Read abua Jerimaya 11 Bible Online

Jerimaya 11 - abua bible

Jerimaya 11

¹Ọmoogh-we phọ ụḅeni ịmi mọ,

²“Nạghan iilogh ịyo phọ. Ḅẹni weye phọ aJuda rꞌaJeruselem

³mọ mị Ọmoogh-we Ẹnaan phọ Ịzirel maronyon tọrotoro oye lọ ụ́daphan iilogh ịyo phọ ịphen.

⁴Ịphen kụ ịyo phọ mị aghiran bọ rꞌạburude ạburude phọ ạbidi mem mọ mị ạsighe bọ bịdi amitiom ẹpe Ijipt, de phọ ạḍiphe ẹghigh bọ egu ạnian esi ạbidi. Mị ụḅeni bịdi mọ ụnaghanan ịmi ọḅile oḍighi tọrotoro ịyaar lọ mị mạto. Mị ụḅeni ni bịdi mọ eḍighi ịyaar lọ bịdi ọnaghanan, bịdi koḍighi ni weye ạmi ḅịle kẹn mị kaḍighi Ẹnaan ạbidi.

⁵Ọpo kụ amem dị mị kaḍighi ịpe mị aguanaan bọ bụrude ạburude phọ ạbidi mọ mị kạngo bịdi ịma ade ẹnuum mọ bịdi mọmoogh bọ.” Mị ameera mọ, “Ii, Ọmoogh-we.”

⁶Kụ Ọmoogh-we phọ agbi ọḅeni ạmi mọ, “Kịa ẹpe igbogh ạramha phọ aJuda rꞌẹpe aroḅodo phọ aJeruselem. Gbeelom dom mọ ạmi ẹpe phọ ạḅile ạḅeni weye phọ mọ ọnaghan iilogh ịyo phọ ọḅile ọdaphan.

⁷Mem mọ mị ạsighe bọ bụrude ạburude phọ ạbidi amitiom ẹpe Ijipt, mị ụphur ri bịdi rụru mọ bịdi ụnaghanan ịmi, kụ mị rạpur ghan ni rụru awe phọ tụtu kꞌarodon.

⁸Kụ ọlo bịdi ụ́naghanan ḅịle ụ́daph. Kpạripe ghụn, tọrotoro oye abeeph ạḅile ạḅaar ẹmhu bịn kụ odimom ghan. Mị mạto ni ạngo bịdi mọ ọmaar ọpham ịyo phọ, kụ ọlo bịdi úmeera. Kụ iḍighi kụ mị ạlhiom bọ bịdi ạdaphan ịdipho ịyo phọ ẹḅem bọ.”

⁹Kụ Ọmoogh-we phọ ụḅeni ịmi mọ, “Awe phọ aJuda rꞌaJeruselem romitenom ẹkaraph ezue ghuḍum ạmi.

¹⁰Bịdi moḅula ọḅile roḍighi yogh ịkaraph ạburude ạburude phọ ạbidi, bụphe úmeera bọ úḍighi ịpe mị ạḅem bọ; bịdi mọoḅereghi ịnon ạrumugh. Ịzirel rꞌaJuda mọka ịyo phọ mị aghiran bọ rꞌạburude ạburude phọ ạbidi.

¹¹Kụ iḍighi kụ nyịidipho mị Ọmoogh-we phọ rạpur bịdi rụru mọ mị kaagulemi bịdi, ḅịle kẹn bịdi kókpetenaan. Ḅịle kẹn, mem lọ bịdi omoghi uphoghom ịmi ọlom ọloghonaan ạḍighaagh, mị kạ́naghanan bịdi.

¹²Ọpo kụ amem dị awe phọ aJuda rꞌawe phọ aJeruselem kọki ọteeny rụmugh phọ ịpe bịdi rọngooghi ghan bọ rịkia phọ kụ omoghiom ọloghonaan ạḍighaagh. Kụ ọlo ạrumugh phọ ịpe phọ kétue ẹpel bịdi mem mọ ịiḅaghami phọ ịphen phọ ketu bọ.

¹³Awe phọ aJuda ọmoogh rụmugh dị eḍiza ịdipho igbogh ạramha phọ ạbidi eḍiza bọ, ḅịle kẹn awe phọ aJeruselem mọkanagh renmeny omuzeḍi ịdipho aroḅodo phọ emuza bọ ẹmha phọ, renmeny dị kọpinyon ghan rịkia ọngo ọḅoria phọ aBaal.

¹⁴Jerimaya, kákol mun rụmhu awe phọ ạbuen ụuḅereghian ịmi. Mem lọ bịdi odi esi ịiḅaghami kụ ọlo ụmagh ịmi ọlom ọloghonaan ạḍighaagh mị kạ́naghanan bịdi.”

¹⁵Ọmoogh-we phọ ạḅem mọ, “Awe phọ mị ạphomoghian bọ roḍighi ịkaraph ạraraar. Ẹekpia eeghe kụ bịdi odi bọ sịphe Otu Ịiḅereghi phọ ạmi? Bịdi rogbiom ghan mọ bụno kotue ni oguanaan ruguan ọḅile ọsighe ịnam ọpinyonom rịkia bịn okpetenaan ịiḅaghami phọ retu bọ ḍụghum? Ịpe phọ ketue ni ẹngo bịdi ọḅaal ologhi ḍụghum?

¹⁶Amem ịrol li dị mị aghol bịdi mọ ọliv dị ạmoogh rịnya rꞌịma iimuma; kụ ọlo nyịidipho mị kạsighe ẹḍogh dị ẹghigh ọomaany kụ mị ạloghom nịan rịnya phọ rꞌịla phọ ọdi.

¹⁷“Mị Ẹnaan Oomo Ịikpo Ọmoogh-we phọ kụ ụzuph Ịzirel rꞌaJuda; kụ nyịidipho mị rạpaar ghan ophiemi ạbidi. Bịdi kụ ụwa ni ịphen phọ loor esi dị bịdi moḍighi ịkaraph; bịdi moḍighi ịdi repin ologhi ạmi esi ọphinyon ạrikia ọngo aBaal.”

¹⁸Ọmoogh-we phọ ụḅeni ni ịmi ịlo ịkaraph aruuzue dị ẹpomoghian phọ ạmi umitenom ịmi.

¹⁹Mị ụghigh ịdipho ọony oyool-ọga dị rọki oghiigh, kụ mị úlegheri mọ pọ ụtuan ịmi kụ rogbiighi bọ oḍighi ịkaraph phọ ịpe phọ. Bịdi ụḅem ghan mọ, “Ịgua obenogh oreeny phọ olher sịen ọdi odi bọ gbadaam mọ; ịgua oghiigh nyọdi bịn oye kạ́atughian mun nyọdi.”

²⁰Kụ mị ạaḅereghi mọ, “Ẹnaan Oomo Ịikpo Ọmoogh-we phọ, nạ oogboom iiḅi ịiruen; nạ rạmiin ghan ni ịitughian awe. Mị mạḅogh ḍighiton phọ ạmi ạlogh rạghaagh ạna; kụ iḍighi kụ mị odi ni ragon ọmiin dị nạ maḅulemian weye phọ ạbuen.”

²¹Awe phọ Anatot rụwa ghan ịmi oghiigh, ḅịle kẹn bịdi ụḅeni ni ịmi mọ bụno kughiigh ni ịmi eḍighi ịyaar lọ mị agbeelom dom Ọmoogh-we phọ ạghiom risigh.

²²Kụ iḍighi kụ Ẹnaan Oomo Ịikpo Ọmoogh-we phọ ạḅem mọ, “Mị kạliom ni bịdi! Kọze ugheel ạnmuny phọ ạbidi erugh ẹgham; ạnmuny phọ ạbidi komuughu loor esi ịgbakuro.

²³Mị mạsaḅar mem dị koogulemi weye phọ Anatot kụ mem dị amem mọ ẹteeny rꞌoniin ọnyo ạbidi kákpetenaan.”