Read abua Jerimaya 31 Bible Online

Jerimaya 31 - abua bible

Jerimaya 31

¹Ọmoogh-we phọ ạḅem, “Amem retu ni dị mị kaḍighi Ẹnaan oomo arughunughun phọ Ịzirel, kụ bịdi oḍighi weye ạmi.

²Ẹpe ade ịisaar phọ mị ụnma ni ighirigiir weye phọ okpetenaan bọ ḍuugh. Mem mọ aweye phọ Ịzirel ọlom bọ ophooghian phọ,

³mị ugananami ni loor ạmi esi ạbidi kꞌekpisi dị ẹkel. Weye Ịzirel, mị rịphomoghian ghan ni inyina. Ịduon kụ ẹdi mị riḍeenaan ghan ni inyina ẹphomoghian dị rébi ghan.

⁴Amem kẹtol li dị mị kạḅile ni iselemi inyina. Amem kẹtol li dị nyina kẹḅile ẹsighe rạraar ephegh anyina kụ ẹkerom ịḅa rꞌibo.

⁵Amem kẹtol li dị nyina kẹḅile ẹzuphogh ireeny avain sịphe aroogbolom mọ aSameria, kụ bụphe ọzuph bọ kole ịlo ẹḍua sịphe phọ emite.

⁶Ii, amem retu ni dị abukoriom kọlooghi sịphe aroogbolom mọ Ifraim, ‘Itu ọghi ẹpe Zạyon ọteeny Ọmoogh-we Ẹnaan phọ ayira.’”

⁷Ọmoogh-we phọ ạḅem mọ, “Ịmooraan Ịzirel rꞌibo, ọkar egbogh ẹmha. Ịmoor ḍụor ọsephom mọ anyina, ‘Ọmoogh-we phọ mạphel we phọ ọdi, ọdi mạtagharan oomo ạbulo osugha.’

⁸Mị kaakpomoghi ni bịdi kꞌẹpe ephunom mọ kụ ạamaghagh bịdi kꞌaruukuna ade phọ. Awe ikpom ariḍien rꞌạrukugha kotu aani ni, ạnmariir lọ odi rꞌịyal amem aloor rꞌạbulo oghunughun rakun. Bịdi kotigheel kụ oḍighi egbogh eelhe.

⁹Awe ạmi kotigheel rꞌemoghi kụ ọḅaram ịiḅereghi mem dị mị ạpham bịdi ratighelom. Mị katorori bịdi asiemi sikol ạmuum, sịphe eten dị ịyaar okpetaan kẹ́tol. Mị ạkigh ọde esi Ịzirel kụ Ifraim kụ ọkpana ạmi.”

¹⁰Ọmoogh-we phọ ạḅem, “Reelhe, ịnaghanan ịmi kụ egbeelom ikpo ọnhu phọ ạmi ẹghimom rikpisi dị ẹkelogh. Mị ụuwalami ni weye phọ ạmi, kụ ọlo mị kaakpomoghi bịdi kụ ạmaar apogh bịdi ịdipho okoriom mọ rapogh ghan bọ ḍita ịga phọ ọdi.

¹¹Mị mạakpo weye phọ Ịzirel kụ ạpel bịdi ạsighe ḍịghaagh eelhe dị ẹmoogh ịnyaam.

¹²Bịdi kotu kụ ọmoor sụor iboh sịphe Eegum ạZayon kụ ọmoogh ọḅaal ologhi esi aruunmo ạmi — aruunmo ịbiakpa, amiim rꞌạmunum-ọliv, aruunmo iyool-ịga rꞌạsinam. Bịdi kọkigh ozo ịizupha dị ooḍuom ghan mụum agey; bịdi kọmoogh oomo ạraraar lọ ekuom.

¹³Kụ ạnmanyaan phọ kọkerogh ịḅa kụ ọḅaal ologhi, kụ alephiri, nmụny rꞌikumoor awe, ọmoogh iboh. Mị kạadereghi ni bịdi kụ ạsighe emoghi phọ ạbidi atene iboh, ọto phọ ạbidi atene ọḅaal ologhi.

¹⁴Mị kạngo ni bụpinyon rịkia phọ ọkar egey eḍien ạḅile ạperemi oomo ạruuphua awe phọ ạmi.”

¹⁵Ọmoogh-we phọ ạḅem mọ, “Oye atu rạlooghi ẹpe Rama, ẹḍogh emoghi dị eeph. ARechel kụ ramoghinaan nmụny phọ ọdi; bịdi momuughu kụ ọdi ómeera mọ ọodereghi nyịno.

¹⁶Isophe emoghi phọ anyina kụ egbuurogh izin phọ anyina. Oomo ịdi nyina meḍighinaan nmụny phọ anyina kékeel oopho; bịdi kọḍua de ạmulogh-ḍien phọ otigheel.

¹⁷Oḍuom ologhi idianaan inyina mem dị retu; ạnmuny phọ anyina kotigheel li. Mị Ọmoogh-we phọ kụ mạḅem.

¹⁸“Mị ạnaghan ịdi aweye phọ Ịzirel ọḅem esi ọto, ‘Ọmoogh-we, yoor ụghigh ẹnam dị úukonom kụ nạ ụtughemi iyoor ọnaghanan. Uḅulemi iyoor; yoor ọnya origheel esi ạna, Ẹnaan phọ ayoor Ọmoogh-we phọ.

¹⁹Yoor ụwile ni nyịna, kụ ẹnum amem bịn yoor rọwa origheel. Mem dị nạ mụlhiom iyoor, yoor uzumeri rụmhu esi ọto. Aroofola rꞌumugholoor usiph ni iyoor, loor esi dị yoor ụpioghom mem ugheel.’

²⁰“Ịzirel, nạ kụ ọony ologhi ạmi, ọony dị mị ạkar ạphomoghian. Tọrobo amem lọ mị aghol ḍien phọ ạna, mị ạatughian nyịna rꞌẹphomoghian. Mị ạphomoghian ni nyịna rꞌoomo ologhi phọ ạmi; mị kạnma ni ighirigiir.

²¹Igimi rọko ẹloghom elegh eten phọ, ẹḅile emitiom eten phọ nyina erelhe bọ kụ ẹḍua. Itigheel, weye Ịzirel, itigheel ẹpe ạramha phọ nyina ẹrol bọ kụ ẹḍua.

²²Kꞌạpur-aḍio kụ ẹdi nyina kẹekpukian, we dị omeeraam ụ́moogh? Mị mạlhem emoom ịyaar dị ẹgbatanaan, mụdi ạnir dị raakpereghi olephiri ọony.”

²³Ọmoogh-we Egbogh Ẹnaan phọ Ịzirel ạḅem, “Mem dị mị ạḅile aḅulemi weye phọ sịphe ade phọ ạbidi, bịdi kọḅile ni ọḅem sịphe ade phọ aJuda rꞌịsiphe ạramha phọ ọdi mọ, “‘Ọmoogh-we phọ ạseph ni eegbolom iigbia phọ aJeruselem, esi iigbia phọ ọdi odi ghan bọ.’

²⁴“Awe kọtol li ẹpe Juda rꞌoomo ạramha phọ ọdi. Abuḅephom iizo kọtol li rꞌabukoriom rꞌaḍita ịga ạbidi.

²⁵Mị kạḅile ni amoonomi bụphe mokumuan bọ ịikpara arukumuan kụ ạperemi eḍien tọrobo oye lọ adugh loor ọkoony.

²⁶Kụ mem mọ ọpo awe kọḅem ni mọ, ‘Mị ụmina ạnaani kụ asuma aloghoma loor ạmi mọ memoon.’

²⁷“Mị Ọmoogh-we phọ ạḅem mọ amem retu ni dị mị kamuzeḍi de phọ Ịzirel rꞌaJuda weye rꞌịnam.

²⁸Kụ ịdipho mị amiighe bọ loor kụ aruph, amiteghom, ạkpar apu, aphiemi kụ aagulemi, ịduon kụ ẹdi mị kamiighe loor aḅeph kụ ạmeremi yogh.

²⁹Mem lọ aḍio phọ ạḍiphe ẹteeny, awe kọ́ḅem mun mọ, ‘Ọde rꞌonhiin kụ ule oloomini kụ ọlo ạralaay ạnmuny kụ reekiigh.’

³⁰“Kpạripe ghụn tọrobo ọlo ale grep dị rạlagh, ạralaal ọdi kụ keekiigh; kụ tọrobo oye kamugh esi ạsipioghom ọdi.”

³¹ Ọmoogh-we phọ ạḅem mọ, “Ariiḍio retu ni dị mị kakiran imoom ịyo rꞌawe phọ Ịzirel rꞌawe phọ aJuda.

³²Kẹ́kigh ịpe mị aghiran bọ rꞌạbugbogh ạburude phọ ạbidi, ḍio phọ mị ạpham bọ bịdi ḍịghaagh phọ ạbidi oḍiemiom ạbidi ọḍua eelhe phọ Ijipt. Ghạlamo ịduon mị aḍighi bọ ịdipho olhom ạbidi, bịdi ụ́daph ịyo phọ.

³³Imoom ịyo phọ mị kakiran bọ rꞌaweye phọ Ịzirel keḍighi ịduon: mị kạlogh iilogh ạmi ạngo bịdi kụ ạgeeghi sịphe iloghi phọ ạbidi. Mị kaḍighi Ẹnaan ạbidi, kụ bịdi oḍighi weye ạmi.

³⁴Rꞌoniin ọnyo ạbidi kụ kạ́tughemi bụeri phọ mọ olegheri Ọmoogh-we phọ, ịdi eḍighi bọ oomo phọ ạbidi kulegheri ni ịmi, emiigh kꞌọbam kụ ẹteeny kꞌogbogh. Mị kạsar ịkaraph ạbidi ạbile kụ mị kạ́atughian mun sịpioghom mọ ạbidi. Mị Ọmoogh-we phọ kụ mạḅem.”

³⁵Ọmoogh-we phọ amitiom erumuḍio ọngo ghan ạḍiḅaal ootaany, ụnwanyu phọ rꞌạraanaan phọ ọmu ghan aḍughul. Ọdi apighemi ọphiiny phọ kụ amitiom ḍiboom ạḍiaḅa; aḍien ọdi Ẹnaan Oomo Ịikpo Ọmoogh-we phọ.

³⁶Ọdi aguanaan mọ ịdipho ạraraar phọ Ọmoogh-we phọ asereghi bọ edi ghan bọ bịn, ịdipho kụ ẹdi Ịzirel keḍighi eelhe.

³⁷Eḍighi ịyaar dị aḍio kẹteeny dị kotue ọtooghi okuaḍio phọ kụ ọwa olegheri ephighiom ade phọ, pọ bịn kụ amem dị ọdi kakel we phọ Ịzirel loor esi oomo ịpe bịdi moḍighi bọ. Ọmoogh-we phọ kụ mạḅem.

³⁸“Amem mọ retu ni,” Ọmoogh-we phọ ạḅem, “dị kọḅile ọlogh Jeruselem, ẹmha ạmi, ọmadan, emiigh Ẹsogolo Esi Otu ạHananel ẹpe erumuḍio phọ remeel ghan bọ kụ esi Ọnhu-aḍibuo Ẹkul.

³⁹Kụ ọku phọ kamiigh sịphe kụ ạki ẹpe erumuḍio phọ remeel ghan bọ kụ asi Ẹeḅaraph ạGareb kụ akoom asi sịphe Goa.

⁴⁰Oomo eḍiiny phọ, esi phọ roḍiighi ghan bọ iḍim mọ kụ ọḅile rotoph ghan atopha, rꞌarere phọ edi bọ risigh okol ạmuum ạKidron kụ ẹghi esi Ọnhu-aḍibuo Ịnam-Ạsu ạga emitenom erumuḍio phọ — oomo phọ ịdi keḍighi esi ạdol iigbia ạmi. Ẹmha phọ amem kẹ́tol mun dị koogulemi.”