Read abua Jerimaya 4 Bible Online

Jerimaya 4 - abua bible

Jerimaya 4

¹Ọmoogh-we phọ ạḅem mọ, “Weye Ịzirel, eḍighi ịyaar dị nyina rẹwa ni okiton, pọ ikiton eru esi ạmi. Eḍighi ịyaar dị nyina emeeraam kụ eroḅologhi ịkaaghineen aruru phọ mị rạ́wa ghan bọ ọmiin phọ bịn kụ ẹrolan rꞌạmi,

²pọ keḍighi ni sụo ịngo inyina dị nyina kekunya ghan rꞌaḍien ạmi. Pọ kụ amem dị oomo areelhe phọ kụlom ịmi ọseph ạbidi, ḅịle kẹn bịdi kuboom ni ịmi.”

³Ọmoogh-we phọ ạḅeni weye aJuda rꞌaJeruselem mọ, “Iḅeph iizo anyina lọ kőḅeph; kẹ́zuph ịizupha anyina igbo iitoor.

⁴Ịmaar eeko ịyo phọ nyina eghiran bọ rꞌạmi Ọmoogh-we phọ anyina, ẹḅile ẹḅogh siloor anyina ịngo ịmi, nyina aweye aJuda rꞌaJeruselem. Eḍighi ịyaar dị nyina ímeera, ọghagh ologhi phọ ạmi kaamor ịdipho ạnian loor esi ịkaraph phọ nyina meḍighi bọ. Ọghagh ologhi phọ kaamor ri, kụ oye ólho dị katue aḍime.”

⁵Ipula ọkuodu phọ ẹghiom ạnyu de phọ! Ịlo emitiom agey! Ịḅeni weye aJuda rꞌaJeruselem mọ oghiil oḍiku rạmha phọ ịpe oghoony bọ.

⁶Ịma eten phọ rẹki bọ Zạyon! Ikiil ẹghi ạaghian! Kétoph mem! Ọmoogh-we phọ mạsighe ịminimiin ratu; ilhom ịiḅaghami rꞌoogulemi mẹḍua ẹpe ephunom mọ retu.

⁷Ịdipho ạnam-dịka rạḍua ghan bọ esi ịbooghian ọdi kamite, kụ ẹdi oye dị kaagulemi reelhe phọ maḅetenu. Ọdi ratu ni oogulemi aJuda; Igbogh ạramha phọ aJuda keegulaan ni, kụ oye kátugh mun sịphe phọ.

⁸Kụ iḍighi kụ ịkpologhian rụsuoma ọto. Ẹḅile emoghi ẹlooghi, loor esi dị ogbogh ọghagh ologhi Ọmoogh-we phọ kọ̋ḍua esi aJuda.

⁹Ọmoogh-we phọ ạḅem mọ, “Ḍio phọ ạḍiphe phọ ạbudaam-ẹmha rꞌạbuo ịtooghi kọ́moogh mun ạkpo ologhi; ariil ạrikia phọ kokperenom yogh ni ḅịle ariil phọ Ẹnaan komaghagha ni.”

¹⁰Pọ kụ amem dị mị ạḅem mọ, “Ọkar Ogbogh Ọmoogh-we, nạ mạkar bịn kụ aakeleghi weye phọ aJeruselem! Nạ ụḅem mọ ẹepho kẹtol li, kụ elhool ẹgham kụ edi sịphe ooko phọ ạbidi.”

¹¹Amem retu ni dị kọḅeni weye phọ aJeruselem mọ ọghologhol ookuugh akugh ni ẹpe ẹdala phọ ratu ọteeny ạbidi. Ookuugh phọ óḍighi ọbam dị kạsighiogh ịiphia bịn —

¹²ookuugh phọ ratu bọ esi ịto Ọmoogh-we phọ kạkpar ri iboom! Ọmoogh-we phọ rꞌaloor kụ rasoph ọoruen kạngo weye phọ ọdi.

¹³Ipogh, ạbuo ẹpomoghian phọ rotu ịdipho ọotu. Arughuugh ẹgham ude phọ ạbidi ẹkigh ịdipho oghim, ḅịle ạrusu phọ ạbidi oḍiku bọ ekiil epu uga. Yira mophe! Yira moguul!

¹⁴Jeruselem, tootola ịkaraph sịphe ologhi phọ ạna, pịdi nạ ạmoogh pẹleeny. Ạpur amem kụ nạ ạbile ọotughian ghan ịkaraph ịitughian?

¹⁵Abutelhedom dị ọḍua ẹpe ẹmha phọ ạDan ḅịle rꞌẹpe ạraaḅaraph phọ Ifraim rogbeelom ni ịkaraph ịinaghan phọ.

¹⁶Bịdi moru ọphur ạruru reelhe phọ rꞌọḅeni aJeruselem mọ ẹpomoghian mọḍua ni ẹekela ekpisi rotu. Ẹpomoghian phọ ạbuen phọ kọlooghiom rạmha phọ aJuda,

¹⁷ḅịle kẹn, kokoony Jeruselem ịdipho awe rokoony ghan bọ ozo, loor esi dị awe phọ ọdi mọḅaar ẹmhu esi Ọmoogh-we phọ. Ọmoogh-we phọ kụ ạḅem.

¹⁸Juda, nạ kụ ụwa ni ịphen phọ loor ạdol phọ nạ odi bọ rꞌaloor ạraraar dị nạ maḍighi. Ịkaraph phọ ạna kụ ịkom bọ ịminimiin phọ ịphen; ịkaraph phọ megim ẹleke ekpom ạna.

¹⁹Eephina phọ! Mị útue mun ụ́kparam eephina phọ! Oḅio ạmi rakaph ni agey, mị kátue aḅoorian. Mị mạnaghan rụkuodu phọ ḅịle rꞌịlooghi ẹgham.

²⁰Iniin ịiḅaghami ẹdaph ịnon; oomo phọ ẹmha phọ meguul. Mophiemi rugbogo phọ ayira ekperenom, mọphanyi rukpe eghuugh phọ.

²¹Mị kạmiin ghan oghur ẹgham mọ ạḅile ạnaghan ọkuodu ẹgham mọ kꞌạpur-aḍio?

²²Ọmoogh-we phọ ạḅem mọ, “Awe phọ ạmi ịyaar úlegheri; bịdi ịmi úlegheri. Bịdi ọkigh ịbam ạnmuny dị ologhi úlho; bịdi ụ́moogh ọnaghan ạḍughum. Bịdi ọkaraghi ọmaar oḍighi ịkaraph, kụ ọlo oḍighi ịpe ẹnighe bọ ẹkparanaan ni bịdi.”

²³Mị uphogh ni de phọ — eḍighi ọkpagha; mị aphogh okuaḍio phọ — ạḍiḅaal ị́tol.

²⁴Mị uphogh ni ruugum mọ — bịdi repiigha yogh ni, ḅịle ạraaḅaraph phọ rẹpiphighaan kẹghi risigh rꞌọman.

²⁵Mị ụmiin mọ awe úlho; ghạlamo ịnun phọ bịn mẹphepheghu ẹḍua.

²⁶Ade ẹnuum mọ meten ophugh; igbogh ạramha phọ ọdi meegulaan loor ogbogh ọghagh ologhi Ọmoogh-we phọ.

²⁷(Ọmoogh-we phọ mạḅem mọ oomo phọ ade phọ keḍighi ẹdala, kụ ọlo mọ ọno káagulemi ạmadan.)

²⁸Ade phọ kẹto ni ọto; okuaḍio phọ kabil li. Ọmoogh-we phọ mạḅem kụ kánme ologhi phọ ọdi. Ọdi magbiighi ịpe ọdi kaḍighi bọ kụ káḅula ọman.

²⁹Mem dị ọnaghan ḍịgum awe ẹgham dị oḍiku ạsu rꞌạbudi ọpham sịkumugh, tọrotoro oye kakiil li asuma. Abuniin kokiil osuma ẹekpua, ạbunon ọsiiny ạnyu igbo asighiigh. Oye kạ́tol mun rạmha phọ, kụ oye kátugh mun kẹn ni sịphe phọ.

³⁰Jeruselem, nạ maphe! Eeghe kụ iḍighi kụ nạ ạmaar bọ aanmenan rꞌoodor? Eeghe kụ iḍighi kụ nạ ạdia bọ rạla rꞌịbekulari, ạḅile bọ awila ịmu riḍien ạna? Nạ ụpu ni bịn kụ rạnighemian bọ loor phọ ạna! Ạruga phọ ạna moghel nyịna, ḅịle rọwa ghan oghiigh ạna.

³¹Mị ụnaghan emoghi, dị ẹghigh ẹlo ạnir dị oghunughun rakun, ḍịolho dị ẹghigh ḍịa ạnir dị rạmar ọḅel ọony ọdi. Eḍighi emoghi aJeruselem dị mạghurughan kụ rạwa ghan ịlo ophooghu aani, dị masele ḍịghaagh ọdi kụ rạḅem ghan mọ, “Mị maphe! Bịdi rotu oghiigh ạmi!”