Read abua Jerimaya 24 Bible Online

Jerimaya 24 - abua bible

Jerimaya 24

¹Ọmoogh-we phọ uḍeenaan ni ịmi ịyal arugunum ạfig dị oseere esomanan Otu Ịiḅereghi phọ. (Ịphen phọ imite ẹdaphan mem mọ ọpo ạNebukadnezar ogbogh ọdaam mọ ạBabilon maru bọ asiph ọolha-ẹmha phọ aJuda Jehoyasin ọony phọ aJehoyakim ạsighe nyọdi ịdipho ọnyo-ikoli ẹpe Jeruselem kụ ạghi asiemi ẹpe Bạbilonia, ạḅaram ikpolom awe aJuda, ḅịle kẹn rꞌawe dị ọmaarogh iiḍighi ạḍighaagh rꞌạbulo ọmaar ọlemogh ạraraar.)

²Sịphe ẹḅel egunum mọ udoghoḍi igey iimuma ạfig, ịpe ẹnuun bọ ẹḅaal; ẹpheri phọ egunum mọ udoghoḍi ịkaraph iimuma ạfig, ịpe ị́nighe bọ olhe.

³Kụ Ọmoogh-we phọ agbi opuru ạmi, “Jerimaya, nạ ạmiin eeghia?” Mị ạphagharanaan mọ, “Iimuma ạfig. Igey phọ ẹnighe ni igey, kụ ọlo ịkaraph phọ ebeeph ni igey dị tụtu ị́nighe ole.”

⁴Kụ Ọmoogh-we phọ ụḅeni ịmi mọ,

⁵“Mị Ọmoogh-we Ẹnaan phọ Ịzirel, agbiighi ạmiin mọ awe phọ ọsighe bọ ogheelom Bạbilonia ọkigh igey iimuma ạfig phọ ịphen, ḅịle kẹn mị kạsighe ni ọnma ighirigiir kụ apoghom bịdi.

⁶Mị kakori ni bịdi kụ ạsighe bịdi aḅulemi sịen ade phọ ạḍien. Mị kạlogh ni bịdi ạmeremi, mị kálereghi; mị kạzuph ni bịdi, mị kátuphuron.

⁷Mị kạngo ni bịdi ḍịḅeeraan olegheriom mọ mị kụ Ọmoogh-we phọ kụ bịdi ogbi oḍighi awe ạmi, kụ mị aḍighi Ẹnaan ạbidi, loor esi dị bịdi kotighelom ni esi ạmi rꞌoomo ologhi phọ ạbidi.

⁸“ẠZedekaya ọdaam mọ aJuda rꞌạbuo oḍighi phọ okoom bọ nyọdi, ḅịle rꞌạbueri phọ awe phọ aJeruselem bụen ọrol bọ sịen ade phọ ạḍien mụghumo ạbuphe ọḍua bọ ogheel Ijipt — mị Ọmoogh-we phọ kaḍighi oomo phọ ạbidi ịduon ịkaraph iimuma ạfig phọ ịphen ị́nighe bọ olhe.

⁹Mị kaagulemi ni bịdi ịdi keḍigh ni ruugu esi oomo areelhe aḅirini phọ. Awe kọnmoghoghoom ghan ni bịdi, ọsighe bịdi ọmaarom ghan ịmaar ịnhu, ọmilogh ghan bịdi, ọḅile kẹn ọsighe ḍien phọ ạbidi oḍighi itonyonaan tọrotoro ekpisi lọ mị ạwalalami bịdi ạghiom.

¹⁰Mị kạsighe ni atuom bịdi ẹgham, ọkoony ḅịle rꞌẹzegh dị tụtu rꞌoniin ọnyo ạbidi kásugha sịphe ade phọ mị ạngo bọ bịdi rꞌạburude ạburude phọ ạbidi.”