẹpe ephunom mọ mọ oru. Ạbudaam mọ ạbidi kosereghi sịgada ọdaam-ẹmha phọ ạbidi sịphe ạrunhu-aḍibuo phọ aJeruselem ḅịle kẹn okitonom iikpe phọ ọdi, kụ ọḅile okitonom ịpheri phọ ạramha phọ aJuda.

¹⁶Mị kạliom ni weye phọ ạmi loor esi dị bịdi moḍighi ịkaraph; bịdi mụḅitonaan ịmi kụ rọpinyon ghan rịkia kọngo ruru, ọḅile ọkaaghi nmụny aghuḍuul kụ rọoḅereghi ghan.

¹⁷Kookolobian, Jerimaya; kịa ạḅeni bịdi tọrotoro ịyaar lọ mị ạḅeni nyịna ọghaaph. Kákiilaan bịdi nyịidipho ọbo mị kaḍighi ghan bọ ịdi nạ kạkaraghi akiilaan mem lọ nạ ọdi rꞌạbidi.

¹⁸Ler rụru, Jerimaya! Tọrotoro oye lọ odi sịen ade phọ ạḍien — ạbudaam mọ aJuda, ạbuo ịtooghi phọ, ariil ạrikia phọ ḅịle rꞌawe phọ — kọnyaam ni nyịna. Kụ ọlo rodon mị rạngo nyịna ịnyaam ọmerenyan ạbidi; nạ kạkigh ẹmha dị oghoony, ẹko dị oḍighinom okuron, iikpe dị ọḅiirom enaba. Bịdi nyina kọ́kpar ópu loor esi dị mị kạrolan ni nyịna ạḅile aako nyịna. Mị Ọmoogh-we phọ kụ ụghaaph.”