Read abua Jerimaya 33 Bible Online

Jerimaya 33 - abua bible

Jerimaya 33

¹Mem dị mị ạrol ikoli sịphe ogiga phọ, adom Ọmoogh-we phọ ịḅile ni ịteeny ịmi.

²Ọmoogh-we phọ, ọpo ạlhem bọ de phọ, ọpo amitiom bọ de phọ kụ aseere esi dị ẹkpe, ụḅaanaan ni ịmi. Ọdi phọ aḍien phọ ọdi eḍighi bọ Ọmoogh-we phọ ạḅem:

³“Ụmagh ịmi kụ mị kạnaghanan ni nyịna, mị kạḅeni ni nyịna iikia ạraraar ịiḍaany dị nạ úlegheri.

⁴Mị Ọmoogh-we Ẹnaan phọ Ịzirel kụ ụḅem mọ aruutu phọ aJeruselem ḅịle rꞌịpe ịsiphe ogiga ọolha-ẹmha phọ aJuda kokiton ni ozuemi, loor esi dị ạbuo ẹgham mọ ạBabilon mokoom ẹmha phọ okpobiom kụ kị́nighenaan inyina ọghi omite eenan rꞌạbidi ọbo komuzeḍiom ghan bọ ẹmha phọ iḍim ạbuphe mị kạgurogh bọ alereghi rꞌogbogh ophin ologhi ạmi. Loor ịkaraph ạraraar phọ awe phọ ọdi moḍighi yogh bọ, mị kápoghom mun egey ekpeḍien ẹmha phọ ẹphen.

⁶Kụ ọlo mị kaakonom ni ẹmha phọ ẹphen rꞌawe phọ ọdi kụ ạḅile ạngo bịdi omoon aloor, ẹepho rꞌedughom dị kẹbugh iboom.

⁷Mị kaḍume Juda rꞌỊzirel kụ ạḅile aselemi bịdi aseere ịpe ẹrol ghan bọ.

⁸Mị kạasa bịdi esi ịkaraph phọ bịdi muḍighi yogh bọ ịmi, kụ mị ạsar ạbilenaan sịpioghom mọ rꞌọḅaar ẹmhu phọ ạbidi.

⁹AJeruselem kaḍighi zin iboh, eghuan rꞌoobagaam esi ạmi; kụ tọrobo eelhe sịen aḅirini phọ kekiilaan kụ epiigha mem dị bịdi ọnaghan ịlo igey ạraraar dị mị aḍighinaan weye aJeruselem rꞌedughom mọ mị aruomaan bọ ẹmha phọ.”

¹⁰Ọmoogh-we phọ ạḅem, “Awe rọḅem ghan mọ esi phọ ịsien ẹkigh de ịisaar dị awe rꞌịnam ítugh. Kụ bịdi ụ́pioman; ạramha phọ aJuda rꞌaroḅodo phọ aJeruselem epoghogho ni; awe rꞌịnam ílho ghan. Kụ ọlo riisi phọ ịphen nyina kẹḅile ni ẹnaghan

¹¹ḍịolho ọḅaal ologhi rꞌibo rꞌiitia ile apinien. Nyina kẹnaghan weye dị rọmoor sụor dị ọsighe inmo rotumom Otu Ịiḅereghi phọ ạmi; bịdi kọḅem mọ, “‘Ịngo ḍịseph Ẹnaan Oomo Ịikpo Ọmoogh-we phọ loor esi dị ọdi ạnighe ni kụ ẹphomoghian ọdi edi ghan bịn kꞌagee-pọ.’ “Mị kaḍighi ịdi ade phọ ạḍien kemuum iimuma ịdipho emuum ghan bọ. Mị Ọmoogh-we phọ kụ mạḅem.”

¹²Ẹnaan Oomo Ịikpo Ọmoogh-we phọ ạḅem, “Sịen ade phọ ạḍien ẹghigh bọ de ịisaar phọ, esi dị awe rꞌịnam ítugh, amem kẹḅile ni etu dị ạroogho kasi kụ abukoriom ịga ọkimom iyool-ịga.

¹³Sịphe ạramha ịigaany ạraaḅaraph phọ, rꞌiizin ạraaḅaraph phọ, rꞌesoorom aJuda, rꞌeelhe phọ ạBenjamin rꞌịbam ạramha dị etuman Jeruselem rꞌạramha aJuda, abukoriom ịga kọḅile ni ogbi iyool-ịga ạbidi. Mị Ọmoogh-we phọ kụ mạḅem.”

¹⁴Ọmoogh-we phọ ạḅem, “Amem retu ni dị mị kaḍighi ịpe mị aguanaan bọ we phọ Ịzirel rꞌaJuda.

¹⁵Mem mọ ọpo phọ mị kạma oye aruukuan ọnyo ẹemara ẹemara aDevid kụ ạdaami. Ọdaam mọ ọpo kaḍighi ghan elhiom eḍighinom dị ẹnighe oomo ịsiphe ade phọ.

¹⁶Kọtagharan ni we aJuda rꞌaJeruselem kụ bịdi ọtol dọl ẹereegh. Ẹmha phọ kokol mọ, ‘Ọmoogh-we phọ Ọpelia ayoor.’

¹⁷Mị Ọmoogh-we phọ aguanaan mọ oomo amem oniin ọnyo ẹemara ẹemara aDevid kụ kaḍighi ghan ọdaam-ẹmha phọ Ịzirel,

¹⁸ḅịle mọ oomo amem ariil ạrikia kọtol li dị komite sịphe eghun phọ aLivai kụ kukumu ịmi. Ọdi kụ kạpinyon rịkia oguom ạnian rꞌạrikia ịbiakpa rꞌịnon ọdo ạrikia.”

¹⁹Ọmoogh-we phọ ụḅeni ni ịmi,

²⁰“Mị maghiran ịyo rꞌootaany ḅịle rꞌaḍughul, ẹrol dị bịdi etu ghan mem lọ ẹkpianaan; kụ ịyo phọ ịpe kóogbonyon.

²¹Eniin phọ eḍighinom mọ kụ ẹdi mị maghiran ịyo rꞌaDevid otelhedom mọ ạmi mọ oomo amem ọdi kạmoogh ghan ọnyo ẹemara ẹemara dị kaḍighi ghan ọdaam; kụ mị maghiran ịyo rꞌariil ạrikia phọ sịphe eghun phọ aLivai mọ bịdi kukumu ghan ịmi oomo amem; kụ ịyo phọ ịpe kóogbonyon.

²²Mị kạbughe ẹemara ẹemara aDevid otelhedom mọ ạmi rꞌaḍita ariil ạrikia phọ sịphe eghun phọ aLivai ẹrol dị ẹkparanaan oye ogbi ạbidi ịdipho ẹkparanaan bọ ogbi ạraanaan phọ edi bọ okuaḍio phọ mụghumo ikpo ịisaar ọgbal ọphiiny phọ.”

²³Ọmoogh-we phọ upuru ịmi,

²⁴“Nạ mạnaghan ni ịdipho awe rọḅem ghan bọ mọ mị maghel Ịzirel rꞌaJuda, ịyal phọ arughunughun mị ạsaḅar bọ? Kụ loor esi ịduon phọ bịdi ropoghom we phọ ạmi rꞌophin ologhi kụ rọ́sighe mun bịdi mọ eelhe.

²⁵Kụ ọlo mị Ọmoogh-we phọ maghiran ịyo rꞌootaany ḅịle rꞌaḍughul kụ mị mạlhoghoḍi iilogh dị kẹpam de phọ rꞌokuaḍio.

²⁶Ịduon mị maḍighi bọ ịphen phọ kụ ẹdi mị kạpamanam ịyo phọ ạmi rꞌẹemara ẹemara ạJekob rꞌaDevid otelhedom mọ ạmi. Mị kạsaḅar oniin ọnyo ẹemara ẹemara phọ aDevid ạda ẹemara ẹemara Ebraham rꞌẠizik rꞌạJekob. Mị kạnma ighirigiir we phọ ạmi kụ ạḅile ạngo bịdi edughom.”