Read abua Jerimaya 3 Bible Online

Jerimaya 3 - abua bible

Jerimaya 3

¹Ọmoogh-we phọ ạḅem mọ, “Eḍighi ịyaar dị oye aseere ạnir ọdi kụ ạnir phọ ạwile oye phọ ạghi ạal ọnon oye, oye phọ kátue mun ạsighe ạnir phọ ọpo aḅulemi. Ịphen phọ kẹepu ni de phọ ẹmadan. Kụ ọlo, Ịzirel, nạ mạmoogh ịbadi ạruga, kụ nyịidipho nạ rạwa ghan oḅula esi ạmi!

²Pogh aani ạnyu aroogbolom mọ. Esi esugha ni dị nạ úḍighi ịdipho ọnyo akunakuna ḍụghum? Nạ ukori ghan rụga phọ ạna ẹpe ọgbal eten phọ, ịdipho oye ọlo Arebia rakori ghan bọ oye lọ ọdi kaḍighi ịkaraph ẹpe ẹdala phọ. Nạ mạapu de phọ loor esi olhe-ẹmha phọ ạna.

³Ẹpe kụ ịyaar phọ ọlophia phọ ụ́loph mun bọ, oyiririph aghozogh kẹn bịn óru. Nạ ạkar ghụn ạkigh ọnyo akunakuna; umugholoor nyịna rásiph ghan.

⁴“Kụ nyịidipho nạ rụḅeni ghan ịmi mọ, ‘Nạ ọde ạmi, ḅịle kẹn nạ mụphomoghian ni ịmi kꞌẹghoroghor ạmi.

⁵Ịyaar kẹ́kagh ghan ologhi ạna oomo amem; nạ ịmi kụ́ghagham kꞌagee-pọ.’ Ịzirel, ịpe kụ ịdi nạ ạḅem bọ, kụ ạri nạ uḍighi ni oomo ịkaraph phọ ịpe nạ arue bọ.”

⁶Mem mọ ọpo aJosaya kụ aḍighi bọ ọdaam mọ, kụ Ọmoogh-we phọ ụḅeni ịmi mọ, “Nạ ạmiin ni ịpe Ịzirel, ọkaraph ạnir phọ, maḍighi bọ? Ọdi mạḍua ḍịghaagh ạmi, kụ ạki ạnyu ạtorotoro ẹeḅaraph ḅịle rꞌạtorotoro eeḍian oreeny lọ ạrinya phọ ewil bịn ạki dọl olhe-ẹmha.

⁷Mị ugbiom ghan mọ ọdi roḍighi oomo phọ ịphen phọ mọ ọdi kaḅula ni esi ạmi. Kụ ọlo ọdi óḅula, kụ umarani phọ ọdi Juda ọpo ologhi róḍuom ghan bọ ạmiin ni oomo phọ ịdi.

⁸AJuda ạmiin kẹn ni mọ mị maseere Ịzirel aporogh nyọdi loor esi dị ọdi mạḍua ḍịghaagh ạmi bịn aḍighi ọnyo oliom ẹmha. Kụ ọlo aJuda, umarani phọ Ịzirel ologhi róḍuom ghan bọ, ọ́moogh oghiilaan. Ọdi phọ kẹn aḍighi kẹn ọnyo oliom ẹmha,

⁹kụ umugholoor nyọdi rásiph ghan. Ọdi mạapu de phọ, ḅịle ọdi malhe ẹmha esi ọoḅereghi ireeny rꞌasighiigh.

¹⁰Kụ mem dị oomo ịphen phọ meten, aJuda umarani phọ Ịzirel ologhi róḍuom ghan bọ akue bịn mọ ọno marigheel ḍịghaagh ạmi; ọdi órighelom rꞌeekuna ologhi ọdi. Mị Ọmoogh-we phọ kụ ụḅem.”

¹¹Pọ kụ amem dị Ọmoogh-we phọ ụḅeni ịmi mọ, ghạlamo ịdipho Ịzirel mạḍua bọ ni ḍịghaagh ọdi, ọdi ạnighenom ni apu Juda phọ ologhi róḍuom ghan bọ.

¹²Ọdi ụḅeni ịmi ọghi ọḅeni Ịzirel mọ, “Ịzirel ghạlamo ịduon nyina ologhi réḍuom ghan bọ ni, tigheel esi ạmi. Mị aḍighi oye ọnma ighirigiir ḅịle kẹn mị kạ́kagh mun ologhi; mị nyịna kạ́kagham ologhi kꞌagee-pọ.

¹³Meeraam bịn mọ nạ ạpioman ni ḅịle kẹn mọ nạ mạḅaar ẹmhu esi Ọmoogh-we phọ, Ẹnaan phọ ạna. Tuphughian mọ eeḍian ạtorotoro oreeny lọ ạrinya phọ ewil nạ mạngo ẹphomoghian phọ ạna iiruen ạrumugh ḅịle kẹn mọ nạ ịto phọ ạmi ọ́naghanan. Mị Ọmoogh-we phọ kụ ụḅem.

¹⁴“Nyina awe dị ologhi róḍuom ghan, itigheel; nyina ạbuo ạmi. Mị kạsighe weye phọ anyina, oniin oye ẹmha ẹmha, ịyal awe eghun eghun, kụ mị kịsighe inyina aḅulemi ẹpe Eegum ạZayon.

¹⁵Mị kịngo inyina buḍiemiom dị kụnaghanan ghan ịmi, kụ bịdi kọsighe olegheri ịyaar rꞌọnaghan ạḍughum kụ iphoghom ghan inyina.

¹⁶Kụ mem dị nyina meḍiza ẹpe ade phọ, awe kọ́kaaph ghan mun okol Igbe Ịyo phọ ạmi. Bịdi kọ́otughian ghan mun kẹn, kobula ni; bịdi kọ́moogh ghan kẹn ịyaar oḍighinom, bịdi kọ́ka mun ịnon.

¹⁷Mem dị ẹteeny mem mọ ạmuphe phọ, kokol Jeruselem mọ ‘Ạgada Ọdaam Ẹmha Ọmoogh-we phọ’, ḅịle kẹn, oomo areelhe phọ kookpomoghan ghan ẹpe phọ kụ ụuḅereghi ịmi. Bịdi kóḍighi ghan mun ịlo ịkaraph iloghi rꞌoḅom ẹmhu phọ ạbidi ạḅeni bịdi.

¹⁸Ịzirel kọḅophoghan rꞌaJuda, kụ ọḅoph ọnhu ọḍua ẹpe iiruen ạramha phọ bịdi ọrol ghan bọ ẹpe ephunom mọ kụ otigheel ẹpe ade phọ mị ạngo bọ bụrude ạburude phọ anyina mọ ọmoogh kꞌagee-pọ.”

¹⁹Ọmoogh-we phọ ạḅem mọ, “Ịzirel, mị ụwa ghan ọsighe ạna oḍighi ọony ạmi ḅịle rꞌọngo ạna ịma ade, de dị ẹkaraghi ẹnighe sịen oomo aḅirini phọ. Mị ụwa ghan mọ nạ ụmagh ịmi mọ ọde, ḅịle amem kị́tol mun dị nạ kạḍua ḍịghaagh ạmi.

²⁰Kụ ọlo nạ ạkigh ạnir dị ologhi kótue oḍuom, nạ ọ́ḅogh loor phọ ạna ụngo ịmi. Mị Ọmoogh-we phọ kụ ụḅem.”

²¹Ọyugh odi ni ẹpe ạnyu ạraaḅaraph phọ: awe phọ Ịzirel kụ romoghi kọḅile ọoḅereghian, loor esi dị bịdi mọrol dọl ịkaraph ọḅile obula Ẹnaan phọ ạbidi Ọmoogh-we.

²²Itigheel, oomo phọ anyina phọ mẹḍua bọ ḍịghaagh Ọmoogh-we phọ; ọdi kiikonom ni inyina ạḅile iḍighi inyina weye oḍuom ologhi. Ịḅem mọ, “Ii, yoor rotu ni esi Ọmoogh-we phọ, loor esi dị ọdi kụ Ẹnaan phọ ayoor.

²³Yoor ụ́moogh rꞌẹnum ẹloghonaan esi ịiḅereghi aruru ạnyu ạraaḅaraph phọ. Ọloghonaan ạḍighaagh Ịzirel ạḍua ḍịghaagh Ẹnaan phọ ayoor Ọmoogh-we phọ bịn kụ atu.

²⁴Kụ ọlo ịiḅereghi aBaal, ẹmugh umugholoor, meḍighi ịdi ạrutu-ịga, rꞌạnmuny rꞌạnmanyaan ayoor mephe — tọrotoro ịyaar dị ạburude ạburude ayoor mokumuan ghan ọmoogh geedi phọ.

²⁵Ẹkpe ni dị yira kọmina ude kụ umugholoor uukpereghiom iyira. Yira ḅịle rꞌạburude ạburude ayira rọ́gba ghan mem oḍighi ịkaraph esi Ẹnaan phọ ayira Ọmoogh-we phọ; kꞌekulha yira ụ́naghanan ịto phọ ọdi.”