Read abua Jerimaya 30 Bible Online

Jerimaya 30 - abua bible

Jerimaya 30

¹Ọmoogh-we Ẹnaan phọ Ịzirel

²ụḅeni ịmi mọ: “Gẹ loor ạḍinya tọrotoro ịyaar lọ mị mạḅeni nyịna,

³loor esi dị amem retu ni dị mị kaḅulemi weye phọ ạmi, Ịzirel rꞌaJuda. Mị kaḅulemi ni bịdi sịphe ade phọ mị ạngo bọ bụrude ạburude phọ ạbidi kụ bịdi ọḅile ọmoogh. Mị, Ọmoogh-we phọ, kụ mạḅem.”

⁴Ọmoogh-we phọ ạḅeni weye phọ Ịzirel rꞌaJuda mọ,

⁵“Mị ụnaghan ni emoghi aḍiigu, emoghi oghiilaan, kẹ́lo ẹepho.

⁶Nyịidipho igim rụmhu anyina ẹetughian! Olephiri ọony katue ni aamor mọony ạmar ḍụghum? Iḍighi ika kụ mị rạmiin bọ dị tọrobo oye azua bọ rạghaagh ọdi ọkuruḅaka mụdi ạnir dị oghunughun rakun?

⁷“Aḍio aḍiigu retu ni; ạḍinon aḍio dị kọmaam kẹ́tol; amem ịminimiin awe ạmi, kụ bịdi kokpetenaan ni.”

⁸Ọmoogh-we Ẹnaan Oomo Ịikpo phọ ạḅem: “Mem dị aḍio phọ ạḍiphe eru esi, mị kasoph ni oḍigh phọ ọkpoom bọ irum mọ ạbidi kụ ạakpo izime phọ ọphaḍiom bịdi, kụ bịdi kóḍighi mun rẹbene ọ́ngo ruuruen.

⁹Kpạripe ghụn, bịdi kukumu ghan ịmi Ọmoogh-we Ẹnaan phọ ạbidi, ḅịle rꞌọnyo ẹemara ẹemara phọ aDevid dị mị kạdaami aḍighi ọdaam.

¹⁰“We ạmi, kẹ́moogh oghiilaan; weye Ịzirel, ịyaar kị́tol dị kiikperemi inyina. Mị kịtagharan ni inyina ạsighe ẹpe ạḍiikela ade phọ, ẹpe ade phọ nyina edi bọ ikoli phọ. Nyina ketigheel li otu, ẹtol rꞌẹepho; kiikpereghi ni inyina, kụ oye ólho dị kiḍighi inyina ịlo aḍiigu.

¹¹Mị katu ni esi anyina ịtagharan inyina. Mị kapiemi ni oomo areelhe phọ ẹpe mị ịiwalalami bọ inyina, kụ ọlo mị inyina kíphiemi. Mị kạ́bile ọliom anyina kụ mem dị mị ịliom inyina, mị kạtuugh ni eḍighinom. Mị Ọmoogh-we phọ kụ mạḅem.”

¹²Ọmoogh-we phọ ạḅeni we phọ ọdi, “Rẹlem anyina kótue ookonom, ariisi aloor phọ anyina ị́nighe bọ kékeleghu.

¹³Oye ophogh anyina ólho, ịlo oḍighi ạroko aloor phọ anyina ílho, oḍuom ologhi arookonoma inyina ílhoonaan.

¹⁴Oomo ạruga anyina miwula inyina; bịdi inyina rọ́otughian mun. Mị mizuom inyina ịdipho ạmulogh-ḍien; ạmalhiom anyina ạkpar ri loor esi dị ạsipioghom anyina eḍiza ni kụ ẹkaraph eḍighinom ịyaar anyina ẹbugh.

¹⁵Kẹ́looghi mun mọ riḍighi inyina ịdi ị́nighe; arookonom inyina ílhoonaan. Mị ịliom inyina ịduon loor esi dị ạsipioghom anyina eḍiza ni kụ ẹkaraph eḍighinom ịyaar anyina ẹbugh.

¹⁶Kụ nyịidipho kọtaalom ni ịgbalapuur oomo ạbulo ịraalom inyina ịgbalapuur, ḅịle kosiphi ni oomo ẹpomoghian phọ anyina ọḍuanam, Kọkpiloghom ni oomo ạbulo ịkpiloghom inyina, kụ oomo ạbulo ọsighiogh rạraar anyina ẹkaraph ẹsighenom kọsighiogh ni rạraar ạbidi eniin phọ ẹsighenom mọ.

¹⁷Mị kạḅile ni imoonomi inyina; mị kaakonom ni rẹlem anyina, ghạlamo ịduon ạbumulogh-ḍien anyina ọḅem ghan bọ mọ, ‘ẠZayon ẹmha dị oroph ogbeph; oye ólho mun dị rạatughian nyọdi.’ Mị Ọmoogh-we phọ kụ mạḅem.”

¹⁸Ọmoogh-we phọ ạḅem: “Mị kaḅulemi ni we phọ ạmi de ạbidi kụ ạnma ighirigiir tọrobo eghunotu. Jeruselem kọḅile ni ọlogh ogiga ọolha-ẹmha phọ ọḅile oselemi ọosa ịdipho ạrol ghan bọ.

¹⁹Awe phọ ạbuphe orugh bọ ẹpe phọ kọmoor sụor ọsephom, bịdi kọlo ḍịolho iboh. Ạḍiseph ạmi kẹbughe ḍita ạbidi, ạḍiseph ạmi ketuomaan bịdi eghuan.

²⁰Mị kạḅile ni ạsighe ịikpo eelhe phọ aḅulemi ịdipho ẹrol ghan bọ mem ageedi phọ kụ ạḅile ạmeremi ạkparami; Mị kạliom oomo ạbulo ọkpilighiom bịdi.

²¹Oḍiemiom ạbidi kạḍua sịphe ogbo phọ ạbidi kụ amite, oniin ọnyo ạbidi aḍighi ọolha-ẹmha ạbidi. Mem lọ mị ạmagh, ọdi katu esi ạmi — ạnhian kụ kaḍuraan atuman dị ụ́magh? Bịdi koḍighi weye ạmi kụ mị kaḍighi Ẹnaan ạbidi. Mị Ọmoogh-we phọ kụ mạḅem.”

²³Ophin ologhi Ọmoogh-we phọ ạkigh oghim, ogbogh oghim dị kakim ạnyu ạrumhu ạbukaraph awe kụ kásophe tụtu aḍighi amuneni oomo phọ ịpe ọdi magbiighi bọ oḍighi phọ. Siḍughul-otu dị retu awe phọ ọdi kọnaghan ni ịphen phọ dị iikia kẹ́tol.