Read abua Jerimaya 38 Bible Online

Jerimaya 38 - abua bible

Jerimaya 38

¹ASefataya ọony aMatan, aGedalaya ọony aPashur, aJehukal ọony aSelemaya rꞌaPashur ọony aMalkaya ụnaghan ni mọ mị rạḅeni ghan weye phọ mọ

²Ọmoogh-we phọ mạḅem mọ, “Tọrobo oye lọ ạrol sịphe ẹmha phọ kamugh erugh ẹgham ghạlamo ọkoony ḅịle kẹn mꞌẹzegh. Kụ ọlo tọrobo oye lọ ạḍua kụ aphoophe rạghaagh ạngo weye ạBabilon phọ kókiigh; ịlo eḍighi eḍighi, ọdi kạpam ni ghuḍum ọdi.”

³Mị ụḅeni ghan nịiniin bịdi mọ Ọmoogh-we phọ mạḅem mọ, “Mị kạḅogh ni ẹmha phọ ạngo weye ẹgham mọ ạBabilon kụ bịdi ọsighe.”

⁴Pọ kụ amem dị ạbuo iiḍighi phọ ọghi ọteeny ọdaam-ẹmha phọ kụ ọḅem mọ, “Kiigh oye phọ ọphon. Ịduon phọ ọdi rạḅem bọ, ọdi raḍighi ịdi ariḅio awe ẹgham mọ odi bọ ologhi ẹmha phọ kẹkaaphagh, kụ ọghaaph ọdi raḍighi ghan eniin eḍighinom mọ esi ạbueri phọ awe phọ odi bọ sịphe ẹmha phọ. Ọdi ọ́wa ọlhoghonaan ạḍighaagh awe phọ; ọdi rạwa ghan ọmiine ạbidi.”

⁵ẠZedekaya ọdaam mọ ạphagharanaan, “Ọkar agey, pọ iḍighinom nyọdi ịlo ịḅeeraan inyina, mị inyina kíkikima.”

⁶Kụ bịdi ụlogh ịmi oḍigh kụ usumeeny ịmi aghuḍia ọkpana ọdaam dị oghol mọ aMalkaya. Aghuḍia phọ ạrol sịphe ogbo ogiga phọ; ạmuum ọ́rol, ọposo bịn kụ ạrol, kụ mị aḅi sịphe ọposo phọ.

⁷Tọrobo ịlo eḍighi, Ebed Mẹlek ọnyo Ẹtiopia, ophooneen oye dị odi ghan oḍighi ogiga ọdaam mọ, ạnaghan mọ bịdi musumeeny ịmi aghuḍia. Mem mọ ọpo phọ ọdaam mọ raagbo ghan ịiruen sịphe Ọnhu-aḍibuo ạBenjamin.

⁸Kụ Ebed Mẹlek ạghi sịphe kụ ạḅeni ọdaam-ẹmha phọ,

⁹“Ogbogh ọde, ịphen awe phọ ạbuen moḍighi bọ ẹpioman ni. Bịdi mosumeeny aJerimaya aghuḍia, esi dị ọdi kamugh ọkoony loor esi dị eḍien ílho mun ẹmha phọ.”

¹⁰Kụ ọdaam-ẹmha phọ ạto ạḅeni Ebed Mẹlek mọ ạpham ịraar awe ọḅaram rꞌọdi oru uphune ịmi sịphe aghuḍia phọ kụ mị agbi omugh.

¹¹Kụ Ebed Mẹlek ạpham we phọ ạghimom eekoom ạraraar ogiga ọdaam mọ kụ ạsighe igbaany arukpe kụ ạkagham oḍigh kụ asoore ịteeny ịmi.

¹²Ọdi ụḅeni ịmi mọ mị ụlogh igbaany arukpe phọ ịipaaph ạmi, ọbo oḍigh phọ kukponyon ghan bọ ịmi. Mị aḍighi ịduon phọ,

¹³kụ bịdi ụkpa ịmi ophune sịphe aghuḍia phọ. Ịpe reten kụ useere ịmi sịphe ogbo ogiga phọ.

¹⁴Ẹnon amem, ạZedekaya ọdaam mọ ạḅem mọ mụsighe ịmi osiom sịphe ọnhu-aḍibuo eḍighom Otu Ịiḅereghi phọ, nyọpo amuneniom bọ ịraar phọ, kụ ọdi ạḅem mọ, “Mị kapuru nyịna ḍipuru kụ mị rạwa dị nạ kụḅeni ịmi igey phọ.”

¹⁵Mị ạphagharanaan, “Eḍighi ịyaar lọ mị ạḅeni nyịna igey phọ, nạ kughiigh ni ịmi, kụ eḍighi ịyaar lọ mị ạngo nyịna oroma, nạ kạ́naghan.”

¹⁶Kụ ạZedekaya ọdaam mọ uguanaan ịmi esi ịbooghian, “Mị akunya rꞌaḍien Ẹnaan phọ edi ghan bọ, Ẹnaan phọ ẹpe ịngo bọ iyira ghuḍum, mọ mị nyịna kághiigh ḅịle kạ́ḅogh nyịna ạngo we lọ rọwa oghiigh ạna.”

¹⁷Pọ kụ amem dị mị ạḅeni Zẹdekaya mọ Ọmoogh-we Egbogh Ẹnaan phọ Ịzirel mạḅem mọ, “Eḍighi ịyaar lọ nạ aphoophe rạghaagh ạngo bụo iiḍighi ọdaam-ẹmha phọ ạBabilon, kọwile ni nyịna kụ ẹmha phọ ẹphen kọ́su mun. Kọwile ni nyịna rꞌeghunotu phọ ạna.

¹⁸Kụ ọlo nạ óphoophe rạghaagh, pọ kọḅogh ni ẹmha phọ ẹphen ọngo we ạBabilon. Bịdi kọsu ni oguulemi, kụ nạ kákpetenaan bịdi.”

¹⁹Kụ ọdaam-ẹmha phọ ạphagharanaan mọ, “Mị rakiilaan ni we ẹmha phọ bụphe mosuma bọ ọdaphan we ạBabilon phọ. Iini kụḅogh ni ịmi ọngo bịdi kụ ukuphogh ịmi.”

²⁰Mị ạḅem mọ, “Kọ́ḅogh nyịna ọngo bịdi. Mị ạaḅereghi ni nyịna ọnaghanan adom Ọmoogh-we phọ; bịn kẹnighenaan ni nyịna kụ oye kạ́ḅogh ghuḍum ạna.

²¹Kụ ọlo Ọmoogh-we phọ muḍeenaan ni ịmi uḍien ịdi kemite lọ nạ úmeera úpoophe rạghaagh.

²²“Mị ụmiin dị oomo ạnmariir phọ ọwile bọ sịphe ogiga ọdaam mọ aJuda dị rotelhiom kọghiomaan bụo iiḍighi ọdaam-ẹmha phọ ạBabilon. Nạghan ịdi bịdi ọḅem ghan mem mọ bịdi rọḍua bọ: “‘Ọkar igey ạrighiri ọdaam mọ kụ uukeleghi nyọdi, ịtooghi ạbidi kụ ipu ịlo ọdi. Kụ nyịidipho aruwol ọdi meḅi ologhi ọposo phọ, ạrighiri phọ ọdi mọwile nyọdi.’”

²³Kụ mị ạloghom mọ, “Oomo ạnmariir rꞌạnmuny anyina kọsighiogh ni ọkiomaan weye phọ ạBabilon, kụ nạ rꞌaloor kákpetenaan bịdi. Ọdaam-ẹmha ạBabilon phọ kasiph ni nyịna aḍighi ọnyo-ikoli, kụ ẹmha phọ ẹphen kọsu ni oguulemi.”

²⁴ẠZedekaya ạphagharanaan mọ, “Káḍighi ịdi rꞌoniin oye kalegheri rạghaaph phọ ịphen, bịn aghuḍum ạna kạ́tol esi ịiḅaghami.

²⁵Eḍighi ịyaar dị ạbuo iiḍighi phọ ọnaghan mọ mị mạḅaanaan nyịna, bịdi kotu ni opuru nyịna ịyaar lọ yira ọghaaph. Bịdi koguanaan ni mọ bịdi nyịna kóghiigh eḍighi ịyaar lọ nạ ạḅeni bịdi oomo phọ ịne.

²⁶Ḅẹni bịdi mọ nạ ụuḅereghian ghan ịmi mọ mị kúḅulemi nyịna sịphe otu ikoli phọ, ọrol ịsiphe omugh.”

²⁷Kụ oomo ạbuo iiḍighi phọ oru rupuru ghan ịmi kụ mị ạḅeni ọkar ịpe ọdaam mọ ạḅem bọ mọ mị ụḅem mọ. Ịyaar dị bịdi koḍighi mun ị́tol, loor esi dị oye ọ́naghan rạghaaph phọ.

²⁸Kụ useere ịmi sịphe ogbo ogiga phọ tụtu kꞌaḍio phọ ọsighe bọ Jeruselem.