Read abua Jerimaya 28 Bible Online

Jerimaya 28 - abua bible

Jerimaya 28

¹Ḍiniin phọ ạlha phọ ạḍiphe phọ, omuneniom oogh ụnwanyu ạlha dị emuneniom inya dị ạZedekaya mạda, aHananaya ọony Azur, oyil ọlo ẹmha ạGibion, ụḅaanaan ni ịmi sịphe Otu Ịiḅereghi phọ. Sịphe risigh ariil ạrikia phọ rꞌawe phọ, ọdi ụḅeni ịmi

²mọ Ọmoogh-we Oomo Ịikpo Ẹnaan phọ Ịzirel mạḅem mọ, “Mị mạphue ịikpo ọdaam eelhe phọ ạBabilon.

³Esi ịyal ạsia mị kaḅulemi sịen oomo ạraraar Otu Ịiḅereghi phọ ịpe ạNebukadnezar ogbogh ọdaam mọ ạsighiogh bọ ạghimom Bạbilonia.

⁴Mị kạḅile kẹn aḅulemi Jehoyasin ọony aJehoyakim ọdaam mọ aJuda rꞌoomo ạbueri phọ awe phọ aJuda bụdi odi iiruen ẹpe Bạbilonia. Ii, mị kạpue ni ịikpo ọdaam-eelhe phọ ạBabilon. Mị Ọmoogh-we phọ kụ mạḅem.”

⁵Pọ kụ amem dị sịphe ogbo ariil ạrikia phọ rꞌoomo awe phọ ọmeregha bọ sịphe Otu Ịiḅereghi phọ, mị ạḅeni Hananaya:

⁶“Eḍighi ḍiigu! Mị ạmoogh oḍuom ologhi mọ Ọmoogh-we phọ kaḍighi ni ịphen phọ! Mị ạkar ri ạmoogh oḍuom ologhi mọ ọdi kaḍighi ni ịdi ịmiin phọ ạna kemite kụ ọdi kạsighiogh ni ẹpe Bạbilonia aḅulemi oomo aruphua Otu Ịiḅereghi phọ ịpe ọsighiogh bọ ọḍuanam ḅịle rꞌoomo awe phọ osiphi bọ.

⁷Kụ ọlo nạghan ịphen mị rạḅeni bọ nyịna rꞌawe phọ.

⁸Ariil phọ ạbuphe ọmiin bọ mem dị mebia kụ egbi ọteeny amem ạmi rꞌạna ụmiin ni uḍien mọ ẹgham, ọkoony rꞌẹzegh kemitenaan ni ịbadi areelhe rꞌạramar dị ẹmoogh ịikpo.

⁹Kụ ọlo oyil lọ ạmiin ịmiin ẹepho kotue ni olegheri mọ Ọmoogh-we phọ ni kụ ạkar arom oyil phọ ọpo mem dị ịmiin phọ ọdi memite.”

¹⁰Kụ aHananaya ạsighe ọfeguma phọ ọgban bọ rụpha phọ ạmi, awunughi ikulha ikulha,

¹¹kụ ạḅem sịphe ogbo oomo phọ awe phọ mọ, “Ọmoogh-we phọ mạḅem mọ ịduon kụ ẹdi mị kạsighe ọfeguma phọ ạNebukadnezar ọdaam mọ ạḅam bọ rụpha oomo areelhe phọ; kụ ọdi kaḍighi ịphen phọ esi ịyal ạsia.” Kụ mị agbi ọḍua.

¹²Rẹsighe mem kụ Ọmoogh-we phọ ụḅeni ịmi

¹³ọghi ọḅeni aHananaya mọ, “Ọmoogh-we phọ mạḅem mọ, iini nạ katue ni abunughi ọfeguma oreeny, kụ ọlo ọdi kanmiom ọfeguma okuron.

¹⁴Egbogh Ẹnaan phọ Ịzirel Ọmoogh-we phọ mạḅem mọ ọno kạsighe ọfeguma okuron ạḅam rụpha oomo areelhe phọ ịphen, kụ mọ bịdi kokumu ghan Nẹbukadnezar ogbogh ọdaam mọ ạBabilon. Ọmoogh-we phọ mạḅem mọ ọno kaḍighi ịdi ghạlamo rꞌilhom ịnam bịn kekumu ghan Nẹbukadnezar.”

¹⁵Pọ kụ amem dị mị ạḅeni Hananaya ịduon, kụ ạloghom, “Nạghan, Hananaya! Ọmoogh-we phọ nyịna órom, kụ nạ raḍighi ịdi awe phọ ạbuen komeeraam ọkpe.

¹⁶Kụ iḍighi kụ Ọmoogh-we phọ rꞌaloor ọdi ạḅem mọ ọno kasiemi eekuna ghuḍum ạna. Tụtu ạlha phọ aḍien remuneen, nạ kamugh loor esi dị nạ mạḅeni we phọ mọ ọḅaar ẹmhu esi Ọmoogh-we phọ.”

¹⁷Lhạ phọ ạḍiphe phọ mem dị ẹteeny ụnwanyu phọ ọpo amuneniom bọ oḍual phọ, bịn aHananaya amugh.