Read abua Jerimaya 29 Bible Online

Jerimaya 29 - abua bible

Jerimaya 29

¹Mị ụge ni ḍịnya ạghiom bụpinyon rịkia phọ, riil phọ, buḍiemiom awe phọ rꞌoomo ạbueri phọ ạNebukadnezar asiphi bọ ạḍuanam Jeruselem kụ agheelom Bạbilonia.

²Mị ụge ḍịnya phọ mem dị mọsighe Jehoyasin ọdaam mọ, onhiin phọ ọdi, bụo iiḍighi ogiga phọ, buḍiemiom aJuda rꞌaJeruselem, weye ẹmaar oḍighi ạḍighaagh ḅịle rꞌawe ịkaaghi ọghimom iiruen arikpisi.

³Mị ụḅogh ḍịnya phọ ạngo Elasa ọony phọ aSafan ḅịle rꞌaGemaraya ọony ạHilkaya, ọpo ạZedekaya ọdaam mọ aJuda arom bọ rạkiom Nẹbukadnezar ogbogh ọdaam mọ ạBabilon. Ịḅem ịduon:

⁴“Ọmoogh-we Egbogh Ẹnaan phọ Ịzirel rạḅeni ghan oomo awe phọ bụphe ọdi ạngo bọ ọgel mọ ạNebukadnezar asiphi sịphe Jeruselem ạghimom ẹpe Bạbilonia:

⁵‘Ịloghoḍi ruutu ẹrol. Iḅephogh iizo ebugha ele rạraar lọ nyina eḅephogh sịphe iizo phọ.

⁶Ipinogh nmạriir ẹmaraghi. Ạnmuny anyina ophinogh nmạriir ẹrol dị bịdi ọmaraghi aani nmụny. Ịbughe ḍita anyina, kékome.

⁷Iḍighinaan ịlo kẹnighenaan rạmha phọ mị maḍighi bọ dị isiphi inyina ọghimom. Ịiḅereghi ghan ịngo ịmi loor ẹmhu ạbidi; eḍighi ịyaar lọ bịdi ọmoogh ẹelha, nyina kẹmoogh aani ẹelha.

⁸Mị Ọmoogh-we Ẹnaan phọ Ịzirel rịphur inyina rụru mọ kémeera ariil phọ odi bọ igbo anyina iikeleghi inyina, ḅịle kẹn rꞌạbunon lọ ọḅem mọ bụno kotue ọkaaph ịlo kemite iḍue. Kẹ́naghanan rạmalha ạbidi.

⁹Bịdi ọsighe ḍien ạmi rọgbaam ọkpe kịḅeni inyina. Mị kụ bịdi útom. Mị Ọmoogh-we phọ kụ mạḅem.’

¹⁰“Ọmoogh-we phọ ạḅem, ‘Mem dị nyina mẹrol oḍualdi ạsia ẹpe Bạbilonia, mị kaḍeenaan ọnma ighirigiir ạmi esi anyina kụ aḍighi ịpe mị aguanaan bọ. Mị kịsighe ni inyina aḅulemi ẹmha phọ anyina.

¹¹Mị bịn kụ ulegheri igbiighi phọ mị ịmooghaan bọ inyina, igbiighi ịlo oḍume anyina, kị́lo ophiemi, igbiighi ọngo anyina oḍuom ologhi ịlo aghisigh.

¹²Nyina kịmagh ghan ịmi. Nyina ketu esi ạmi, ẹeḅereghi ịngo ịmi kụ mị kịnaghanan ni inyina.

¹³Nyina kịwa ni ịmi, kụ nyina kịmiin ni ịmi, loor esi dị nyina kịwaam ịmi rꞌoomo ologhi phọ anyina.

¹⁴Ii, mị ạḅem, nyina kịmiin ni ịmi, kụ mị kịsighe inyina aḅulemi ẹpe ade phọ anyina. Mị kiikpomoghi inyina tọrobo eelhe, rꞌạtorobo ekpisi lọ mị ịwalalami inyina, kụ mị iḅulemi inyina sịphe ade phọ nyina ẹrol bọ kụ mị ịsighe bọ inyina ạghimom iiruen arikpisi phọ. Mị Ọmoogh-we phọ kụ mạḅem.’

¹⁵“Nyina ẹḅem mọ Ọmoogh-we phọ mịngo inyina riil ẹpe Bạbilonia.

¹⁶Ịnaghanan ịphen Ọmoogh-we phọ rạḅem bọ ịlo egbolomaam ọdaam mọ ọpo ạda bọ ọmar phọ aDevid ạda ghan bọ, ḅịle ịlo awe ẹmha phọ ẹphen, rꞌịlo asiya anyina lọ úsiphi ụ́ḍuanam rꞌanyina.

¹⁷Ẹnaan Oomo Ịikpo Ọmoogh-we phọ ạḅem mọ, ‘Mị mạsighe ratumom ẹgham, ọkoony rꞌẹzegh dị kẹteeny bịdi, kụ mị aḍighi bịdi ịdipho iimuma ạfig dị mẹḅor ẹphughan ḍi ị́nighe mun olhe.

¹⁸Mị kaporoghom bịdi ẹgham, ọkoony rꞌẹzegh. Aḍiigu kụ kẹtolonaan oomo areelhe aḅirini phọ esi ịdi bịdi kọmiin. Tọrobo ekpisi lọ mị ạwalalami bịdi, awe kokpereghaan kụ ọmoogh oghiilaan esi ịdi memitenaan bịdi. Awe kọnmoghoghoom bịdi kụ aḍien ạbidi eḍighi itonyonaan.

¹⁹Ịphen kemitenaan bịdi loor esi dị bịdi ụ́naghanan ghan dom mọ mị arom ghan bọ butelhedom ạmi, ariil phọ. Bịdi úmeera ụ́naghan.

²⁰Oomo phọ anyina mị ạsighe bọ ạghi iiruen arikpisi ẹpe Bạbilonia, ịnaghanan ịphen mị Ọmoogh-we phọ rạḅem bọ.’

²¹“Ọmoogh-we Egbogh Ẹnaan phọ Ịzirel mạghaaph ịlo Ehab ọony aKolaya ḅịle rꞌạZedekaya ọony aMaaseya, bụphe mọsighe bọ ḍien phọ ọdi rọgbaam ghan ọkpe kịḅeni inyina. Ọdi mạḅem mọ ọno kạḅogh bịdi ạngo ịikpo ạNebukadnezar ogbogh ọdaam mọ ạBabilon, ọpo kạze bọ bịdi ghisigh anyina.

²²Mem dị awe phọ osiphi bọ Jeruselem ọḍuanam ọghimom ẹpe Bạbilonia ọwa ogurughi oye, bịdi kọḅem ghan mọ, ‘Ọmoogh-we phọ iḍighi inyina ịdipho aḍighi bọ Zẹdekaya rꞌEhab, bụphe ọdaam-ẹmha ạBabilon ạphoghi bọ imoom!’

²³Ịphen kemitenaan bịdi loor esi dị apum odianaan ni bịdi esi igbogh ịkaraph — bịdi molhe ẹmha kụ ọgbaam ọkpe ḍien Ọmoogh-we phọ. Ịphen phọ ị́ḅophan rigbiighi Ọmoogh-we phọ; ọdi alegheri ni ịpe bịdi moḍighi bọ, kụ ọdi kụ ọgbaanaan ịpe bịdi eḍighi bọ. Ọmoogh-we phọ kụ mạḅem!”

²⁴Ọmoogh-we Egbogh Ẹnaan phọ Ịzirel urom ịmi dom ọḅeni aSemaya ọpo aNehelam, ọpo mạghiomanaan bọ ḍịnya esi aḍien ọdi oomo awe aJeruselem ḅịle rꞌạZefanaya ọony aMaaseya ọpinyon rịkia phọ rꞌoomo phọ ạbueri phọ ariil ạrikia phọ. ASemaya ạge ạghiom Zẹfanaya mọ,

²⁶“Ọmoogh-we phọ ạsaḅar nyịna oḍighi ọpinyon rịkia dị kạsighe esi phọ ạJehoyada, kụ nyịidipho nạ kụ ogbogh ọnyo iiḍighi sịphe Otu Ịiḅereghi phọ. Eḍighi oḍighi ạna ọmiin mọ tọrobo ọpirighi lọ akue ạḅem mọ ọno oyil, kọphaḍiom nyọdi izime kụ ọlogh ọla okuron orum ọdi.

²⁷Uḍighi ika nụun kụ nạ kőḍighi bọ ịduon phọ aJerimaya ọpo Anatot, ọpo ạḅa ghan bọ mụdi oyil esi awe phọ?

²⁸Kikima nyọdi loor esi dị ọdi ạḅeni we phọ ẹpe Bạbilonia mọ bịdi kọtol li dọl ikoli ẹpe phọ ebia kụ ẹkpianaan bịdi ọloghoḍi aruutu, orugh, oḅeph iizo kụ olhe ẹlo bịdi oḅeph.”

²⁹ẠZefanaya ạal ḍịnya phọ ụḅeni ịmi

³⁰kụ Ọmoogh-we phọ agbi ọḅeni ạmi

³¹orom adom mọ ạḍien ịlo egbolomaam Semaya ọghiomonaan oomo ạbuo ikoli phọ ẹpe Bạbilon mọ, “Mị Ọmoogh-we phọ kạliom ni Semaya rꞌoomo ạnmuny ạnmanyaan ọdi. Mị nyọdi útom kụ ọdi ịḅaanaan inyina ịdipho oyil Ẹnaan, ạḅile kẹn aḍighi ịdi nyina emeeraam ọkpe. Ọdi kạ́moogh nmụny ạnmuny ogbo anyina. Ọdi kạ́tol ạ́miin igey ạraraar phọ mị kaḍighinaan bọ we phọ ạmi, ịdi eḍighi bọ ọdi ạḅeni bịdi mọ ọḅaar ẹmhu esi ạmi. Mị Ọmoogh-we phọ kụ mạḅem.”