Read abua Jerimaya 21 Bible Online

Jerimaya 21 - abua bible

Jerimaya 21

¹ẠZedekaya ọdaam mọ aJuda arom ni Pashur ọony aMalkaya, ḅịle rꞌạZefanaya ọony aMaaseya ọpinyon rịkia phọ mọ oru ụteeny ịmi ọḅeni mọ,

²“Seseeny, kol ẹmhu ayoor ạḅaanaan Ọmoogh-we phọ, loor esi dị ạNebukadnezar ogbogh ọdaam mọ ạBabilon rꞌawe ẹgham mọ ọdi moghoonyom ẹmha phọ. Iini sịen Ọmoogh-we phọ kaḍighi ni iniin ịiḍaany phọ ọdi ụngo iyira dị kạkpaariom Nẹbukadnezar mọ ọdi aḅula.”

³Kụ Ọmoogh-we phọ agbi ọḅeni ạmi, kụ mị ạḅeni weye phọ ạbuphe oru bọ dom mọ

⁴mọ ọghi ọḅeni ạZedekaya mọ Ẹnaan phọ Ịzirel Ọmoogh-we phọ mạḅem mọ, “Zẹdekaya, mị kạkpar ri apu weye ẹgham mọ ạna, bụen robe bọ ẹgham mọ rꞌọdaam ẹmha phọ ạBabilon rꞌaweye ẹgham mọ ọdi. Mị kakpol rạraar ẹgham awe ẹgham mọ ạna sịphe ogbo ẹmha phọ.

⁵Mị kạsighe ni oomo ịikpo phọ ạmi, rꞌophin ologhi phọ ạmi, rꞌạghelhe phọ ạmi, ḅịle kẹn rꞌọghagh ologhi phọ ạmi kụ abian ẹgham mọ rꞌạna.

⁶Mị kakiigh ni tọrotoro oye lọ arugh sịen ẹmha phọ: awe phọ rꞌịnam mọ kemuughu ni loor esi ẹkaraph ẹzegh.

⁷Kụ ọlo ịlo anyina, ạbuo ịtooghi phọ anyina, ḅịle kẹn rꞌawe lọ okpetenaan ẹgham mọ rꞌịgbakuro phọ ḅịle kẹn rꞌẹzegh phọ — mị kameera ni mọ ạNebukadnezar ọdaam mọ ḅịle kẹn rꞌawe ẹpomoghian phọ anyina bụphe rọwa bọ ọze anyina, isiphi inyina ọḍuanam. ẠNebukadnezar kụ kịze inyina. Ọdi kásugheeny rꞌoniin ọnyo anyina mụghumo ọnma ighirigiir ọnyo anyina. Mị, Ọmoogh-we phọ, kụ mạḅem.”

⁸Kụ Ọmoogh-we phọ agbi ọḅeni ạmi mọ ḅẹni weye phọ mọ, “Iler rụru ẹnaghan! Mị Ọmoogh-we phọ midianaan inyina ịyal asibin — eniin, eten aghuḍum, eniin, eten aḍuugh.

⁹Tọro ọlo ạrol sịen ẹmha phọ, pọ ẹgham mụghumo ọkoony mụghumo ẹzegh kụ kekiigh. Kụ ọlo tọro oye lọ amite ạḅogh loor ọdi ạngo weye phọ ạBabilon, bụen moghoonyom bọ ẹmha phọ, kókiigh; ọdi kạmala ni akpetenaan ḍuugh.

¹⁰Mị magbiighi ologhi ạmi amuneni mọ mị káseere mun ẹmha phọ ẹphen, mị kaagulemi ni. Mị kạḅogh ẹmha phọ ạngo ọdaam-ẹmha phọ ạBabilon kụ ọdi ạsu nịan oomo phọ ẹmha phọ. Mị, Ọmoogh-we phọ, kụ mạḅem.”

¹¹Ọmoogh-we phọ ụḅeni ịmi mọ ḅẹni ọto kꞌọdaam-ẹmha phọ aJuda, ẹemara ẹemara phọ aDevid mọ, “Iler rụru ẹnaghan ịphen Ọmoogh-we phọ rạḅem bọ. Ịmiin mọ iiḅi ịiruen kụ ịmeera tọrotoro aḍio. Ịloghonaan ḍịghaagh oye phọ ọpo roogbegheḍiom bọ ephorogh nyọpo raagbegheḍiom bọ nyọdi. Eḍighi ịyaar dị nyina ịduon phọ íḍighi, pọ ịkaraph phọ nyina reḍighi bọ keḍighi ni ịdi ọghagh ologhi phọ ạmi kaamor ịdipho ạnian dị oye kátue aḍime.

¹³Nyina awe aJeruselem ẹtologhu ude riisi dị ephoph epu riḍiiny phọ, ịdipho aḍighiigh dị ephoph epeleghiom de phọ. Kụ ọlo mị kiruphiom ni inyina ẹgham. Nyina ịḅem mọ oye kátue ạbaay aḍigh izuom inyina.

¹⁴Kụ ọlo mị kịliom ni inyina loor esi ịpe nyina meḍighi bọ. Mị kạlogh nịan otu ọdaam-ẹmha phọ, kụ ạnian phọ ele oomo phọ ạraraar phọ ẹman. Mị, Ọmoogh-we phọ, kụ mạḅem.”