Read abua Jerimaya 41 Bible Online

Jerimaya 41 - abua bible

Jerimaya 41

¹Ụnwanyu dị amuneniom oḍual sịphe ạlha phọ ạḍiphe, Ịsmael ọony aNetanaya rꞌọony ọony Elisama, ọlo eghunotu dị rọda ghan, rꞌoniin ogbogh ọnyo iiḍighi ọdaam mọ, ụghi ẹpe Mizpa rꞌiḍioph awe ọmiin aGedalaya. Mem dị oomo phọ ạbidi ookpomoghan role eḍien,

²Ịsmael rꞌaḍioph awe phọ rꞌọdi oru bọ uruph rolhool ẹgham ạbidi kụ oghiighom Gedalaya.

³Ịsmael ạḅile ạziom oomo awe Ịzirel dị ọrolan rꞌaGedalaya ẹpe Mizpa ḅịle rꞌạbuo ẹgham mọ ạBabilon lọ ọrol sịphe.

⁴Ḍịeri phọ aḍio phọ, tụtu oye ralegheri mọ moghiigh Gedalaya,

⁵ọphaanyadi awe ụḍua ni Sẹkem, Sailo rꞌaSameria kụ oru osi. Bịdi ughula rẹleem ạbidi, ọphanyi rụsuoma ạbidi, kụ obenegha siloor ạbidi. Bịdi ụsighe ịbiakpa rꞌịnsens kụ rọkimom Otu Ịiḅereghi phọ ịlo ọngo Ẹnaan.

⁶Kụ Ịsmael ạḍua Mizpa amite ọteeny ạbidi rꞌemoghi kụ ratelhiom. Mem dị ọdi ạteeny bịdi, ọdi ạḅem mọ, “Kẹ́le, itu ẹmiin Gedalaya.”

⁷Bịdi roḍigh sịphe ẹmha phọ bịn, Ịsmael rꞌawe phọ ọdi ọze bịdi bịn osumughi aghuḍia.

⁸Kụ ḍioph awe sịphe aḍita phọ ạbidi ọḅeni Ịsmael mọ, “Kạ́le, iyoor kụ́ze. Yoor ọmoogh ịbiakpa, abali, mụnum-ọliv rꞌẹnuum aḍiowo dị ạaghi eḍum.” Kụ ọdi ạwile bịdi.

⁹Aghuḍia phọ ọpo Ịsmael asumughi bọ iḍim mọ ọdi ạze bọ kụ ogbogh aghuḍia, dị Ạsa ọdaam mọ aguph mem mọ aBaasa ọdaam mọ Ịzirel ạzuom bọ ẹgham mọ nyọdi. Ịsmael amuzeḍi ghuḍia phọ iḍim.

¹⁰Ịphen reten, ọdi ạsighe nmạnyaan ọdaam mọ rꞌạbunon awe dị ọrol bọ sịphe Mizpa, dị ạNebuzaradan oḍiemiom ọnyo ẹgham mọ aseere bịdi mọ aGedalaya aphogh ghan. Ịsmael aḍighi bịdi we ikoli kụ anyeeniom ạga eelhe phọ Amon.

¹¹AJohanan rꞌoomo abuḍiemiom ẹgham mọ ọrolan bọ rꞌọdi ụnaghan ni ịphen Ịsmael aḍighi bọ.

¹²Kụ bịdi rꞌawe phọ ạbidi omiigh ophorogh ọdi kụ ọteeny nyọdi sịphe ogbogh ooni ạmuum ẹpe Gịbion.

¹³Mem dị awe phọ Ịsmael asiphi bọ rạḍuanam ọmiin bọ Johanan rꞌabuḍiemiom ẹgham mọ ọdi, iloghi ạbidi ịḅaal li

¹⁴kụ bịdi ooghiraan kụ oghiil ọghi ọteeny bịdi.

¹⁵Kụ ọlo Ịsmael rꞌọphaanya awe sịphe aḍita phọ ọdi okpetenaan Johanan kụ osuma ogheel de Amon.

¹⁶Kụ aJohanan rꞌabuḍiemiom ẹgham mọ ọdi ọpham we phọ Ịsmael asiphi bọ rạḍuanam sịphe Mizpa mem mọ moghiigh bọ Gedalaya — weye ẹgham, nmạriir, nmụny, rꞌawe dị opho.

¹⁷Bịdi ughiilaan we ạBabilon phọ loor esi dị Ịsmael maghiigh Gedalaya, ọpo ọdaam-ẹmha phọ ạBabilon maḍighi bọ ogbogh ọdaam sịphe ade phọ. Kụ bịdi onyeene ẹpe Ijipt ẹlo okpetenaan awe ạBabilon phọ. Ẹpe eten phọ, bịdi ọmeera sịphe Kimam dị etuman Bẹtilihem.