Read abua Jerimaya 19 Bible Online

Jerimaya 19 - abua bible

Jerimaya 19

¹Ọmoogh-we phọ ụḅeni ịmi mọ kịa agho izoki dị ọlemom ạḅay. Ọdi ạḅile ụḅeni ịmi mọ sịghe buniin ikumoor awe phọ rꞌabuniin abukumoor ariil ạrikia phọ,

²ḅịle kẹn mọ kiton sịphe oghol bọ mọ Ọnhu-aḍibuo Ipoḍi Aroko phọ ạghi asi Eḍiiny aHinom. Ẹpe kụ esi dị mị kagbeelom dom mọ ọdi kụngo bọ ịmi.

³Ọmoogh-we phọ ụḅeni ịmi ọghaaph, “Nyina ạbudaam-ẹmha phọ aJuda rꞌawe phọ aJeruselem, iler rụru ẹnaghan ịphen mị Ọmoogh-we Egbogh Ẹnaan phọ Ịzirel ạmoogh bọ ọghaaph phọ. Mị kạsighe ni igbogh ịiḅaghami atu esi phọ ịsien dị tọrotoro oye lọ ạnaghan kakperenom ghan ni.

⁴Mị kaḍighi ni ịphen phọ loor esi dị awe phọ mụḅitonaan ịmi ọḅile ọopu esi phọ ọtol sịen kụ rọpinyon ghan rịkia kọngo ịnon ạrumugh — rụmugh dị bịdi rꞌạburude ạburude ạbidi rꞌạbudaam ẹmha phọ aJuda kőlhegheri ghan. Bịdi momuzeḍiom esi phọ ịsien ịḅaal awe dị ụ́piom,

⁵ḅịle kẹn bịdi mọkananaan renmeny Baal pịdi bịdi ọsighe ghan nmụny ạbidi oguom nịan ọpinyonom rịkia. Mị ụ́to ịphen phọ ụ́ḅeni bịdi; ítu kẹn roru ologhi ạmi.

⁶Kụ iḍighi kụ amem ketu ni dị esi phọ ịsien kókol mun mọ aTofet mụghumo Eḍiiny aHinom, kọḅile ghan okol mọ Eḍiiny Aḍuugh-Aḍuugh.

⁷Ịsien phọ kụ ẹdi mị kạagughuḍi oomo igbiighi awe phọ aJuda rꞌaJeruselem. Mị kạngo ni ọgel mọ ẹpomoghian phọ ạbidi ọkpar opu bịdi ọḅile ọze bịdi erugh ẹgham. Ịnun rꞌilhom ịnam kụ kẹba ḍizu phọ ạbidi.

⁸Ịdi mị kaagulemi bọ ẹmha phọ ẹphen tọrotoro oye lọ aten ạmiin kabughaan ghan ni kụ amaghagha.

⁹Ẹpomoghian phọ kakoonyom ẹmha phọ ịlo ọze awe ẹmha phọ. Kokoonyom ni bịdi ẹkaraph eghoonyom dị tụtu awe phọ ạbuphe odi bọ ẹpe ologhi ẹmha phọ, oniin kạba ni nyoniin ḅịle kẹn ghạlamo rꞌạnmuny ạbidi.”

¹⁰Kụ Ọmoogh-we phọ agbi ọḅeni ạmi mọ ḅom izoki phọ sịphe risigh awe phọ rꞌạmi ọghi bọ

¹¹ḅịle kẹn rꞌọḅeni ạbidi mọ Ẹnaan Oomo Ịikpo Ọmoogh-we phọ mạḅem mọ, “Mị kaḅomoghi weye phọ ạbuen ḅịle kẹn rꞌẹmha phọ ẹphen, kụ bịdi kọkigh ịduon izoki ạḅay phọ ẹphen moḅom bọ kụ kótue mun bọ oselemi. Awe kọsighe ni weye ạbidi lọ omuughu oḍiighi ghạlamo ẹpe Tofet loor esi dị ẹnon esi oḍi ạbidi kẹ́tol mun.

¹²Mị aguanaan mọ mị kaḍighi ịdi ẹmha phọ ẹphen rꞌawe ẹmha phọ ẹphen kẹkigh ịdipho aTofet.

¹³Aruutu phọ aJeruselem, aruutu ạbudaam-ẹmha phọ aJuda, ḅịle kẹn rꞌoomo aruutu dị mọrol ghan ẹpe ạnyu otu phọ ọsu ịnsens ọngo rạanaan phọ ḅịle kẹn rꞌesi lọ mọrol ghan omoor miim ọngo ịnon ạrumugh — oomo ariisi phọ ịpe phọ meḍigh ẹenir ịdipho aTofet.”

¹⁴Kụ mị agbi ọḍua aTofet, ẹpe Ọmoogh-we phọ ụsighe bọ ịmi ạghi mọ ogbeelom dom mọ ọdi. Kụ mị ạghi ạmeera sịphe erugh Otu Ịiḅereghi phọ kụ ạghaaph ạḅeni oomo phọ awe phọ

¹⁵mọ Ọmoogh-we Egbogh Ẹnaan phọ Ịzirel mạḅem mọ, “Mị kạsighe ni atu sịen ẹmha phọ ẹphen rꞌạtorotoro ẹmha lọ etuman sịen phọ oomo ịminimiin phọ mị ạḅem bọ mọ mị kạsighe atu phọ, loor esi dị nyina ẹḅaar ẹmhu ḅịle kẹn ị́naghanan ịlo mị ạḅem.”