Read abua Jerimaya 16 Bible Online

Jerimaya 16 - abua bible

Jerimaya 16

¹Ọmoogh-we phọ ạḅile ụḅaanaan ịmi kụ ạḅem mọ,

²“Kápin ạnir ạ́moogh ịbam ạnmuny esi dị ẹrol ịduon.

³Mị kạḅeni nyịna ịdi kemitenaan ịbam ạnmuny dị ọmar sịen ḅịle kẹn rꞌạburude phọ rꞌaburunhiin phọ ạbidi.

⁴Ịkaraph ạreezegh kụ kẹze bịdi, ḅịle kẹn oye kámoghi bịdi mụghumo oḍiighi ạbidi. Aḍizu phọ ạbidi kẹmina yogh ịdipho egu ẹenir sịphe ade phọ. Bịdi komuughu erugh ẹgham mụghumo esi ọkoony, kụ aḍizu ạbidi eḍighi eḍien ịnun rꞌilhom ịnam.

⁵“Otu lọ ọto odi úḍigh ghan. Kạ́tuan oye ámoghi. Mị kạ́sephom mun weye phọ ạmi rꞌẹepho mụghumo oḍeenaan ạbidi ẹphomoghian rꞌọnma ighirigiir.

⁶Ạraalha phọ rꞌarukulom mọ komuughu ni sịen ade phọ ạḍien, kụ ọlo oye kámoghi bịdi mụghumo oḍiighi ạbidi. Oye kạ́logha ẹlem loor ọdi mụghumo oghula ẹmhu ọdi esi oḍeenaan ọto.

⁷Oye kálian eḍien mụghumo ọphughol amiim rꞌọnon oye esi ọodereghiom ọdi mem lọ oye ẹphomoghian ọdi amugh. Oye kạ́nma ighirigiir ghạlamo rꞌoye lọ ọde phọ mꞌonhiin phọ amugh.

⁸“Otu lọ awe role ẹyaal úḍigh ghan. Kạ́tol ude alian eḍien rꞌạbidi mụghumo ọphughol amiim.

⁹Ler rụru esi ịphen mị Ọmoogh-we Egbogh Ẹnaan phọ Ịzirel rạwa bọ ọḅem mọ. Mị kámeera mun mọ ẹḍogh iboh rꞌọḅaal ologhi esi apinien ẹrol. Awe phọ ạbuen phọ kọtol li kụ ọmiin ịphen phọ dị kemite.

¹⁰“Mem lọ nạ ạḅeni bịdi oomo phọ ịphen phọ, bịdi kopuru ni nyịna ịpe eḍighi bọ kụ mị magbiighi bọ ọliom ạbidi ịdi ẹgbagara ịduon. Bịdi kopuru ni ọdo phọ ịpe phọ ọpioman bọ rꞌọdo ịkaraph lọ bịdi moḍighi esi Ọmoogh-we Ẹnaan phọ ạbidi.

¹¹Kụ agbi nụun ọḅeni ạbidi ịpe Ọmoogh-we phọ mạḅem bọ mọ, ‘Ạburude ạburude phọ anyina ụwile ịmi kụ ọoḅereghi ghan ọḅile okumu ịnon ạrumugh. Bịdi ụḅitonaan ịmi ḅịle kẹn ụ́naghanan ịtughemi phọ ạmi.

¹²Kụ ọlo nyina meeph epu bụrude ạburude phọ anyina. Oomo phọ anyina ọḅaar ẹmhu, ḅịle kẹn nyina ịmi ị́naghanan.

¹³Kụ iḍighi kụ mị kiroph inyina ạsighe sịen ade phọ ạḍien phọ ạkiom ekpisi dị nyina rꞌạburude ạburude anyina kólhegheri ghan. Kụ ẹpe phọ kụ ẹdi nyina kekumu ịnon ạrumugh ḍughul rꞌootaany, kụ mị inyina ighirigiir kạ́nma.’”

¹⁴Ọmoogh-we phọ rạḅem ghan, “Amem retu ni dị awe kókunya ghan mun esi aḍien phọ ạmi Ẹnaan phọ ẹpe edi ghan bọ bịn, ọpo ạsighe bọ nmụny Ịzirel amitiom ẹpe ade phọ Ijipt.

¹⁵Kpạripe ghụn bịdi kughol ghan ịmi kụ okunya ịdipho Ẹnaan phọ ẹpe edi ghan bọ bịn, ọpo ạsighe bọ weye phọ Ịzirel amitiom ẹpe ade ephunom mọ, ḅịle kẹn rꞌẹpe oomo ịpheri phọ areelhe phọ ịpe mị ạwalalami bọ bịdi. Mị kạsighe ni bịdi aḅulemi ẹpe eelhe phọ ạbidi, ẹpe ade phọ mị ạngo bọ bụrude ạburude phọ ạbidi. Mị, Ọmoogh-we phọ, kụ mạḅem.”

¹⁶Ọmoogh-we phọ rạḅem ghan, “Mị ratom ịbadi ạbukoniom ạkoni mọ oru osiphi weye phọ ạbuen. Kụ mị agbi nụun orom ịbadi awe ịtaya mọ oru ọtaya bịdi ạnyu ạtorotoro eegum rꞌẹeḅaraph ḅịle rꞌiloghi aropogh igbo asighiigh phọ.

¹⁷Mị ạmiin ni tọrotoro ịyaar lọ bịdi oḍighi. Ịyaar ị́booghian esi ạmi; ịkaraph phọ ạbidi ílho dị mị ụ́miin.

¹⁸Mị kaḍighi ni ịdi bịdi kọkpe ịikpia ịkaraph phọ ạbidi ịyal amem, loor esi dị bịdi mọsighe ịkaaghineen ạraraar ọopuom de phọ ạmi, ruru dị ghuḍum ị́moogh ịdipho aḍizu oye lọ mamugh, ḅịle kẹn bịdi mọsighe rụmugh ọkpe omuzeḍi de phọ.”

¹⁹Ọmoogh-we, nạ kụ oye phọ ruuko bọ ịmi kạḅile ụngo ịmi ịnyaam; nạ ụlhoghonaan ịmi ḍịghaagh mem ịiḅaghami. Areelhe kọḍua ni ẹpe aruukuna ade phọ kụ ọḅem ghan mọ, “Ạburude ạburude phọ ayoor ụ́moogh ịyaar omuton rụmugh ọkpe, rꞌaruru dị ị́moogh ịyaar oḍighinom.

²⁰Oye katue ni ạlem rụmugh ọdi ḍụghum? Eeye, eḍighi ịyaar lọ ọdi ạlem, pọ kẹ́karaghi éḍighi egey ẹmugh.”

²¹“Kụ iḍighi kụ,” Ọmoogh-we phọ rạḅem, “egi phọ ẹphen bịn mị kaḍighi ịdi areelhe kolegheri ịikpo phọ ḅịle rꞌịnyaam mọ ạmi; bịdi kolegheri mọ mị kụ Ọmoogh-we phọ.”