Read abua Jerimaya 40 Bible Online

Jerimaya 40 - abua bible

Jerimaya 40

¹Ọmoogh-we phọ ụḅaanaan ni ịmi mem dị ạNebuzaradan, oḍiemiom ọnyo ẹgham mọ, museere ịmi dọl ẹereegh ẹpe Rama. Ọbo mụsighe ni ịmi ọkpoom aani izime rꞌạbunon awe aJeruselem rꞌaJuda dị mosiphi rọkimom ẹpe Bạbilonia.

²ẠNebuzaradan ụsighe ịmi atene ọgbal kụ ạḅem mọ, “Ọmoogh-we Ẹnaan phọ ạna ạḅem ni mọ ọno kapiemi de phọ ạḍien,

³kụ nyịidipho ọdi maḍighi ịpe ọdi ạḅem bọ mọ ọno kaḍighi phọ. Oomo ịphen phọ imite loor esi dị awe ạna moḍighi ịkaraph esi Ọmoogh-we phọ kụ ọḅile ọḅaar ẹmhu esi ọdi.

⁴Nyịidipho mị rạakpo izime phọ ạraghaagh phọ ạna kụ aseere nyịna ẹereegh. Mụghumo nạ rạwa ọdaph ạmi ogheel ạBabilon, nạ atue ni atu kụ mị kạmaar ri ạpham nyịna. Kụ eḍighi ịdi nạ ụ́wa ọghi, pọ kạ́aḅaghamian loor. Oomo eelhe phọ edianaan ni nyịna ophogh ekpisi ọsaḅar, kụ nạ atue ni ạki tọrobo ekpisi lọ ẹḅeeraan nyịna.”

⁵Mem dị mị ụ́pagharanaan, ạNebuzaradan ạḅem mọ, “Ḅula ạteeny Gedalaya, ọony Ahikam rꞌọony ọnyo aSafan, ọpo ọdaam-ẹmha phọ ạBabilon maḍighi bọ ogbogh ọdaam ạramha phọ aJuda. Nạ atue ni atughan rꞌọdi kụ ạtolan rꞌawe phọ, ḅịle nạ atue ni ạki tọrobo ekpisi lọ nạ ạatughian.” Pọ kụ amem dị ọdi ụngo ịmi ruunmo rꞌeḍien ọphamam kụ ọghi ekpisi lọ ịḅeeraan ịmi.

⁶Kụ mị agbi ọghi ọrolan rꞌaGedalaya sịphe Mizpa kụ orughan rꞌawe phọ ọwile bọ sịphe ade phọ.

⁷Buniin abuḍiemiom rꞌạbuo ẹgham mọ aJuda kőphoophe rạghaagh ạbidi ọngo ogbogh ọdaam mọ ạBabilon. Bịdi ọnaghan mọ ọdi maḍighi Gedalaya ọdaam-eelhe phọ kụ ạḅem mọ ọdi kụ aphogh ghan oomo ạbuphe kọ̋sighe bọ ọghimom ẹpe Bạbilonia — ọkaraghi arukulom mọ sịphe ade phọ.

⁸Kụ Ịsmael ọony aNetanaya, aJohanan ọony aKaria, aSeraya ọony aTanhumet, ạnmuny Efai ọlo aNetofa, rꞌaJezanaya ọlo aMaaka ọghimom rꞌawe ạbidi esi aGedalaya ẹpe Mizpa.

⁹AGedalaya ạḅeni bịdi mọ, “Ịmaar elegheri mọ ị́kpe dị nyina kekiilaan ophoophe ạraghaagh ọngo awe ạBabilon phọ. Ịmaar ẹrol sịen ade phọ, ekumu ghan ogbogh ọdaam mọ ạBabilon, bịn oomo phọ ịne kịnighenaan ni inyina.

¹⁰Mị rꞌaloor kạtol li sịen Mizpa kụ ạmeera esi anyina mem dị awe ạBabilon phọ oru sịen. Kụ nyina etue ni eeko miim, iimuma rꞌạmunum-ọliv, kụ ẹtol ologhi ạramha phọ nyina edi ghan bọ.”

¹¹Mem mọ ạmuen, oomo awe phọ Ịzirel dị ọrol ghan ẹpe Mọab, Amon, Idom rꞌịnon areelhe ụnaghan ni mọ ọdaam-ẹmha phọ ạBabilon mameera mọ buniin ạbuo Ịzirel ọrol li Juda kụ mọ ọdi maḍighi Gedalaya ọdaam eelhe phọ ạbidi.

¹²Kụ bịdi ọwile yogh riisi phọ bịdi ọwalala bọ ọghi kụ origheleghu Juda. Bịdi oru ọteeny Gedalaya sịphe Mizpa, kụ ịsiphe kụ ẹdi bịdi ooko iimuma rꞌamiim dị ạmanam.

¹³Ịphen reten, kụ aJohanan rꞌabuḍiemiom awe ẹgham mọ dị kőphoophe rạghaagh ọngo ogbogh ọdaam mọ ạBabilon oru ọteeny Gedalaya sịphe Mizpa,

¹⁴kụ ọḅem, “Yoor moru ọḅeni ạna mọ aBaalis ọdaam mọ Amon marom Ịsmael mọ aghiigh nyịna.” Kụ aGedalaya ómeeraam.

¹⁵Kụ aJohanan ạḅeni nyọdi esi ịbooghian mọ, “Meera mị ụki ukiigh Ịsmael kụ oye kálegheri oye phọ aḍighi bọ. Esi ika kụ omeera mọ ọdi aghiigh nyịna? Ịpe keḍighi ịdi oomo ạbuo aJu phọ mookpomoghan bọ okoom nyịna kọwalala, kụ kẹsighe igbogh ịiḅaghami etuomaan oomo awe phọ odi bọ sịphe Juda.”

¹⁶Kụ ọlo aGedalaya ạphagharanaan mọ, “Káḍighi ịdipho! Ịpe nạ rạkaaph bọ ịlo Ịsmael kígey.”