Read abua Jerimaya 25 Bible Online

Jerimaya 25 - abua bible

Jerimaya 25

¹Lhạ dị emuneniom inya dị aJehoyakim ọony phọ aJosaya mạda Juda, adom Ọmoogh-we phọ dị egbolomaam weye phọ aJuda ịteeny ni ịmi. (Ạḍien phọ kụ ạḍiḅel ạlha dị ạNebukadnezar ạda bọ Bạbilonia.)

²Mị ụḅeni ni oomo awe phọ aJuda rꞌaJeruselem mọ,

³“Esi 23 ạsia, emiigh lhạ dị emuneniom ḍioph rꞌịraar dị aJosaya ọony Ạmon mạda bọ Juda kụ ẹteeny rodon, Ọmoogh-we phọ rụḅaanaan ghan ni ịmi kụ mị kọ̋wile ghan ọḅeni anyina ịlo ọdi ạḅem. Kụ ọlo nyina ímeera ị́naghan.

⁴Nyina ímeera íler rụru ghạlamo ịduon Ọmoogh-we phọ rạsighe ghan bọ ni karu butelhedom mọ ọdi, riil phọ.

⁵Bịdi ịḅeni ni inyina mọ ịbile ịkaraph areten phọ anyina, ẹwile oḍighi yogh ịkaraph, pịdi nyina etugh ẹkiom risigh sịen ade phọ Ọmoogh-we phọ ịngo bọ inyina rꞌạburude ạburude phọ anyina mọ ịmoogh phọ.

⁶Bịdi ịḅeni ni inyina mọ kéeseeny ẹbile ekumu ịnon ạrumugh, ḅịle kẹn mọ kéḍighi ịlo kepin ologhi Ọmoogh-we phọ esi ooseeny aruru phọ nyina mẹkaaghi bọ. Mụghumo nyina ịnaghanan ni Ọmoogh-we phọ, ọbo ọdi inyina mị́liom.

⁷Kụ Ọmoogh-we phọ rꞌaloor ạḅem ni mọ nyina ímeera ị́naghanan nyịno. Kpạripe ghụn nyina ịsighe ruru phọ anyina eḍighinom ịdi ephin ologhi ọdi kụ nyina mẹkom ghẹlhe phọ ọdi ẹngo siloor phọ anyina.

⁸“Kụ iḍighi kụ loor esi dị nyina ímeera bọ ị́naghanan nyọdi, Ẹnaan Oomo Ịikpo Ọmoogh-we phọ rạḅem ghan mọ,

⁹‘Mị katom ni ạkiomaan oomo awe phọ odi bọ ẹpe ephunom mọ, ḅịle kẹn rꞌotelhedom mọ ạmi Nẹbukadnezar ogbogh ọdaam mọ ạBabilon. Mị kạsighe ni bịdi atu mọ eenan ẹgham rꞌawe phọ aJuda ḅịle rꞌoomo areelhe phọ etuman bọ bịdi. Mị kaagulemi eelhe phọ ẹphen rꞌạbuphe otuman bọ bịdi kụ bịdi ọtolom ịdipho kꞌagee-pọ, kụ eḍigh ruugu ọmiin ghan. Mị, Ọmoogh-we phọ, kụ mạḅem.

¹⁰Mị kámeera mun ịlooghi iboh rꞌọḅaal ologhi apinien ẹrol. Bịdi kọ́moogh mun mụnum sịphe ịtozi phọ ạbidi, ḅịle kẹn ịbiakpa kẹ́tol mun.

¹¹Oomo phọ ade phọ ạḍien keegulaan bịn kụ ẹtolom kụ eḍigh ruugu ọmiin ghan, kụ areelhe phọ ịpe etuman bọ kekumu ni ọdaam-ẹmha phọ ạBabilon oḍualdi ạsia.

¹²Ịphen phọ reten kụ mị ạliom Bạbilonia rꞌọdaam ẹmha phọ ọdi loor esi ịkaraph phọ ạbidi. Mị kaagulemi ni ẹmha phọ ẹpe kụ aseere kꞌagee-pọ.

¹³Oomo phọ ịiḅaghami phọ ọge bọ sịen ạḍinya phọ ạḍien — ịpe mị ạḅeni bọ aJerimaya mọ mị kạ́bile oḍighi areelhe phọ kụ ịdi mị kạsighe ạliomom Bạbilonia.

¹⁴Mị kaḅulemian ni weye ạBabilon ịphen bịdi moḍighi bọ, ḅịle kẹn ịbadi areelhe rꞌigbogh ạraalha kọsighe ni bịdi kụ oḍighi rẹbene.’”

¹⁵Ọmoogh-we Ẹnaan phọ Ịzirel ụḅeni ni ịmi mọ, “Pọrono sịen ạtobili amiim dị omuzeḍi ọghagh-ologhi phọ ạmi. Sịghe ạghiomonaan oomo areelhe lọ mị ạḅeni nyịna, ạngo bịdi ọphughol.

¹⁶Mem lọ bịdi ọphughol, bịdi kọbelebele ni kụ iloghi phọ ạbidi ẹḍuaghu loor esi ẹgham mọ mị ạsighe bọ ratuomonaan bịdi.”

¹⁷Kụ mị ạsighe tọbili phọ ḍịghaagh Ọmoogh-we phọ, mị ạngo oomo areelhe lọ Ọmoogh-we phọ ụḅeni ịmi ọngo, kụ mị aḍighi ghan ịdi bịdi ọphughol ghan.

¹⁸AJeruselem rꞌoomo ạramha phọ aJuda, bụdaam mọ rꞌabuḍiemiom mọ ạbidi, ụphughol li pịdi bịdi oten de ophugh, oḍigh ruugu ọmiin ghan, ḅịle kẹn pịdi awe ọsighe ghan ḍien phọ ạbidi oḍighi itonyonaan — ịdipho bịdi roḍighi bọ ni kꞌarodon.

¹⁹Ḍịen kụ ạḍikool oomo phọ ạbueri phọ awe phọ ọphugholom bọ tọbili phọ: ọolha-ẹmha phọ Ijipt, rꞌạbuo iiḍighi phọ rꞌabuḍiemiom mọ ọdi; oomo awe phọ Ijipt rꞌaruuruen phọ ọrol bọ Ijipt; oomo ạraalha-ẹmha phọ ọda bọ de phọ ạUz; oomo ạraalha ạramha phọ aFilistia ẹpe Askelon, Gaza, Ẹkron rꞌẹpe esugha bọ Ạsdod; oomo awe phọ Idom, Mọab rꞌAmon; oomo ạraalha-ẹmha phọ aTaya rꞌaSaidon; oomo ạraalha-ẹmha phọ arere aMeditarenian; rạmha phọ aDedan, Tẹma rꞌaBuz; oomo awe phọ ạbuphe rọsama ghan bọ rụmhu phọ ạbidi koghome; oomo ạraalha-ẹmha phọ Arebia; oomo ạbuphe ọdaaghi bọ rịikpigh awe ẹpe ade ophugh phọ; oomo ạraalha-ẹmha phọ aZimri, Ilam rꞌaMedia; oomo ạbuphe ọda bọ ẹpe ephunom mọ, bụlo ọkel ḅịle rꞌạbulo ọobeeph, oye atum oye. Tọrotoro eelhe sịen ade phọ ụphugholom ni tọbili phọ. Kụ ọdaam ẹmha phọ ạBabilon kụ ạphugholom asughanam ọman.

²⁷Kụ Ọmoogh-we phọ agbi ọḅeni ạmi mọ, “Ḅẹni weye phọ mọ mị Ọmoogh-we Ẹnaan phọ Ịzirel Ẹnaan Oomo Ịikpo kụ ụto ạngo bịdi mọ bịdi ọphughol tụtu aghiigh bịdi ọḅile ozuughi yogh, tụtu ọḍua omeleghu bịn útue mun úḅetenu, loor esi ẹgham mọ mị ạsighe bọ ratuomonaan bịdi.

²⁸Kụ eḍighi ịyaar lọ bịdi úmeera ụ́boor nyịna tọbili phọ, kụ úmeera kẹn ụ́pugholom, pọ ḅẹni bịdi mọ Ọmoogh-we Ẹnaan Oomo Ịikpo phọ mạḅem mọ kọkpaariom ni bịdi ọpugholom.

²⁹Mị kamiighom oḍighi oogulemi phọ sịen ọkar ẹmha phọ ạmi, Jeruselem. Bịdi rogbiom ghan mọ bụno kokpetenaan ni ḍụghum? Eeye, kọliom ni bịdi, loor esi dị mị kạsighe ẹgham kụ atuomonaan oomo awe ade phọ. Mị, Ọmoogh-we Ẹnaan Oomo Ịikpo phọ, kụ mạḅem.

³⁰“Nạ, Jerimaya, gbeelom tọrobo ịyaar lọ mị mạḅem, ạḅeni we phọ ạbuen mọ, “‘Ọmoogh-we phọ kamoogha ẹpe kꞌạke phọ kụ amitiom ọomaany ẹpe ạnyu ạsike phọ. Ọdi kamooghaam weye phọ ọdi; ọdi kạlo ịdipho oye lọ ramiim iimuma avain. Tọrotoro oye sịen ade phọ kạnaghan ni ẹḍogh phọ ọdi

³¹kụ ẹḍogh phọ kemenyon ni ruukuna ade phọ. Ọmoogh-we phọ ạmoogh ni ḍighiton rꞌareelhe phọ. Ọdi kạsighe ni oomo phọ awe phọ ạmeremi esi ịiruen kụ ạze buḍighinom ịkaraph phọ. Ọmoogh-we phọ kụ mạḅem.’”

³²Ọmoogh-we Oomo Ịikpo phọ ạḅem mọ ịiḅaghami retu ni ọteeny eelhe etum eelhe, ḅịle kẹn ogbogh oghim raakpomoghan ẹpe aruukuna ade phọ.

³³Ḍio phọ ạḍiphe aḍizu awe phọ Ọmoogh-we phọ kạze bọ kẹsaraan eniin eekuna ade phọ kụ ẹki esi ẹpheri phọ. Oye kạ́tuan bịdi ákururu, ḅịle kẹn kọ́sighe bịdi ọ́ki oḍiighi. Bịdi kọmina yogh sịphe ade phọ kụ oḍighi ịdipho arugu ẹenir dị keḍume yogh ịizupha.

³⁴Imoghi yogh, nyina abukoriom awe phọ ạmi, nyina phọ repogh bọ weye phọ ạmi, imoghi yogh emitiom! Ikururu ẹḅile eekila ophugh. Amem mọ kịze bọ inyina mẹteeny, kụ kịkanyan inyina ịdipho idughuna.

³⁵Ịlo okpetenaan kẹ́tol.

³⁶Nyina rẹkuph ghan kemoghi esi ịminimiin loor esi dị ọghagh-ologhi Ọmoogh-we phọ maagulemi eelhe phọ anyina bịn ịma phọ ẹmha ẹepho phọ anyina meguul.

³⁸Ọmoogh-we phọ mạḅitonaan weye phọ ọdi ịdipho ạnam-dịka lọ mẹḅitonaan epogh ọdi. Ạraraar aruugu ẹgham mọ ḅịle kẹn rꞌoboom ọghagh ologhi Ọmoogh-we phọ mekiton ẹmha phọ etene de ophugh.