Read abua Jerimaya 39 Bible Online

Jerimaya 39 - abua bible

Jerimaya 39

¹Ụnwanyu phọ ọpo amuneniom bọ ḍioph phọ, lhạ dị eḍighi esugha dị ạZedekaya aḍighi ọdaam-ẹmha phọ aJuda, ạNebukadnezar ogbogh ọdaam mọ ạBabilon arumom oomo awe ẹgham ọdi kụ azuom Jeruselem.

²Ḍio phọ ạḍiphe emuneniom bọ esugha phọ ụnwanyu phọ ọpo amuneniom bọ inya phọ, lhạ dị eḍighi ḍioph rꞌaḍiniin dị ạZedekaya aḍighi ọdaam mọ, uḅonyon ni iikpe ẹmha phọ.

³(Mem dị mọsighe bọ Jeruselem, oomo abugbogh ạbuo iiḍighi ọdaam mọ ạBabilon uru ni kụ ọrologhu ude sịphe Ọnhu-aḍibuo Ogbo phọ — sịphe ogbo ạbidi aNegal Sarezer, ạSamgar Nebo, aSaasekim rꞌọnon aNegal Sarezer.)

⁴Mem dị ạZedekaya rꞌoomo ạbuo ẹgham mọ ọdi ọmiin bọ ịdi remite, bịdi ụwa ni osuma ọḍua sịphe ẹmha phọ mem aḍughul. Bịdi urelhe eten dị ẹkpaariom esi ịizupha ọdaam mọ, ọḅeeny eten ọnhu-aḍibuo phọ dị ẹkpasi ịyal iikpe phọ kụ osuma ḍịghaagh Eḍiiny ạJodan.

⁵Kụ ọlo awe ẹgham mọ ạBabilon ophorogh bịdi kụ osiph Zẹdekaya ẹpe ạḍiyaghaghaany ade dị etuman Jeriko. Kụ bịdi ọsighe nyọdi ọghiomaan Nẹbukadnezar ogbogh ọdaam mọ dị ạrol sịphe ẹmha aRibla ẹpe eelhe ạHamat, kụ sịphe kụ edị ạNebukadnezar asoph ọoruen aphume nyọdi.

⁶Ẹpe Ribla ọdi aghiigh mọony ạZedekaya egbodo ạZedekaya, kụ ạḅile ạze we iiḍighi phọ aJuda.

⁷Ịphen reten ọdi ạponyon riḍien ạZedekaya ạsighe kụ ạphaḍiom nyọdi izime kụ ọpham nyọdi ogheelom ẹpe Bạbilonia.

⁸Mem mọ ạmuen phọ awe ẹgham mọ ạBabilon mọsuughi nịan otu ọdaam mọ rꞌaruutu awe phọ osiemi ude ọḅile olereghi iikpe phọ aJeruselem.

⁹Ekureriom mọ, ạNebuzaradan oḍiemiom ọnyo ẹgham mọ ạsighe ạḍuanam we phọ osugha bọ ẹmha phọ ḅịle rꞌạbuphe mosuma bọ kụ oru ọteeny nyọdi ạghimom ẹpe Bạbilonia.

¹⁰Ọkaraghi arukulom bịn, dị ruphua ụ́moogh, kụ ẹdi ọdi ạwile sịphe ade phọ aJuda kụ ạngo bịdi iizo ireeny avain rꞌarere.

¹¹Kụ ạNebukadnezar ogbogh ọdaam mọ ạto ạḅeni Nẹbuzaradan oḍiemiom ọnyo ẹgham mọ,

¹²“Kịa ạwa Jerimaya kụ ạmaar ạpham nyọdi. Káḍighi nyọdi ịyaar, kụ ḍighinaan nyọdi tọrobo ịlo ọdi ạwa.”

¹³Kụ ạNebuzaradan, ḅịle rꞌạNebusazban rꞌaNegal Sarezer, abugbogh ạbuo ẹgham mọ ọdi, rꞌoomo ạbueri phọ ạbuo iiḍighi ọdaam-ẹmha phọ ạBabilon,

¹⁴ụsighe ịmi omitiom sịphe ogbo ogiga phọ. Bịdi useenaan ịmi Gedalaya ọony Ahikam rꞌọony ọony aSafan mọ ọdi ạmaar uphogh ịmi ạḅile ụsighe ịmi asiemi otu rꞌẹepho. Ịdipho kụ ẹdi mị ạrolan rꞌawe phọ.

¹⁵Mị odi ni ikoli phọ sịphe, kụ Ọmoogh-we phọ ụḅeni ịmi

¹⁶mọ mị ụki ụḅeni Ebed Mẹlek ọnyo ạSudan phọ mọ Ọmoogh-we Egbogh Ẹnaan phọ Ịzirel mạḅem mọ, “Ọkar ịdipho mị ạḅem bọ mọ mị kaḍighi phọ, mị katuomaan ẹmha phọ ẹphen muphe kédughom. Kụ mem dị ịphen emite, nạ kạtol li sịphe kụ ạmiin.

¹⁷Kụ mị Ọmoogh-we phọ kaakpereghi nyịna kụ kạ́ḅogh nyịna ạ́ngo we phọ nạ rakiilaan bọ.

¹⁸Mị kạmaar ri ạpham nyịna, kụ nyịna kóghiigh. Nạ kạtol li loor esi dị nạ mạkpasi oḍuom ologhi ạna esi ạmi. Mị Ọmoogh-we phọ kụ mạḅem.”