Read abua Jerimaya 22 Bible Online

Jerimaya 22 - abua bible

Jerimaya 22

¹Ọmoogh-we phọ ụḅeni ịmi ọghi ẹpe ogiga ọdaam-ẹmha phọ aJuda, ọnyo ẹemara ẹemara phọ aDevid, ọḅeni nyọdi rꞌạbuo ịtooghi phọ ọdi, ḅịle kẹn rꞌawe phọ aJeruselem, mọ bịdi olher rụru ọnaghanan ịpe Ọmoogh-we phọ mạḅem bọ:

³“Mị Ọmoogh-we phọ ạto ịngo inyina rạḅem ghan mọ iḍighi ghan rạraar lọ eḍighi elhiom ẹḅile eseleman. Ịloghonaan ḍịghaagh oye phọ ọpo roogbegheḍiom bọ ephorogh nyọpo raagbegheḍiom bọ nyọdi. Kẹ́kpilighi ghan mụghumo ọgbiphoghom aruuruen mꞌạbunyigo ạnmuny mụghumo arukpukele ạnmariir; ḅịle kẹn kẹ́ze weye dị mạar ụ́piom sịen esi iigbia phọ ẹphen.

⁴Eḍighi ịyaar dị nyina ẹkaraghi ni kụ eḍighi ịphen mị mạto bọ, pọ bụo ẹemara ẹemara phọ aDevid kụ kọda ghan ni ọkiom ghisigh. Kụ bịdi rꞌạbuo ịtooghi phọ ạbidi kọḅile oḍigh ghan rughuugh-ude rꞌạrusu kụ otenom ghan sịen ạrunhu-aḍibuo ogiga phọ ọphon.

⁵Kụ ọlo eḍighi ịyaar dị nyina ị́naghanan ịto phọ ạmi, pọ mị akunya ni rịngo inyina rạḅem ghan mọ ogiga phọ ọphon kameel li aagulaan. Mị, Ọmoogh-we phọ, kụ mạḅem.

⁶“Esi ạmi, ẹnighe ogiga phọ aJuda kọmaaniom ẹnighe ade phọ ạGiliad ḅịle kẹn rꞌạraaḅaraph phọ ạLebanon; kụ ọlo mị kạsighe ni atene ọkpagha dị oye katugh mun.

⁷Mị ratom weye mọ oru oogulemi ogiga ọdaam-ẹmha phọ. Bịdi kọpam ni sikubu ạbidi otumom kụ olereghiom ịma ikpo aroko ọsaga phọ ọdi, kụ ọsighe oguom nịan.

⁸“Kụ ẹteeny mem dị aruuruen koten ghan kụ oniin apuru ghan nyoniin mọ eeghe kụ iḍighi kụ mị Ọmoogh-we phọ maḍighi bọ ịphen phọ egbogh ẹmha phọ ẹphen.

⁹Kụ bịdi ogbi ọphagharanaan mọ ụtuan dị nyina mẹḅitonaan ịyo phọ nyina eghiran bọ rꞌạmi Ẹnaan phọ anyina bịn ẹḅile rẹeḅereghi ghan kẹḅile ekumu ịnon ạrumugh.”

¹⁰Nyina awe aJuda, kémoghinaan Josaya ọdaam mọ; kémoghi ḍuugh phọ ọdi. Kụ ọlo imoghinaan ghụn agey Joahaz, ọony phọ ọdi; bịdi mọsighe nyọdi rọḍuanam, ọdi kátigheel mun, kạ́miin mun de phọ ạḍien phọ ọmar bọ nyọdi.

¹¹Ọmoogh-we phọ ạḅem ịdi egbolomaam aJoahaz ọony phọ aJosaya, ọpo ạsighe bọ esi ọde phọ ọdi aḍighi ọdaam-ẹmha phọ aJuda, “Ọdi mạḍua sịen phọ, kátigheel mun.

¹²Ọdi kamugh ẹpe eelhe phọ ọsighe bọ nyọdi rọki, ḅịle kẹn ọdi kạ́miin mun de phọ ạḍien.”

¹³Oogulaan kụ odianaan oye dị ạsighe iigbegheḍiom kụ ạloghom otu ọdi, ạḅile ạmaar ạbughe otu phọ rꞌareekeleghian; oye dị ạsighe weye ẹmha ọdi aḍighinom oḍighi kụ úmeera ụ́kpe ịpe omerenyan bọ.

¹⁴Oogulaan kụ odianaan oye dị ạḅem mọ, “Mị ạlogh otu ạnyu, ạmaar ạbughe yogh iisoph phọ ẹpe ạnyu phọ.” Kụ iḍighi kụ ọdi adoghoḍi rughuugh ookuugh sịphe otu phọ ọdi, ạsighe ipoḍi ạsupo rạsaga adoghoḍiom rughuugh phọ, kụ ạḅile agbul ọtogh-tọgh ạgba.

¹⁵Ketue ni eḍighi nyịna ogey ọdaam ḍụghum eḍighi ịyaar dị nạ ạsighe rạsaga kụ ạloghom otu dị ạnighe apu ruutu ạbunon awe? Ọde phọ ạna ạrol li ạkpo. Ọdi ạrol li dọl aruukuan oomo amem, kụ edughom ịrolonaan ni nyọdi tọrotoro ịyaar lọ ọdi aḍighi.

¹⁶Ọdi ạghaaph ghan ni ḍighiton uwekulom egey ẹghaaphom, kụ oomo ạraraar ịnighenaan ni nyọdi. Ịpe kụ olegheri Ọmoogh-we phọ.

¹⁷Kụ ọlo nạ rạwa ghan ịpe okuru phọ ạna bịn; oye dị ụ́piom nạ rakiigh ni, ạḅile kẹn ạsighe ẹekpara ekpeḍien rạkpilighiom weye phọ ạna. Ọmoogh-we phọ kụ mạḅem.

¹⁸Kụ iḍighi kụ Ọmoogh-we phọ ạḅem ịdi egbolomaam Jehoyakim ọdaam mọ aJuda, ọony phọ aJosaya, “Oye kámoghi ḍuugh phọ ọdi mụghumo ọḅem ‘Ịphen ịghen ọdo, ọyaghiri, ịphen ịghen ọdo!’ Oye kámoghinaan nyọdi mụghumo ọlooghi, ‘Ọmoogh-we ạmi! Ọdaam-ẹmha ạmi!’

¹⁹Kokughuḍi nyọdi ịdipho ẹnam adool, kụ ọkogh nyọdi otoph omitiom rụnhu-aḍibuo phọ aJeruselem.”

²⁰Weye aJeruselem, ịki ẹpe Lẹbanon ẹlhooghi, ịki ẹpe ade phọ ạBasan kụ emoghi; Ịlooghi ẹmagh ẹpe ạraaḅaraph phọ ạMoab, loor esi dị oomo phọ ạbuphe oḍighan bọ rꞌanyina ẹgham mọ momeel.

²¹Ọmoogh-we phọ ịḅeni ni inyina mem mọ ọpo edughom mọ ịrolonaan bọ inyina; kụ ọlo nyina ímeera ị́naghanan. Ịpe kụ ịdi nyina meḍighi bọ oomo aghuḍum mọ anyina; nyina ímeera ị́naghanan.

²²Ookuugh phọ kapula ni buḍiemiom mọ anyina ạsighiogh, ạbuphe oḍighan bọ rꞌanyina koḍighi weye ikoli ẹgham, koofolomi ni ẹmha phọ anyina ọḅile osiphe umugholoor loor ẹmhu oomo ịkaraph phọ nyina meḍighi bọ.

²³Nyina ẹmaar ẹtol eeweleghian loor igbo ọsaga dị ọsighiogh ẹpe Lẹbanon kụ oru; kụ ịpe eeghe ighirigiir dị kịrolonaan inyina mem dị eephina kisiph inyina, eephina dị ẹghigh ạnir lọ oghunughun rakun.

²⁴Ọmoogh-we phọ ạḅeni Jehoyasin ọdaam mọ, ọony aJehoyakim ọdaam mọ aJuda, mọ, “Loor esi dị mị kụ aru bọ ni Ẹnaan phọ ẹpe edi ghan bọ bịn phọ, ghạlamo nạ uḍighi gulu ạḍighaagh elhiom ạmi, mị mụkporonaan ni nyịna

²⁵ạḅile ạḅogh nyịna ạngo weye dị nạ rakiilaan ni, weye dị rọwa ni nyịna oghiigh. Mị kạḅogh nyịna ạngo Nẹbukadnezar ogbogh ọdaam mọ ạBabilon rꞌawe ẹgham mọ ọdi.

²⁶Mị kạkpaariom ni nyịna rꞌonhiin phọ ạna ọghi ọrol ạdol iiruen. Nyina kekeel eeruen ẹmha kụ ịyal phọ anyina emugh ẹpe.

²⁷Kẹphu ghan ni nyịna ọḅile origheel ẹmha phọ ẹphen, kụ ọlo nạ kátigheel mun.”

²⁸Kụ mị ạḅem mọ, “AJehoyasin ọdaam mọ mạghigh ịdipho izoki dị meḅomaan kụ oroph bịn kụ oye ụ́wa mun? Ẹpe kụ ịyaar phọ ọtu bọ ọsighe nyọdi rꞌạnmuny phọ ọdi ọghi oseere dọl iiruen ẹpe eelhe dị bịdi úlegheri?”

²⁹De, de, de! Ler rụru ịphen Ọmoogh-we phọ mạḅem bọ:

³⁰“Erugh mephum oye phọ ọphon ọdi kạ́moogh mun ịbam ạnmuny, ọdi kẹn kaḍighi oye dị igey kẹ́tolonaan. Ọdi kạ́moogh ẹemara ẹemara dị kọda Juda ịdipho awe dị kọsighe esi phọ aDevid. Mị, Ọmoogh-we phọ, kụ mạḅem.”