Read abua Jerimaya 44 Bible Online

Jerimaya 44 - abua bible

Jerimaya 44

¹Ọmoogh-we phọ ụḅaanaan ni ịmi ịlo egbolomaam oomo awe phọ Ịzirel dị ọrol ghan Ijipt, sịphe ạramha aMigdol, Tapanes rꞌaMemfis, rꞌesoorom ạga eelhe phọ.

²Ọmoogh-we Egbogh Ẹnaan phọ Ịzirel ạḅem mọ, “Nyina rꞌaloor mẹmiin ni ịpe mị aphiemi bọ Jeruselem rꞌoomo ịpheri phọ ạramha phọ aJuda. Kꞌạnyiidipho bịdi eegulaan ni kụ rꞌoniin oye ólho ẹpe

³loor esi dị awe phọ ạbidi mọpioghom kụ uḍighi ịmi ịlo ophin ologhi. Bịdi uḍighi ghan rạraar aghuḍum ọngo ịkaanaan ạrumugh kụ okumu ghan ruru dị bịdi rꞌanyina rꞌạburude ạburude ạbidi kꞌekulha kőoseeny ghan.

⁴Mị arom ghan butelhedom ạmi, riil phọ, bụphe ịḅeni bọ inyina mọ kéḍighi ịyaar dị eeph ịduon ẹḅile ikia ịmi.

⁵Kụ ọlo nyina íler rụru ịnaghanan. Nyina ímeera ịbile ẹkaraph eḍighinom ạraraar phọ anyina oḍighi ghan ạrikia ọngo ịkaaghineen ạrumugh.

⁶Ịpe kụ iḍighi kụ mị aakuom bọ ọghagh ologhi ạmi rꞌophin ologhi ạmi rạmha phọ aJuda rꞌẹpe aroḅodo phọ aJeruselem, kụ mị ạsu bịdi nịan. Bịdi eegulaan kụ ebeeph ọmiin, ịdipho edi bọ kꞌarodon.

⁷“Loor ịduon phọ mị Ọmoogh-we Egbogh Ẹnaan phọ Ịzirel ạwa olegheri ịpe eḍighi bọ kụ nyina reḍighinaan bọ rạraar dị eeph ịduon siloor anyina. Nyina rẹwa ọsighe oogulaan oruomaan alephiri rꞌạnmariir, ạnmuny rꞌạnmuny asipugh, ọbo rꞌoniin ọnyo anyina kasugha ghan bọ ḍụghum?

⁸Eeghe kụ nyina rịngo ghan bọ ịmi ophin ologhi reten ooseeny ịkaaghineen ạrumugh rꞌọḅile oḍighi ạrikia ọngo aruru sịen Ijipt, esi phọ nyina meru bọ ọrol phọ? Nyina reḍighi ghan ịphen phọ ophiemi asiloor anyina bịn ḍụghum, ẹrol dị tọrobo eelhe sịen ade phọ iphogh inyina ẹḅitonaan kụ ẹsighe ḍien anyina eḍighi ịlo itonyonaan bịn ḍụghum?

⁹Nyina mewula oomo ịkaraph ạraraar phọ moḍighi bọ ẹpe ạramha phọ aJuda rꞌaroḅodo phọ aJeruselem, dị ạburude ạburude anyina kụ oḍighi yogh, dị ạbudaam-ẹmha phọ aJuda rꞌạnmariir phọ ạbidi kụ oḍighi yogh, rꞌanyina rꞌạnmariir phọ anyina kụ eḍighi yogh ḍụghum?

¹⁰Kụ kꞌaḍio phọ ạḍiphe kꞌarodon nyina ke̋soromi siloor anyina. Nyina ịmi eghuan kị̋lhogh ḅịle ẹ́daph ẹrolom oomo iilogh phọ mị ạloghoḍi bọ ịngo inyina rꞌạburude ạburude anyina.

¹¹“Loor ịduon phọ mị Ọmoogh-we Egbogh Ẹnaan phọ Ịzirel kakiton iphogh inyina kụ apiemi oomo aJuda.

¹²Ịlo egbolomaam we phọ aJuda bụphe osugha bọ kụ ọnya bọ ọghi ọrol ẹpe Ijipt, mị kạmiin ni mọ oomo ạbidi oogulaan. Oomo phọ ạbidi, bugbogh rꞌạbubam, komugh ni ẹpe Ijipt mụghumo erugh ẹgham mꞌạdol ọkoony. Bịdi kobeeph ni ọmiin; awe kopogh bịdi ọḅitonaan kụ ọsighe ḍien ạbidi oḍighi ịlo itonyonaan.

¹³Mị kạliom ni bụphe odi bọ ẹpe Ijipt, ịdipho mị ạliomom bọ Jeruselem, rꞌẹgham rꞌọkoony rꞌẹzegh.

¹⁴Rꞌoniin oye ọlo aJuda dị asugha kụ maru Ijipt ọrol kákpetenaan ḅịle káḍum. Rꞌoniin ọnyo ạbidi kátigheel ẹpe Juda, ẹpe iloghi phọ ạbidi edi bọ ọḅile oḅula phọ. Rꞌoniin kátigheel emuton ịyal-ikpo ạbudi oghiil ẹgham.”

¹⁵Pọ kụ amem dị oomo phọ awe phọ olegheri bọ mọ ạnmariir phọ ạbuno uḍighi ghan rạraar aghuḍum ọngo ruru, rꞌoomo phọ ạnmariir phọ ọmeregha bọ sịphe, ọḅaram weye phọ Ịzirel phọ orugh bọ ẹpe esoorom ạga Ijipt — ọkar aḍigbogh aḍita — ụḅeni ịmi mọ,

¹⁶“Yoor úmeera ụ́naghan ịpe nạ ụḅeni bọ iyoor esi aḍien Ọmoogh-we phọ.

¹⁷Yoor koḍighi ni tọrobo ịyaar lọ yoor mọḅem mọ yoor koḍighi. Yoor koḍighi rạraar aghuḍum ọngo um-ạke ayoor, Ogbogh Ạnir kꞌẠke, kụ yoor omoor miim ọngo nyọdi, ịdipho yoor rꞌạburude ạburude ayoor, ọolha-ẹmha phọ ayoor rꞌabuḍiemiom mọ ayoor, oḍighi ghan bọ ẹpe rạmha phọ aJuda rꞌaroḅodo aJeruselem. Kụ yoor ọmoogh ghan bọ eboom eḍien olhe, yoor ọmoogh bọ ẹelha ḅịle kẹn yoor ịiḅaghami ụ́moogh ghan.

¹⁸Kụ emiigh kꞌaḍio phọ yoor ọwile bọ oḍighi ghan ạrikia ọngo Ogbogh Ạnir kꞌẠke kụ ọwile omoor ghan amiim ọngo ọdi, yoor kọ̋moogh mun ịyaar, ḅịle awe phọ ayoor momugh erugh ẹgham ḅịle rꞌạdol ọkoony.”

¹⁹Kụ ạnmariir phọ ọloghom mọ, “Mem dị yoor oḍighi ạkikia dị osogolomi ọghighemi Ogbogh Ạnir kꞌẠke, kụ oḍighi ịyaar aghuḍum ọngo nyọdi, kụ omoor miim ọngo nyọdi, aburulhom mọ ayoor umeeraam ghan ni ịpe yoor roḍighi bọ.”

²⁰Pọ kụ amem dị mị ạḅeni oomo awe phọ rꞌạnmariir phọ mụphagharanaan bọ ịmi ịduon:

²¹“Ịlo egbolomaam rạraar aghuḍum mọ ịpe nyina rꞌạburude ạburude phọ anyina, ạbudaam-ẹmha phọ anyina rꞌabuḍiemiom mọ anyina, rꞌawe ịsiphe ade phọ oḍighi yogh bọ ẹpe ạramha phọ aJuda rꞌaroḅodo phọ aJeruselem — nyina regbi mọ Ọmoogh-we phọ ólhegheri ịlo ạbidi, ḅịle kẹn mọ ọdi mawula ḍụghum?

²²Ḍio phọ arodon ade phọ anyina mẹphu kụ rꞌoye ólho mun sịphe. Mẹḅile eḍighi esi dị eeph ọmiin kụ awe ọsighe ḍien phọ oḍighi ịlo itonyonaan loor esi dị Ọmoogh-we phọ órue mun ọ́kparam sịpioghom mọ rꞌẹkaraph eḍighinom ịyaar phọ anyina.

²³Ịminimiin phọ ịphen mịteeny inyina loor esi dị nyina iḍighi yogh rạraar aghuḍum ẹngo ruru kụ ẹpioman esi Ọmoogh-we phọ ịdipho nyina ị́naghanan bọ oomo ịto phọ ọdi.”

²⁴Mị ụḅeni ni oomo awe phọ, ạkar ạkpaariom nmạriir phọ, ịpe Ọmoogh-we Egbogh Ẹnaan phọ Ịzirel rạḅeni ghan bọ weye phọ aJuda odi bọ ẹpe Ijipt: “Nyina rꞌạnmariir phọ anyina meguanaan oguan dị aamor ẹngo Ogbogh Ạnir kꞌẠke. Nyina iguanaan ni mọ nyina keḍighi rạraar aghuḍum ẹngo nyọdi kụ emoor miim ẹngo nyọdi, kụ nyina meḍighi emitiom. Ẹnighe ni-a. Iḍighi ruguanaan phọ anyina emitiom! Iḍighi emitiom ịpe nyina emerenyan bọ!

²⁶Kụ ọlo nyịidipho ịnaghan oguan phọ mị, Ọmoogh-we phọ, maguanaan rꞌaḍigbogh aḍien phọ ạmi ạngo oomo phọ anyina ạbuo Ịzirel phọ odi bọ ẹpe Ijipt. Egbi kꞌaḍio phọ arodon ẹghiom ghisigh, mị kámeera mun dị ọnyo anyina kạsighe ḍien ạmi ạḅemom mọ, ‘Mị akunyaam ḍien Ẹnaan phọ edi ghan bọ.’

²⁷Mị kaḍighi ni ịdi nyina kéḍum; mị kiphiemi ni inyina. Oomo phọ anyina kemugh ni, iini erugh ẹgham ḅịle mꞌesi ẹzegh tụtu rꞌoniin ọnyo anyina kásugha.

²⁸Kụ ọlo ịyal-ikpo anyina kokpetenaan ni ḍuugh kụ ẹḍua Ijipt etigheel Juda, kụ bụlo okpetenaan kolegheri ni ikpo ọnhu oye lọ ẹmeera, ịlo ạmi ḍụghum kụ ịlo ạbidi.

²⁹Mị, Ọmoogh-we phọ, kịngo inyina eḍeenaan mọ mị kịliom ni inyina sịen esi phọ ẹphen ḅịle mọ oguanaan phọ ạmi ọsighe amuphe oruomaan anyina kamite ni.

³⁰Mị kạḅogh Hofra ọdaam mọ Ijipt ạngo bụmulogh-ḍien ọdi bụphe rọwa bọ oghiigh ọdi, ịdipho mị ạḅogh bọ Zẹdekaya ọdaam mọ aJuda ạngo Nẹbukadnezar ọdaam eelhe phọ ạBabilon, ọpo aḍighi bọ mụlogh-ḍien ọdi kụ ạwa bọ oghiigh ọdi.”